Dubravka Borić
Iz zemjie škrte,
Iz zemjie žiedne,
rodiš
da hroniš
zrnjen svojin
crnin,
crjenin,
bilin,
modrin.
Iz zemjie trudne,
iz zemjie potne,
rodiš
da pije se
vino tvoje
na veselon fešti
kad se krsti,
i pričesti,
za krizme,
ženidbe,
godišnjice,
fraje,
imendone,
rojendone,
uz pisme,
uz bale.
Kad se slavi
kroj od skule,
kad se slavi
nikie krune,
kad dobiješ nenodno
špor´sku sedmicu,
kad pogodiš bruojke lota
i takneš u zvizdu sritnu.
Pisma soma
kruži, kruži …
Boga Bakha
i na služi.
Žmul za žmuluon,
u smihu se pije.
Vesieje i smih
vino ti potpire.
Vino …vino…
crno …bilo …
majko svita si napilo!
I lutalicu,
beskućnika,
u nevoju bočenoga,
samoćuon zarobjenoga..
Rojene nie
pod zvizduon nesritnom,
ča iškedu-somo posla.
Ča su žiejni-somo kruha.
Napiješ hi
Po su sritni
i zaboravidu ko su.
Jer nin s tebon
uvik lišje.
S tebon sudbu
boje snosu.
Manje poznate riječi:
potan,-na,-no- znojan, -na, -no
fešta- slavlje
fraja- konzumiranje specjaliteta ( pečenja s ražnja, s’gradela, ), slastica i sl. uz razna pića
kroj- kraj
nikie- neke
nenodno- iznenada
žmul- čaša
majko- mnogo
rojen,- na, -no –rođen, na, -no
žiejan, -na, -no –željan, -na, -no
lišje,- ljepše
IV. 2010.