I NI JIN LAKO

Ošervacije iz moga Kantuna

piše: Jadran Šantić Šangarelo
Mislija san da dok ne dojden na more neču ništa notat o stvariman oko mene. Ma ke, nemore se nemore se, triba o svemu lipo promislit i istini za voju javno notavat.

Jo judi moji koliko je bilo u zanje vrime politički barufa moglo bi se lipo na kartu metnit barenko za dva lipa romana. Puno me tega snervalo da nisan moga sve lipo smistit di triba. Evo san se odluči pa ća bude.

U mladosti san uvik sanja da ču postat anarkišta ka pokojni stric Smoje ma nisan uspija jerbo su me životni puti i stranputice vodile u druge vode. Evo danas kad san več ostari i dobro priša po stogodišnjega vika mislin da bi triba pronač muda i postat anarkišta barenko na kartu.

Evo moran odma istaknit da san u našoj novoj povisti bi uvik kontra vlasti i njezini lopovluka pa kojoj god stranki pripadali. Uvik san sta na prvu crtu bojišnice kako one kontra dušmani u prošlemu ratu tako i kontra oni koji su sijali mržnju meju Hrvatiman.

Bija san kontra oni koji su kreli od naroda i države pa i kontra oni koji nisu svjesni da su glupi i da neznaju pa u svojin imbecilnin potezima uništavaju sve od prošlosti, priko sadašnjosti i  do budučnosti nas i naše dice i njiove dice.

Tija bi se u ovemu notavanju barenko dotaknit niki sramotni stvari kako ove tako i one prošle vlasti. Za vrime one prošle vlasti a koje ZNA SE dilili su se podobniman a bome i rodbini krediti  sa malešnin kamataman bez ikakvi pokriča za vračanje i to u pustin miljuniman pa ji tako niko ni ni vratija.

Poza tin su se kupovale makinje koje su strašnon silon od kamenjara kojega su drobili u papar i napravili plodne lipe zemje za posadit lozje i masline. Da bi na kraju ka velikon magijon Davida Koperfilda nestali u vidu magle a kako to naša mafija čini niko jin ne more uč u trag.

Pojedinciman koji su svoj kapital „teškon mukon i poštenin radon stekli“ tin makinjan su napravjeni tereni koje su ka zaslužni građani i borci za pravdu i poštenje na porvoj crti demokratske marčapije dobili u koncesije a od koga bome od ove jadne i pokradene države za vike vikova amen.

I sad ono ća me najviše bode a to je da se u rvackemu narodnomen teatru glumce malo plača a sa druge strane jemamo najžešču teatarsku scenu na svitu u našemen državnomen saboru. Jeman prijedlog a taj je skroz zatvorimo i ka kulturnu instituciju izbrišemo narodno kazalište i njegov posal, to priselimu u sabor sa svon programskon šemon pa se mislin da bi onda zbog prošireni uloga u sabornici ka na najjačon pozornici uvik svi sidili a ne samo nji pet šest kaća se vidi na TV skoro uvik .

To bi bilo jako dobro jerbo in ne bi tribali davat plače ka glumciman jerbo su jin i sad ionako velike a za nji ništa pametno i pošteno ne radu vengo samo glumataju demokraciju i to nakaradnon karačinon i vriđanjen.

Ka bivši sindikališta iz onega prošlega sustava moran se ošervat na ove naše današnje sindikate a posebno na one individue ča njiman upravjaju. Je moran priznat da je meni bilo puno lakše jerbo san ja jema samo brigu za osigurat dobru zimnicu i koji izlet priko godine pa i feštu za AFŽ joli za prvi maja, a ovima je danas odavna skuvana manistra (ća bi rekli u nas u Split) i ni jin lako.

Ma jopet moran istaknit da je u lipoj našon radnička klaša dobro prošla jerbo su jin svi sindikalni prvaci vrsni artišti umitnici i univerzalci koji se u sve razumidu a bome moran istaknit i to da se najboje razumidu kako sebi dat velike plače, a raju ko jebe jer najvažnije je pritit ovoj jadnoj siromašnoj državi i raznin štrajkoviman krest joj još više onega ča ionako nima a to su pokradeni pinezi pa narod dovodit do zida jada i nevoje ka da njiman ova država ni njiova vengo dušmanska.

Moran naglasit da se triba uvik angažirat u borbi kontra nesposobne i loše vlasti, da lupeže iz vlasti bilo koje triba zatvorit po prežuniman i kjuče bacit u sinje more i da triba smišljeno podržavat samo one poteze koji se ćinidu za dobro judi i države.

Evo ka šaka u joko stranka na vlasti kupuje 1600 novi tonoibili i to bome ne svakakvi nego samo oni najskupji i to puste Audije koje tiaruju cila krda  jaki konji a ceste čupadu sa sva četiri kola ka da su vojni đipi i taj potez naš vrli premijer brani.

More bit da su se naši visoki pulitičari i prin ulizanja u pulitiku vozili u velikin merđama, benburama i šta ti ja znan kojin sve poznatin autiman pa je judima naormalno da jin i država daje najskupje aute.

U Finskoj i Norveškoj prisidnik vlade na posal gre na bičikleti a u nas je prošlega tribalo vozit u blindiranomen BMV-u ni ovi sad ni skromniji samo njegov ni blindiran.

Ča bi ja učini? Ja bi sviman ukinija tonobile i reka judi moji jemate velike plače vozite se svojin tonobiliman a državni tonobil joli limozinu bi dopustija koristit samo prešidentu države, prešidentu vlade i  sabora i to samo u službene svrhe.

Moran istaknit da smo u doba „Mraka“ jemali mukte skulu, likare i likove ka i ličenje u bolnican, a danas če nas dovest pri vrimena na šematorije jerbo nečemo jemat pinez za kupovat skupe likove da bi barenko malo produjili ovu jadnu starost a nji je svaki dan sve više.

Ja jednostavno ne mogu razumit bahatost koju ispoljavaju naši pulitičari i to bez obzira kojoj stranki pripadaju pa za to prominit pridlažen da se nemore postat pulitičar bez posebne izobrazbe i to iz lipega ponašanja, poštenja, poštivanja naroda jerbo te narod i izabra i na kraju bi tribalo za svaku falingu pulitičare meknit u prežun na prisilni rad da tučedu stinje velikin macan  i da živedu samo o kruva i vode.

Mislin da  bi onda sa takin primjerima poza nji teško kome palo na pamet da ča zajebe. Skoro san zaudobi a bila bi velika falinga da se nisan sitija šjor Karamarka onega našega velikega borca za Tuđmanovu rvacku koji puno govori a justa mu se ne miču i ne otvaradu njanka malo.

Judi moji koji je to smišan čovik ma bome i jako je elokventan  ka i svi oni veliki povjesničari di je na čelu kolone bija Tuđman pa ka taki kapacitet ni u stanju nikad ništa falit a najskoli krivo reč oli ti učinit.

On je doša u situaciju da nas ponovo  na svojin partijskin skupoviman truje zavadama i poziva na rat još je izjavija da bi one pogrde koje su izmilile ispod neznan kojega kamena di se sakrivaju uvik vodi sa sebon da mu na njegovin velebnin skupoviman dižu pozitivnu atmosferu.

Pa da to ni za poludit stvarno su ti špijuni skroz u možjaniman inberlani pa uvik proizvode joli vanjske joli unutrašnje neprijateje a kako piše u fojiman i kontra zakona zapošljavaju jude na poslove o sigurnosti države.

Evo radi usporedbe i šjor Putin je bi špijun i to u oni veliki KGB i  njega se u veliku majčicu Rusiju svi bojidu a sad je objavi kako pišu foji i rat Ukrajini.

Jadnega svita ka da jin ni dosta ča su zla sami sebi učinili dok su se borili da onega lupeža Janukoviča potiraju. Kako mislin da san doša do kraja jerbo bi da notan još čako ispalija na živce štioci dragi mislin da je i ovo dosta pa vas sve pozdravja…

vaš morski čovik Šangarelo.