piše: Jadran Šatić Šangarelo
Evo na prvu odma da van rečen ova vam je štorija stara 40 godin i dogodila se u jedno naše lipo i šesno Dalmatinsko misto.
Jedan moj bivši prijatej je na nepoznat način doša do jednega onda starega auta ma to ni bi bilo koji auto vengo Mercedes i to iz 1946 god. nosi je oznaku 190D. Jako smišan auto ma za nas mulce koji smo tek procvitali žejni života i provoda bi je ka najluksuznije suto na cilemu svitu i bližoj okolici.
Ni u ona vrimena u malo naše misto bilo student servisa vengo prinašaj cukar u jutenin vrićan o sto kili. Iskrcavaj iz brodi cimenat i žalo ma i pržinu za građevinu a u ona vrimena se inkartavalo sa melton od klaka oliti vapna i to se nosilo u rukan oli na čivare jerbo ni tada bilo gašenoga klaka vego živi klak u glavan oli bovanima.
Svi iz klape smo se trsili radit ča više jerbo se onda jemalo i više pinez za naftu a to van je odma i više vozikanja i lova na ženskice. To prvo lito kad je ti moj bivši prijatej a nezna se kako doša do tega auta sve je bilo ka u snu ma kad su došle „o jesenske duge noći„ unda su počeli problemi.
Mi ka i svi mlaji nismo šparali šolde za teže dane vengo smo arčili sve ča smo zaradili i ujesen ajme nima za naftu. Žicali su se šoldi u svakega pripadnika bliže i daje fameje pa ako upali dobro a ako ne ča se more. Tu zimu su moji prijateji napravili dogovor i osnovali bend pa su nalazili i gaže po malin mistiman i svirali na baliman u zadružne domove vikendima i tako smo odanili a za privoženje nji i instrumenti služija je ti Merđo.
Sljedeće godine su počele nevoje. Nigdi poza novon godinon nan se ti već slavni auto pokvarija. Za današnje znanje i vrime ni to bija niki veliki kavar ma unda to je bila katastrofa. Pape od jednega našega prijateja je bi mehaničar i on nas je spasi tad ma i još puno puti poza tin. Ča je bilo prvi put? Ostali smo bez nafte i motor je potega ariju pa ga je tribalo ozračit a ko je u to vrime to zna, i eto spasi nas je barba Ante.
Kako je auto već tada bi star a jema priko 20 godišć i priša je kilometri ja mislin barenko pet puti koliko je oko kugle zemajske počeja se češće kvarit a najveći zajeb je bi kad ne bi moga u ladno vrime upalit onda bi ga morali gurat ma kad je upali moga je štekčat koliko očeš i ne bi se ugasi.
E i sada počinje ono glavno.
Jednu večer za vrime o pokladi partili mi na bale o maškar u velo misto i to di parvo u najlipji grad na svitu Split. Kako san ja rojeni splićanin ja san jedini zna kretat se po gradu ma u ono vrime ni ni bilo puno auti pa je sve bilo lagnje. Stali bi mi popit koji bibit pa tako barenko na desetak misti i poslin svake ture guraj Merđu da upali.
Kako smo bili sve pošprucaniji a i forca nan je padala odlučimo mi da čemo otić na bale i ostavit motor da radi a zakjučat auto i lipo kad se dobro izdivertimo partit u malo naše misto bez guranja za upalit makinju. U ona vrimena je bali u Splitu bilo na puno misti i mi svršili u Špinut u Šore ma kako unda ni bilo parkirališta a nismo tili ostavjat upaljeno auto na ledinu u mraku mi najdemo dosta blizu jednu kalu i ispo kandelabra o sviće parkiramo i zakjučamo Merđu sa upaljenon makinjon.
Balalo se cilu noć a bome se nastavilo i pit pa ujutro oko 6 uri kad su se svi razbižali kućama mi ostali sami i odlučimo da ćemo lipo spat u auto pa kad se probudimo doma. Ma e, a di je auto?
Sada kad je lipo svanilo sve se oko Šore prominilo i niko se od nas ni moga sitit di smo ostavili auto. Kako je jedan od nas jema blizu barbu odemo tamo i on nas primi pa mi po tleju u njegovu stanu polegli ka mrtva tila od bumbe i umora.
Poza podne oko 6 uri mi se probudili i nako bunovni raspravjamo a di je auto, u koju ulicu, pa koji je bi po redu u ulici kandelabar ionda krenemo tražit. Kako nismo jemali uspjeha u potrazi a noć je odila naprid ja san jema prijateja taksistu i sa javne govornice ga nazoven doma a bilo je več oko 9 uri da dojde i da nas spasi jerbo više ne moremo odit.
Kad je doša naš spasitej sve mu mi lipo spjegamo a on ka iz topa a di ste vi tražili, jeste bili u u ulicu Vladimira Nazora jer je on tamo još jutros vidi jedan stari crni Mercedes kako mu dimi iz auspuha.
Ta ulica je odma iza starega Hajdukova placa na početku špinuta. Pribaci on nas tamo a naš ti auto lipo još brunda ma je skoro počića svu naftu i da nan ti moj prijatej sa šijunon ni pritoći iz svoga rezervara desetak litri nafte bilo bi belaja.
Jo judi ća je ti Mercedes strašan auto ma zamislite radi je cile 24 ure i ni đava mu.
Kad smo se vratili u malo misto niko ni smija nikomen spjegat ća se dogodilo jerbo bi umrli od sramote i opće zajebancije. Lipo smo se svi zakleli na šutnju ka da smo pravi mafijuzi i tega smo se dugo držali sve dok jedanput nije jedan naš muzuvir počeja nas zajebavat kako smo kratke pameti kad se pošprucamo i onda smo znali da se niko od nas izlaja, jeli trizan oli pijan ni bitno ma pogazi je rić.
Lako je danas se sićat ti stvari ma taka su vrimena bila a danas je Merđo isto kraj oli car na cestama širon svita ma nisu mu auti nako dobri ka prin 30-40 godin.
Poslin puno godin su me prijateji u Split znali štucigavat an jesi li jopet izgubi auto, ma danas je lako jer svaki boji auto jema oni kako se reče GPS pa ga moreš po temu pronač a lipo ga se prati priko sateliti pa mu se more brzo uč u trag..
Pozdravjan vas vrli štioci vaš morski čovik Šangarelo.
Još san van zaudobi reč da nikad nismo saznali kako je oni moj bivši prijatej doša do Merđe ma nikad ga policija ni tražila, a isto nismo nikad saznali ko je oda tajnu.