ŠTORIJA O MOME BARBI

ŠTORIJE IZ MALOG MISTA
piše: Jadran Šantić Šangarelo
Jeman jednega starega barbu koji je cili svoj vik odija na more sa jednon staron gajeton u kojoj je bi motor na petrolje i koji se palija sa „španjuleton“.

Kako su godine prolazile i šćipale barbino zdravje tako je vrime bome grizlo i gajetu a da ne govorin da je i petroje postalo ritko gorivo i skupo. Kad san ja naresta i počeja radit tija san mu pomoć kupit novi motor ma on ni čut. -Di ću sinko minjat motor kad ovi svaki put pali od prve,je da se malo oznojin dok ga kurblon ne okrenen ma isto je on boji o svi novi makinj.

Tako smo se nas dva kontreštavali nikoliko godin i onda san ja popustija, samo san mu stvara grintu a to me ni bilo drago jer san tega barbu jako volija.

I onda jednon kad je mali Vice Blagajić, sin od moga  prijateja iz mladosti Maxa, učinija prvi sajam o brodi u Splitu di san tada živija, odlučin ja moga barbu, koji je več uvatija lipe godine odvest na ti sajam da on iz prve ruke vidi ća je svit sve učini o mali brodi i o unutrašnji motori.

I tako ti ja zoven moga barbu na telefon i pitan ga bili tija smenon učinit jednu lipu điradu priko rive i da bi doša po njega auton, a on bogami pristane.

Dojden ja po njega a on obuka one Lee gače na tirake mornarsku maju i to ganjc novu pribacija lagašnu jaketu o rebatinki Lee priko ramena, stavija lipu litnju bilu  španćeru i čeka me isprid kuće.

Seja ga ja u auto i pitan očemo li odma u vižitu oli bi tija pri popit niki lipi bibit. Gleda on mene i još nezna da ga ja vodin na sajam brodi, ma isto me zapita an ća si naumi.

Ja mrtav ladan a bome ništa samo bi tija da nan bude lipo, a on onda ajde vozi me u Fife u oštariju pa čemo daje vidit.

Prošli mi kroz tunel i pravac Fife, parkira ja auto, a on izlazi i priko Matejuške baci pogled pa frkne asti onega boga a koji je ono šušur na rvu …oli je danas kakvi dernek oli fjera.

Govorin ja njemu …ajmo lipo u Fife pa ćemo poslin prošetad i vidit.

U Fife smo popili po dva bićerina on konjak jer ga je obožava, a ja Jack Daniels jerbo voli jako burbone. Vidili smo ća jema za izist i gremo mi na rivu.

Kad smo se približili pita on mene ..an cukunu kakva je ovo gužva o lipi veliki jahti …oli je ko doša u Split.

Govorin ja …nije vengo ti je to naša Spliska novotarija sajam o novi brodi i motori pa san tija da vidiš ća sve jema na svitu i da tvoja gajeta ni zakon o mali brodi.

Lipo smo sve polako prigledali i bome skoro dvi ure điravali, pokupili smo dabi 3 kila prospekti na par misti di su mi bili prijateji …dobili smo i reklamne maje i kape a mome barbi su jako drage bile ove nove raškete sa dugin frontinima.

Vračamo se mi u Fife na obid di smo opet popili po bibite i onad uz čakulu o brodima i motorima lipo blagovali. Moj je barba sve priznava da su danas lipši i boji brodi da su motori pravo šesni manji a puno jaći, a najviše mu se svidilo kad san mu pokaza pasaru od moga prijateja Mirzeta iz Zagreba, koju radi njegova firma Remia plast …i to pasaru o 5 metri koju ne triba šekat vengo se ona sama prazni.

-Je gospemi to je prava stvar, ma zamisli da poslin svake kiše ne moraš trčat u porat i šekat kajić je je da jeman manje godin odma bi je vazeja.

Kad smo se vratili doma pita ga moja teta an kako je bilo di ste bi ćaste radili? Frkne barba kroz brk …sve ću ti lipo spjegat kad ovi muzuvir ode da me ne bi prikida, jerbo bi moga ćako zaboravit a ne bi to tija jerbo je sve bilo puno puno lipo.

Posli 5-6 godin moj ti je barba parija bogu na istinu …ma isto prin nego je umra …jedno jutro je teta zvala da me oće vidit. Doša ja …a on teti ajde ti skuvaj kafu i donesi meni i ovemu muzuviru po bićerin dok ja s njin besidin. Seja ja kraj njega uz posteju a on me uvati staračkon rukon, koja je bila ladna i drhtava …pa me pogleda i upita …ajde šta misliš zašto san te zva?

-Neznan a kako bi moga znat nisan ja višćun. E mora san ti ovo reč prije vengo partin, učinija si me jako sritnin kad si me ono vodija vidit brode. Od tada san stotine puti pensa kako gren na ribe sa ovin oli onin brodom, jo da je to bilo pri 50 godin, a ko bi bija sreitniji o mene a posebno sa onon lipo širokon pasaron šta se sama šekaje.

Fala ti moj Jadro puno ća si me pod stare dane sa ti usrićija. Ma moran ti reč kad buden gori ako bude mora ja ću i gori bit čovik o ribaršćine ma gori ču sigurno jemat lipši brod.

Poslin tega puno se puti sitin moga pokojnega barbe i mislin koliko malo triba za stare jude usrićit. Ja danas jeman onu pasaru i bome guštan s njon a u njoj se puno pti sitin moga barbe.