ŠTORIJE IZ MALOG MISTA
piše: Jadran Šantić Šangarelo
Jo bože lipa li je jesen sa svin onin kolurima kojima se ka inkantani morete divit u sumrak. Ma bome morete i po danu jer jesen pravi najlipši kolorit o lišča tako da u to vrime dragi bog ispada najboji slikar prirode u kolurima.
Moran prić na drugu temu jerbo moran napisat ovu štoriju. Šoma dela šoma sve je istina, a očeli van se svidit …vidičemo.
Ma moran van reč da san ka zvono na mobitel (bože moj da mi ga je srist ko ga je napravija ciloga bi ga skalamaštar …ukreja nan je mir) metija kliktaj naši lipi galebi.
I odnija đava mobitel nigdi po kuči klikče galeb i neda mira. Ajde u zanju ga najden kad tamo …prijatej zove…
-ajde dojdi sutra pomozi za u masline. Ma kako tebi škina ni najboja ti češ parićat spizu a drugi čedu brat biće i lipega vina, znan ja da ti voliš crno.
Mislin se …ajde bome ni to nije loše bit malu u brdo na ariju. Ma posli po ure zoven ja njega
-asti gospu a ča ćemo parićat za ist?
On odma kaže:
-Jema lipe moje pancete lipi pomi i jubičaste kapule a za gradele čemo se dogovorit ujutro.
Ajde ja se smirin i u nika doba gren leč. Ma lipo san brzo zaspa i onda ka za vraga čujen ja opet onega moga nesriknjega galeba i mislin se ko je sad, kad tamo oni moj prijatej kuka zove:
-Ajde smenon na more baci san parangal pa nima ko ga izvadit.
Ajde štaču o njega obučijen čizme gače o kabanice, a jaketu priko ramena i na glavu rašketu a na njoj lipo piše „Stari mornar“. To san dobija od gazde onega restorana na Poljud u Splitu.
Odemo mi kaičen na poštu i počnemo dizat kad tamo svitu moj …na prvi 50 udic …ništa. Mislin se ja …najebali smo …skvasit čemo se i vratit se u porat sramotni bez ribe. Majko moja ko če tu zajebanciju izdržat.
Kad nigdi oko 80-te udice …bome ništo teško …vadi, vadi …kad ono lipi ugor od niki 3 kila.
I onda je krenilo …ribe ka blata skoro mi je srce izletilo vanka iz prsiju od radosti. Bija san ka malo dite …jo ribe …jo koji koluri.
Ma i ovi moj nesriknji prijatej i on se stalo smijulji ispo brka jema bogami jema i to obilato. Kad smo sve lipo stivali u kante o jupola gremo doma a ja ka iz topa.
-Gospemi biče danas za gradela u masline kad i ispečemo ovima doli u porat ič če slina na justa.
A on meni:
-Ma znaš malo punic,i malo sestri, malo bratu, malo Nonu i onda ča ostane more za radnike na gradele.
Vidin ja vrag odnija šalu i sve ništo grintan sebi u brk a ka smo vezali kaić uzeja ja sebi ništo ribe za ženu i partija doma a on za menon viče:
-Stani dičeš nesriknjače jedan …čekaju nas judi u brdo, oni več beru ko če in sparičet spizu po meni če umrit a umra bi i ja da mi nije Domine.
-Dobro …kažen ja …ma ja ču isto odnit ženi ribu i doč zatebon gori.
Doša ja doma i kažen ženi …daj mi malo slani sardel i kruva jer kako je počelo u onega gada ču ostat gladan.
Penjen se ja uz brdo i bogami več su zapalili oganj, a on kurva očistija lipu ribu i ajde Jadrane peci. Jesan se naparija i nadimija ma su svi judi prste lizali a bome ni ja nisan bija daleko. Popilo se i lipa mira crnoga, pala je i pisma i onda su se svi ka mravi vratili branju maslin a ja san pod maslinu lega na jaketu i polako tonija u san uz lipi vonj o pečene ribe.
Moj bože ima li lipjega vonja, kad me odjednon niko probije nogon…
-Makni se bogati vruče mi je!
Ja nako iza sna gledan di san, di su gradele, di su masline, di su one lipe orade i cipli ča san i peka na gradele došlo mi je plakat o muke jer je ispalo da san lipo sve sanja a žena me pita …a šta je oli si bija di partija u snu?
Nesmin joj reč jer če me i ona zajebavat. Ma nečete mi virovat i danas kada se sitin tega sna zavonja mi lipa riba sa gradel
Eto štioci moji lipi i veseli bili ribe sa gradel u živo ili i crno vino pili.
Pozdravlja vas morski čovik Šangarelo