Piše: Jadran Šantić Šangarelo
Kroz cilo ovo vrime dok san vezan za kuču i štake i dok nemogu vanka odit koliko bi tija stalno me na pamet pada ajde napiši čakod pametno. Ma ni lako staremu čoviku pisat puno pametne stvari jerbo je rojen u drugo vrime i jerbo ga je do sada novo vrime prigazilo, ma isto me palo na pamet da bi ka Grački zet triba notat nike važne stvari na kartu oču reč na ovu makinjetu o letrike o temu lipemu Dalmatinskemu mistu u kojemu živen priko lita več 9 godin i koje mi je ulizlo pod kožu.
Neznan štioci dragi znate li di je Gradac i to Dalmatinski? Zašto Dalmatinski, zato jerbo jema još misti koja se zovedu Gradac ma nisu na more ni u prilipu Dalmaciju. I sad ču van ja provat pojasnit nike stvari o temu malemu Dalmatinskemu mistu, mistu koje je je prin dvi godine proslavilo jušto 100 godin bavjenja turizmon.
Nije to mala stvar jerbo je prvi hotel koji se zva „LAVČENJ“ bija na rivu u Gradac. Kako su se vrimena minjala ma i nazivi država u kojiman je Gradac živija svoje turističke dane došlo je i ovo novo vrime u kojemu je kako se reče ustroj lokalne uprave promini puno tega.
Kad se slavija ti jubilej slavija se je ka 100 godin turizma u općini Gradac iako sva ostala mista nisu jemala tu tradiciju i zasluge ma ma kako je u Gradac na vlasti ZNA SE ko oni su donili tu odluku i gotovo.
Ni to bija veliki feler ma nike jude je najutilo jerbo nije poštivan osnovni običaj da se na take fešte pozovedu nasljednici oni koji su jemali prvi hotel i to dans žive članove fameje MILOŠEVIĆ.
Zašto san ovo nota u uvodu, zato jerbo od turizma danas žive 90% stanovnik Graca. E sad ajmo malo daje i to o nečemu ča je jušto na obrazu Graca na samoj obali mora. Gradac jema dva mala porta jedan stari i jedan novijega datuma.
Kako Gradac jema skoro 5 kilometri plaže u samemu mistu a bome je u ona doba mraka jema i kapacitete za smistit barenko 10.000 turisti. Rat je učini svoje pa je zahvaljujuči domačin štakoriman jer u Gradac rata stvarnega ni bilo (ako ne računamo domojubno rušenje partizanskega spomenika koji je bi viši o kampanela u režiji tadašnjega fratra i naši vrli bojovnikov iz jedne dalmatinske brigade) a bome i velikin dilon i izbjeglicama devastiran veliki dil turistički kapaciteti.
Kao se u ovemu slučaju radi o odmaralištiman koja su u vlasništvu drugi držav iz bivše Juge njiovi vlasnici ne poduzimaju ništa da se to ruglo ovega lipega mista promini. Ne bi tija grišit dušu ma isto mislin da je općinska vlast na tu temu inertna i da ne poduzima baš sve da u dogovoru sa vlastiman iz metropole nešto prominu.
I sad se opet moran ošervat na prije rečene male porte. U tin portiman vlada totalni nered, anarhijai bezvlašče. Od priko 50 brodi kjoji su vezani u oba porta niko ne plača vez u portiman cilu godinu a kad nan se ukaže lito onda se na jednemu dilu novega porta naplačije vez za desetak brodic i to samo za tri miseca pa domači koji koriste porte cilu godinu nas koji plačamo smatraju monama.
Ča se tiče dolaska strani brodi to je več štorija zase ,oni kad dojdu nimaju di akoštat niti jin se more ponudit siguran vez a moredu se samo usidrit ispri poprta i tamo jin niko ne naplačije ništa.
Godine 2009 izaša je novi zakon koji je obaveza lokalne uprave da reguliraju naplatu vezov ma u Gradac je to ostalo mrtvo slovo na kartu.
Ja san bi intervenira sa par pisam i ministarstvu pomorstva i županijskoj lučkoj upravi u Split i jopet ni bilo njanka odgovora a u Gračkomen portu i daje vlada bezakonje. Jemali smo mogučnost a za što i postoje planovi i škice dok se radija dil autoputa kraj Vrgorca dobit kamen ti osnovni materijal i nasut 200-300 metri mula pa ga uz pomoč drževni šolad polako završavat i dobit lipi lukobran ma bome i lipu marinu koja bi zadovojila sve od domaći judi koji jemadu male kajiče pa do brodi koji bi zimovali a i u doba turističke sezone bi se nautičari jemali di vezivat, prikjučit letriku i vodu pa bi se moglo zaposlit i dva tri domača čovika koji bi to sve kontrolirali i naplačivali.
Jo koja bi to lipota onda bila. Isprid lipega Graca lipo stivana jidra i visoki jarboleti jahte lukobran pun svitlapo noći i ča je najvažnije još turistički šolad u blagajnu mista. Skoro san zaudobija da priko cilega lita u Grački porat dolazidu i pusti turistički brodi koji se nimaju di pošteno vezat pa bi izgradnjon lukobrana i marine i taj dil turističke ponude jema soj pravi tretman a bome i dobru naplatu u portu.
Puno san razmišlja zašto naša Općina nije ništa po temu napravila pa san doša do zakjučka da bi stranka na vlasti izgubila biračko tilo ako bi se u porte unija red i plačanje vezov i mislin da je to uzrok a ako ni nak mi bude oprošteno ako san zgrišija.
Provat ču ovu štoriju poslat i u ministarstvo mora jerbo ono isto ništa ne radi po temu problemu a sigurno bi radilo više da su gospoda na čelu sa ministron ustoličeni u Split a ne u Zagreb.
Poslat ču ovu štoriju i u Županijsku lučku upravu i čekat oče li se ko udostojit odgovorit dvi tri beside. Sa me palo još napamet da u cilemu Neretvanskemu kanalu sa obe strane ni na Pelješac a ni na kopnu nima poštene marine i to bi tribalo one gori u Zagreb zamislit i da jin iz guzice u glavu dojde pa da počnu po temu problemu ništo radit.
Kako san van reka na početku nemore stari čovik koji je izlapi napisat ništo pametno ma ja isto mislin da ovo sve ča san ode nota ni za bacit u škovace. Eto štioci moji sad mi je duša na mistu i jako san kuntenat sa ovin ča san nota pa vas lipo pozdravjam i živi i veseli bili želi van vaš morski čovik Šangarelo.