Piše: Jadran Šantić Šangarelo
Sad će se neki zapitati …oli je ovi Šangarelo pošandrca pa je počeja pisat svakakve pizdarije, a bome nisu to pizdarije vengo jako juske i ozbiljne stvari.
Evo me misec dan u Krapinske toplice na terapiju jerbo san promini kolino i stalno san u istu komoru di spimo trojica. Stalno se niko minja a ja san bome konstanta.
Bilo je samenon razni likova ma gospemi ovakovi ka ovi zadnji nijedan a zove se Andrej jerbo je rojen u Sloveniju i mater mu je Slovenka.
Zašto pišen ovu štoriju ? Zato jerbo se sve napisane vridnosti kontra duvana i pušenja moredu sorit samo sa vojon jednega malešnega čovika. Ovi moj je iz Nove Gradiške jako smišan tip.
Mali raston ma bome da ga strefi bura diko na mulu u Dalmaciju ako ni jema u žepe matuni odnila bi ga u more, ja mislin da sa postoliman i robon nima 50 kili.
Sače opet niko reč pa ča sve to jema veze sa naslovon? Jema jema jerbo ti moj novi cimer je največa fugera ča san je vidija nima u njega straja od leda zime oli sniga kad ga strefi u možjane on se obučije i na balkon udri dimi.
I to ni samo po danu vengo i po noči a najžešći je izjutra oko 6 uri. Puca vanka drivo o leda ma moj cimer je ka baščelik neda on svoj španjulet i gotovo.
Kako je i on svrši ispo noža i operira je kuk mora svaki put vazest štake i sa njiman na teracu da bi moga zafumat.
Govorin mu ja nesriknjače nesriknji umrit češ o leda …jebeš duvan baci to, to ti je najžešči otrov.
-A, a, a… pusti ti tu filozofiju o ščetnosti …vidi mene fuman po tri do četri škatule i još san kripan i okretan.
Jema jedna stvar po pitanju vonji i kad on dođe do koga ko ne fuma ovemu prisidne jerbo ga smrad o španjuleti ubije, a ja mislin da ovega moga cimera ni komarac ni ugriza dabi 25 godin jerbo bi se i komarac otrova od nikotina.
I tako ja vodin borbu sa njin a on meni kontru i sad san ja doša do zakjučka da pojedini pripadnici juske vrsti moredu i umrit ma duvan neće molat.
Da se ja nebi zavadi sa mojin cimeron jerbo je osin duvana dobar duševan i sa njin se da lipo divanit još ču mu koji put zabrontulat a kako sutra gren doma on če odanit jerbo ga neče jemat ko zajebavat.
I tako moji štioci dragi sad čemo ka novu maksimu izvuč oni gori naslov:
-ŽIVITI SE NE MORA PUŠITI SE MORA (pa ko ča popuši an)