Pa je prvi snig ma ni u malo vengo u velo misto
Piše: Jadran Šantić Šangarelo
Jo judi moji kad se sitin nikad mi ka ditetu ni bilo jasno kako stari judi moredu sa bolesnin kostiman i škinaman znat reč kakvo če sutra vrime. Evo san i ja ostari pa me svaka žunta boli i bome mogu i ja sad reč dva tri dana unaprid da če prominit vrime.
Ma ni mi to glavna misal vengo san tija reč kako danas ovi ča se bave prognozon jako malo falivaju. Dunkve gledan ja na moj niki novi mobilet ča su ga napravili korejci o marke Samsung kakvo če vrime i tamo lipo piše snig u subotu oko 20 centimetri.
Mislin se ja za gospu blaženu kako oni moredu unaprid izmirit ti pusti snig ča če past u naše velo misto oli metropolu. Probudin se ja za otič u kondut oko tri bota poza ponoći i jeman ča i vidit kija vanka snig sve u šesnest i gospe mi jema ga vanka i više od 30 centimetri jerbo pada sa nikin ludin vitron koji vrti sve u kolo i pravi velike kako se to reče smetove.
Sidin ja u moj kabinet i dok ovo stavjan na kartu vanka kijamet ne pristaje a mene u možjane udrilo da ovo snižno vrime povežen sa nikon zgodon sa mora.
Dobro se sičan jedne zgode sa moji starin barbon koji je plati zimsku buletu. Jedno jutro u sri zime partili nas dva dignit mrižice i parangaliće ma unda nisi moga na TV ka dans čut ča te čeka na more. Vanka je grizlo jerbo je bilo oko nule, naoblačno i uz malo nikoga ladnega vitra.
Došli smo mi na poštu o parangalići i bogami smo jemali lipi ulov o mišane oborite ribe koliko me možjani služe pari mi se da je bilo 3-4 kila u 5,6 komadi i oko 4 kila razne mišance za juvu i pofrigat.
Partili mi na drugu poštu izvadit mrižice a ono ka za dišpet počelo sramežljivo padat sa neba ladna kišica. Ča čemo moramo ča pri obavit posal i nazad u porat da nas nevrime ne bi uvatilo. Vadili smo mrižice ča smo brže mogli i nako ji nabacali na pokaporat o prove.
Kako je barba uvik sidi na provu i ti dan za nevoju je opet sija na svoje misto. Ma kako navoja nikad ni sama i ti put je kiša prišla u snig i to sau padali lopari da se ni vidilo prst prid noson.
Približija se ja uz obalu i polako da ušto ne udren vozin nas u porat ma to se odujilo, počelo je sve smrzavat i tako su se momen barbi gače o kabanice smrzle i zalipile za pokaporat o prove.
Ništa mi još ne znamo ma kad smo takali uz rivu nasta je cirkus. Ja ka mlaju skoči priveži brod i kad san ga osigura govorin ja barbi ajmo mi lipo doma sa ovin krtolon ribe o parangala a ja ču se vratit sa karijolon i donit mrižice u konobu i onda je nasta pakal.
Prova se barba dignit ma kako se zalipija o leda nemore, potiže on gače sa svon forco ma led ne pušča i njega je uvatila panika.
-Ajme ništo mi neda sa kajiča, ajme došle su morske štringe da me zarobu i da krepan ovod u kajić o studeni, Jadro molin te spasi svoga barbu …a mene je pored sve muke uvatija smij da san se skoro zacenija.
Kad je on vidija da se ja smijen popizdi je i počeja sovat boga materina i čaćina ti češ se smijat staremu čoviku kad me vrag odnese odozgora ču ti se refat neš jemat mira ni na moru ni na zemji zapameti razbojniće muzuviru jedan.
Ja san malo doša sebi i skoči san u kajič ma mu lipo govorin barba moj dragi samo su ti se gače o kabanice zalipile o leda za provu ajmo ji svuč i lipo partit doma na rakiju i marendin.Gleda o ume i počne drišit kurdilu o gača, ja mu lipo pomognen i polako ga izveden iz kajića.
Nosin ja krtol sa ribon a on muči i u nika doba stade sta i ja a on če meni molin te Jadro nikomen ovu sramotu da nisi reka a tvoj če ti se barba refat dobrin zato.
Lipo smo mi došli doma popili lipu travaricu poslin je teta pofrigala ribu i nas dva smo blagovali ma pala je i pisma a o morskon štringan nisan nikomen reka ni besidu do sada.Eto bome san se uspija sitit i tega nevojkoga događaja sa snigon na moru.
Zdravi i veseli bili štioci moji pozdravja vas vaš morski čovik Šangarelo iz snigon zametenoga lipega Zagreba.