Dubravka Borić
Prid vrotima skule
veli tapiet
od morske strune.
Na mista tanak, isfrižon,
iscufon, izbužon,
od zemjie išporkon.
(A i šjuola, brž, prinila s’ štrode
čaguod od tovara,
za činit šenjode.)
Zacrjeni od kupe,
pobili od krede ,
ča smo je čuvali
za crtat cigarele.
Zno je bit
blientav i mokar
od kapjih s’ incerodih
i crne lumbrele.
Diguod bi zavonjo
s kruhon iz peknjice,
ča bi unefol po
ditetu iz ručice.
Kontreštovat se, tantat,
orcat, dišpetat, faštižjat, hlepiešćit se, rugat …
somo podvornice zvono
muoglo je brenzat:
„Briši nogeee!
Nogeee briišiii!
Djeco! Natrag!
Noge brisat!!!
Prid vrotima skule
dovna nesto
tapiet od strune.
Š’ njega smo se, ko rakova dica,
od skule razbižali.
Za infate, otuol smo se još jedon put
mi bili sastali.
Nismo se konteštrovali,
ni faštižjali.
Skupa smo zapivoli,
zasvirili, zabalali.
I opet se- razbižali.
Svak na svuoj put.
Ko zno di,
ko zno kud.
XI..2002.
Manje poznate riječi:
tapiet- tepih
skula- škola
iscufon- očuperan
izbužon-izrupan
išporkon- isprljan
šjuola- potplat, đon
štroda-pokamenjena ulica
čaguod- nešto
tovor- magarac
šenjode- cirkusarije
kupa- crijep
cigarela-dječja društvena igra
blientav- glibav
inceroda- plastična kabanica
lumbrela-kišobran
– ponekad
zavonjat- zamirisati
peknjica- krušna peć
ča- što
unefol- slučajno
kontreštovat se- suprostavljati se
tantat- izazivati
orcat- ljutiti se
dišpetat-kontrirati, suprotno reagirati
faštižjat- nervirati
hlepiešćit se- grohotom se smijati
podvornica- školska pomoćnica koja zvoni za početak i završetak školskog sata,
čisti prostorije, pazi na red …
brenzat- zaustaviti
za infate-izraz:za reći istinu,istini u oči, uistinu
otuo(t)l- tu
zabalat-zaplesati