piše: Jadran Šantić Šangarelo
Jutro u naše lipo malo misto ka i svako kad nima kiše joli leda i isprid našega najpopularnijega kafića „KARAKA „ sidi jarpa svita.
Lipo i teplo jutro babjega lita okupano suncon koje je netom izvirilo iznad GRABOVICE i okupalo dvi prilipe vale našega malega lipega i smišnega mista judi u kratke rukave i kratke gače do kolini guštaju višje vengo u sri lita jerbo nima turisti i šušura a jopet ni ni privruče.
Jo judi koji su to gušti ča bi reka pokojni stric SMOJE pa unda ko to more platit jerbo vaki godimenti nima na cilu balotu zemajsku ma i puno širje. Za svakin stolon maša lokalaca pripovida svoje teme i niko se ne miša u tuđe posle osin ako ni na vidiku kakva zajebancija joli ništo o zajednički interesi. I u temu svakodnevnome smirenon šušuru odjedanput jedan ča je šeta po mulu uzvikne ajme judi ča je ono na more ?
A kako je naša glavna vala otvorena sva prema Pelješcu sa mula sve se vidi i to o čemu je zavika dotični pa sad ga vidiš sad ga ne vidiš ma jopet se nezna ča je.
Svi se digli ka na zapovid od stoli i naguravajući se po mulu svak jema svoju teoriju o temu ča vide. Jedni su za krepanega dupina drugi za bokun velikega stabla ča je dovuka kurenat iz NERETVE a treči koji su se ka najboje zagledali dreknu, ajte kvragu vi i driva i dupini pa zar van možjani ne radidu ? Zar nemorete lipo sa svojin očiman vidit da je to mrtva oli izblesirana kornjača oliti morski veliki škornjak kako ga se ono zove GLAVATA ŽELVA.
Ova besida je svi poljuljala u njiovin viđenjiman a još ka je dotični reka stručni termin ni bilo višje sumnje, svi su se složili je bome velika kornjača. Kako je kurenat bi jak a bilo je i bokun mora ti perdmet joli beštija ča je pluta na more sad bi se vidija sad ne bi i dok su svi davali svoje velevažne izjave jedan se dositi da bi tribalo poč sa kajičen i doteglit tu beštiju u kraj, pa unda zvat Oceanografski Institut u SPLIT da oni pošajedu stručnjaka najboje doktora SOLDU koji će bidnu beštiju stručno vižitat i lipo dat dijagnozu zašto je bidna beštija izgubila život.
Kako u takvemu konfužjunu jema uvik svega odma su se niki zakarali jerbo se nisu mogli dogovorit ko jema boji i jači kajič i sa čijin bi se kajičon tegalj mrtve beštije moga najboje obavit. Tu su padale i teške riči pa su se nji dva tri i pokarali i pokupili se doma a oni ča su ostali mudro su se dogovorili da bi bilo najboje vazest najjači kajič i sa njin obavit tegalj.
Poslin deboto dvi ure natezanja i pametovanja a da ne rečen i prodavanja muda za bubrige učinili su plan i krenili u avanturu. Kako je oni jedan ča se zakara parti doma a on jema najboji kajič odredilo se pregovarača jednega njegova rođaka da ga on nagovori da se vrati i da obavu tu važnu misiju.
Kako su kurenti ča dolazidu iz NERETVE jaki a niki gradu i do 4 milje na uru more je odnilo fantomsku kornjaču prema uvali BOŠAC iza glavnega mula pa je tribalo uprišit.
U nika doba se pojavi oni ča se štica i partili se prema njgovu brodu i eto ti jopet škandala. Svi su tili u brod pomagat vezat i dovuč u teglju kornjaču ma kako svi nemoredu stat u brod digla se dreka ko jema prav ko je prvi ko je jači, ko je žveltiji i tako. U nika doba poslin gledanja tega cirkusa drekne gazda o broda ajte kvragu svi gren ja sam i niko mi na brod ne triba i da se niko ni usudi stat nogon u moj brod.
Tako je i učini a ekipa ča je ostala ka posrana na mulu počela je jopet žugar ronjat i brontulavat kontra vlasnika o broda, ka koji je on faktor pa ko mu je da prav da zapovida, pa on je kilav neče moč sve sam i tako dok ji jedan stari koji je cilo vrime muča i gleta cili ti konfužjun ne ispali itac i dreknija ajte kvragu vi i vaši škandali pa kako morete take monade balit a svi jemate godin u guzici a pameti i možjani nigdi, umuknite više jerbo ste mi glavu napunili pizdarijan. Svi pogledaju starega i gospe mi radi rešpekta i njegovi godin umuknu.
Kroz to vrime se oni sa brodon počeja vračat u porat bez teglja i suje u sav glas svi su se zacenili o čuda jerbo nisu kapili ča se događa. Jeba van pas čunku van i kornjači ajte lovit rake govnare blentonje čorave ma kakva kornjača ono je rika izbacila vanjsku gumu od dampera a ne nikakvu beštiju.
Kad se je veza za rivu da ga odobrovoje par nji su platili turu pića i sve je jopet bilo u redu ma kako kurenti stalno rade livo desno ona guma je sutra u jutro osvanila nasukana na lipemu bilemu žalu ma naše glavne vale ma ovi put je niko ni obada jerbo je sviman krnila na nos a da o zajebanciji koja je nastala u naše malo misto da i ne govorin.
Eto takva su van naša mala smišna i lipa Dalmatinska mista i njiovi judi. Uvik su spremni za barufu pa za zajebanciju pa velike škandale na jeziku ma nikad joli ritko kad da niko na nikoga nasrne fizički i digne ruku, i sutra jopet svak sa savkin razminije beside o ribarščini športu ma i o šprkarijaman iz mista i sve gre svojin uhodanin tokon.
Jo lipa li je i puna duha ta moja DALMACIJA i njezina mala mista.
Eto štioci moji tako van je od gume dampera postala kornjača koje ni bilo .
Živi i veseli bili pozdravja vas vaš morski čovik Šangarelo.