ŠTORIJE IZ MALOG MISTA
piše: Jadran Šantić Šangarelo
Jo judi moji lipi i šesni da samo znate kakvi se sve baruf dogaja u Dalmaciji to nemore ni dragi bog zamislit a kamoli predvidit.
Svi vi znate da svugdi pa i mojoj prilipoj Dalmaciji jema vridni judi, jema linčin, jema zajebanti, jema fločuni svake vrsti …ma jema nas bome od boga napravjeni na sve moguče načine ka i kad Nadalina iz pisme spravja jaja na sto način.
E i ova štorija van je živa istina samo radi vlastite sigurnosti i škivavanja škandala nesmin reč u koje se naše malo misto dogodila i kako se zovedu glavne face u njoj. Jeman ja jednega prijateja a bome san van o njemu puno priča kojega zovedu Mačak, jerbo je svugdi i sve zna pa i one najšakretije tajne.
Dunkve ti moj dragi i šesni prijatej Mačak, zajebant bez ravnega sebi u cilomen svitu, nikidan mi ispripovida ovu štoriju. Jemamo mi jednega zajedničkega poznanika kojega čemo zvat „GOLEMI“ i ova če van štorija otkrit sav smij i muku koju je ti naš zajednički prijatej doživi jednega puta kad se iša bavit sa poslon koji ni za njega.
Kako i sami znate u Dalmaciju jema savakakvi stabal od oni divji do bome i pitomi koja su poznata u cilemu svitu a to su MASLINE, a zna se da je naše dalmatinsko maslinovo uje jedno od najboji na cilemu svitu i okolici.
Ma za gospu blaženu nemoredu masline rađat po duhu svetomen vengo ji triba ašitit i to zalivat ako očeš više uja, okopavat , dodavat jin umjetnoga gnjoja 3 do 4 puta na godinu …prskat ji proti boleština i napasnika …moradu se sić vodopije i bome mora se par puti na godinu i kosit trava jerbo reste ka luda.
Svi oni koji bi tili jemat dobro ekološko uje vrhunske vrsti kose travu jerbo i neče da je polivaju raznin otrovima da ti otrovi ne uđu kroza žile u plod o masline, a jedan među timan osvještenin maslinariman je i naš poznanik kome smo nadili ime Golemi, jerbo je bogami ka od brda odvaljem.
Kako ti naš poznanik Golemi jema puno maslin nemore sam uređivat masline vengo uvik vazme radnike, a jedan put ga je ništo klepilo u možjane i on ti je odluči otič u masline i kosit bome travu jerbo ka pravi maslinar ni tija da mu masline budu obrasle ka u prašumu.
I lipo je on doša u maslinik, obuka kombinezon kako i priliči temu poslu, jerbo se moradu zaštit noge i ruke da od motorne kose ne vrcne koji piljak oli iver i ne ruvina te po nogan i rukan.
Stavi je uredno štitnik za oči i cilo lice ..na glavu lipi klobuk …upali je makinjetu i udri po travi.
Kako je sunce izašlo, a lito je i onako bilo jebeno vruče, a naš golemi golem pa u malin pauzama udri po gemištu …bome se oznojija ka da ga je niko proliva sićiman vode.
Ništa to ne bi bilo čudno da vrag ne ore i ne kopa pa je našemu Golemome učini barufu.
U nika doba je našega junaka ove štorije uvatla muka i triba je učinit veliku potribu …ma tada su počele njegove muke.
Kako je bi cili oznojan, a kombinezon se na njemen zalipi za tilo i poslin divovske borbe sa kombinezonon ni ga uspija svuč a neprijatejski nastrojena guzica oče svoje.
Jadni naš Golemi se izbezumija i ća če bidan sitija se u zanju i na oštri kamen je počeja trljat guzicon kombinezon nebi li ga raspara i uspija ne posrat gače.
Kako ne znamo finale ove lipe štorije a nebi tili nagađat moremo van štioci dragi samo dat sinjal da je ti dotični naš Golemi bi jidan i infotan a kako zna cilu lepezu sovki skinija je sve na zemju i iz tega jopet moremo izvuč razne zakjučke.
Ka prvo da je uspi razrizat kombinezon i potribu ne učini u gače, ma da je isto sova radi muke koju je pritrpi. Drugo da ni uspija rasparat na stinu kombinezon na guzici i da je bidan potribu učini u gače pa da je da prostie mora doma doč posrani gač …i treče …da je ovo sve moj prijatej Mačak izventa da bi se mi mogli smijat.
Ko zna pravu istinu neka mi javi. Zdravi i veseli bili štioci moji pozdravja vas vaš morski čovik Šangarelo.