RAMBOVI CIPLI I FUNCUTARIJA

ŠTORIJE IZ MALOG MISTA
piše: Jadran Šantić Šangarelo
Jo judi moji koji se sve mirakuli događaju pa to ti je da ti pamet stane. Dok san bija zarobjen zimon i zmskin radostiman sniga i planinarenja gori u Zagreb stalno san pensa o moru lipoti ugođaja sunca ribe i ribanja. Najpri san okusija vonje Dalmacije oko Uskrsa  pa san se vrati u Zagreb i poza tin za prvi maja nazad na more najlipše more na svitu i okolici naše Jadransko more.

Lipo san bome sletija ka lastavica i počeja sa sojin morskin zanimacijaman. Najpri san počeja uređivat brod i spremat ga za bacit u more,pa san onda lipo prigleda sve moje ribarske arte i pričeka lipo vrime pa san brod stavija u more i jedva čeka da oden bacit parangal. Ma uvik kad se ništo lipo isplanira onda ti ka za đavla ništo poremeti planove, tako i meni. Judi moji u po maja miseca udrilo nevrime ka da je vrime o zime a ne na pragu lita. Pusti vitar grmjavina kiša a bože mi oprosti u Zagreb i cilu unutrašnjost snig. Je dobroste proštili snig, ma koji snig dabi ga jemalo15 centimetri.

Zaladilo mora se obučivat zimska roba dugi rukavi kabanice ma jedina dobra stvar od ove kiše na more je da je zalila lozje, masline i svu ostalu verduru pa če ako sve gre u redu bit svake obilance a nadan se i lipega našega Dalmatinskega maslinova uja. E nisan ja ovo u uvodu pisa ka bez veze sve jema svoje pa i ova štorija i našega malega mista. Lipa vrimena oko prvega maja su učinila čuda u ribarščini jerbo su se cipli putnici žutoklepci lovili ka ludi u mrižice a tu su bandiru nosili Osvit Radić zvani Baletić po didu i Jure šutić Zvani Rambo. U par dan su izvadili priko 10 kili lipi cipli a kako je bila misečina lipo su se na parangal lovili i moli zlatari a tu je pridnjači moj dragi prijatej  Kristijan Mirko zvani Krišto koji je sa svojon družinon od dva sina Mikijen i Basin ulovi bome lipe pize moli i sve je Miki lipo na malešnu našu peškariju proda. Ma uza sve to i ja san doživi prosvitljenje i saznanje da ona stara „ ne viruj Danajciman i kad darove nose „ stoji jerbo san i ja bi maliciozan i povirova u darove.

Dunkve bilo je vako. Oni gori spomenuti farabut Rambo je odi na more bacit mrižice na ciple i sutra ujutro kad se vrati lipo je u stari porad di vezije svoj kajić čistija mrižice a bome je bi lipo ulovi. Ja san bi u Malo misto na travaricu kad mezove Osvit i avizaje me da me zove Rambo. Oden ja do Ramba a on me pita koliko mi cipli triba i dače mi dat ja bubnen 4 i on ji izbaci iz kajića na mul. Kad san ji izvaga u malo misto bilo je obilate vage kilo. Popila se travaricai ja vazmen ribu i gren doma a moj prijatej i susid Đeki me aviza da me Rambo zva u Karaku.

Mislin se ja oli se čuda događaju ma isto u sumnji dojden do njega a on zove konobaricu i ka iz puše Šangarelo če platit naše pive jerbo su bili dvojica on i njegov kumpanjo koji su drmnili 4 pive i to je bi račun od 40 kun. Kilo cipli na peškariju dojde 30 kun a ispada da san ja ka mona oni poklonjeni kil od  onega pokvarenjaka Ramba plati 40 eto to van je ono sa Danajciman. Rekla bi moja pokojna Nona ko ne plati kurbu plati likara.

E moji štioci dragi ova van je barufa došla meni ka niko zagrijavanje a ja san nsija jerbo san bi ka u zmskomen snu ma moran se probudit da me opet koko ne natrče. Za sada tliko i kratko pozdravja vas vaš morski čovik Šangarelo i zdravi i veseli bili svugdi na svitu di se zateknete .