MATER BROŠKO -MATER MOJA

Dubravka Borić
Brimena brola,
maštile vodie na glovi nosila,
lušiju od luga činila
i robu prola.
Bronzine visila,
trliše krpila,
žepe minjala,
bisoge tašelovala.
Istrošene buzovce sukala,
preju u kluko motala
(za suklenjaču da se nojde
kad se piete i lajte obojde).
Na siće molte primila.
Pinelon zide i plafune bilila.
Cviće na surolu zalivala.
Vrtle kopala.
Žolo za terace tukla,
brokve dretila,
matune slogala.
A u vrime rata
od muora suol činila,
po gori smriške i trovu brola,
dicu hronila.

I
ko bi
mogo
vidit
toliko boja?
Kuo, nego
Mater broško -mater moja.