OVO JE DA ČOVIK POREMBAMBI

Jadran Šantić Šangarelo
Judi moji ja van se moran ošervat o ovin ludin i nebuloznin stvariman ča nan ji svakodnevno serviraju rukovodeće face stranke ZNA SE i njiovi uspavani sateliti koji uzletu samo onda kad triba odradit šporka posla kontra legalno izabrane vlasti.

Ja san mislija da nan je sviman dosta i crni i crveni a posebno oni crni. Ma ke jopet su se pojavile aveti prošlosti ma sada otvoreno priteći vladajučiman a pritnja je došla u vidu osoba obučeni u crne jakete kupjene samo za tu manifestaciju odavanja pijeteta žrtvama Vukovara i od oni koji bespravno obučiju ratne odore iaoko je rat davno završi.

Ne znan dali znaju, a sigurno znaju, da postoji i zakon kad se razvojačeni moredu obučivat u vojne odore.

Zašto van ovo pripovidan?

Zato ča me je duša zabolila gledajući u gradu Heroju Vukovaru onu sramotu koju su ciloj zemji nako bezobrazno nanili oni iz tamo nikega fantomskega stožera za pridpostavit je uz podršku vrhuške bivše stranke na vlasti šjor Karamarkon i njegovin vjernin Vason.

Cili svit je odma vidija sramotu koju su oni režirali da bi obezvrijedili državni vrj i dali mu do znanja da su spremni i rušiti legalnu vlast svin mogučin sredstviman a uz put su udrili trisku cilemu diplomatskemu koru koji je bi zajedno sa državnin vrjon.

Ma ja mislin da naš narod ni mona i već će jin u brk reč NO PASARAN. Naman  triba mira rada i kruva a ne diktatura koju je spremna postavit CAMICHA NERA. Ovo van je dragi štioci bi uvod u ono još gore ća se u lipoj našoj događa.

Država je dužna ća bi u nas u Dalmaciju prin rekli ka Grčka. Ma danas je Grčka upala u velika govna ma gospe mi ni mi nismo daleko i dok bi narod triba bit svjestan da triba na svaku bužu štedit pojajuju se „ velike moralne vertikale“ koje od države iščedu nike famozne i nebulozne „REFERENDUME“.

Svi ti „DOMOLJUBI“ i falši moralisti koje svesrdno potiče i podržava bivša stranka na vlasti čije je rukovodstvo mahom zaposjelo apartmane u Remetincu te naš visoko a bome i nisko pozicionirani kler svojim „ DOMOLJUBNIM“ rabotaman iz državne kase kredu puste miljune kuna jerbo se svi ti referendumi nemogu učinit mukte.

Jo judi moji pa di to jema? Nigdi na cilu balotu zemajsku osin u lipu našu. E ajmo redon …

Gospođa Markić koja je postala straža o stine u obrani obitelji a pod pokrovitejstvon one strančice velega imena HRAST nije jemala kad prin doč do samega Svetoga oca Frane i njemu podnit befel ča ona i crkva u Hrvata rade da ji ne bi izili pederi i lezbe i onda više ne bi bilo prave rvacke fameje od muška i ženska a bome bi se i potomstvo osulo. Pa zar to ni nebuloza?!

E a sad gremo daje za ti fanatično branjeni dnevni uradak kojega jopet svesrdno podržavaju crkveni poglavari i još listom ZNA SE ko. Našu jadnu državu to košta ni manje ni više vengo 42 miljuna kun. Ta ista gospođa na čelu kolone sa svojin velikin moralnin vridnostiman kupuje od crikve ispod cine zemju na lipemu požicjunu na otoku Šipanu uz more i nelegalno gradi „ SKROMNU“  kućicu sa malonogometnin igrališten i ne benda zakone jer njezin moralni kodeks je jači od svi zakoni kad je crkva podržava.

Isto tako i oni njezin dobarjaktar po zanimanju fiškal koji se razumi u zakone radi iste teke rabote bez straja da če platit buletu prid zakonon i on gradi bez dozvola. I ajde vi meni spjegajte ko je ovod lud? Da ne bi čakod priskočija moran se dotaknit još jednega „FANTOMSKEGA REFERENDUMA“.

Kako je oni “STOŽER“ u Vukovaru sastavjen od sami stručnjakov o svi struka i zanata a ne samo od branitelji i ratnikov odma se poslin sramočenja državnega vrja i diplomatski predstavnikov udrili u nove talambase i to protiv ustavnega zakona o dvojezičnosti kojega je izglasa, a ko ZNA SE. Več su se vridni judi ka mravi razletili po svin mistiman lipe naše dobili štandove za sakupjanje potpisi ( ko štandove i sakupjače plača ne znan) i samo jude zovu na potpise na referendum di bi tribalo u USTAV ugradit da se dvojezičnost joli ćirilica u Vukovar more na tabelan notat samo  kad tamo bude živilo 50% i više Srba.

Asti miša malega pa unda oni nećedu više bit manjina vengo večina a mi Hrvati gremo u opoziciju joli ti manjinu. Jo koji su to umovi veliki smislili da mi je samo znat odma bi jin nota lipu štoriju zahvale za promučurnost u obrani našega identiteta i opstojnosti hrvatskega naroda.

Kako štorija ovod ni gotova triba još istaknit i financijske stavke jerbo se ni ovi referendum ne more učinit bez pusti miljuni kun a naši dežurni čuvari nacije i pisma,  čudoređa i obitelji znaju da država ka svaka krava muzara jema „VIŠKA“ pinez pa ji boli briga važno je da se referendumi održe lipo pošteno i po zakonu.

Ja mislin da idejne tvorce ovi izneseni nebuloza triba stavit na promatranje pod veliko povečalo i pokušat jin dat dijagnozu. Evo ja ka agnostik molin boga da jin providi bokun pameti i da svate kako ne smidu svoju zemju za koju su se niki borili i krv prolivali vako bezočno uništavat trošit pineze koji nima i drugin  judiman siromajiman otkidat od justa.

Evo na možjane me pala jedna sitnica. Čitan u našu lipu Slobodnu Dalmaciju četvrtkon u tribini odgovor šjor Luke Podruga časnega prvaka velike Čiste stranke prava koji šaje našemu smišnemu i pametnemu književniku Anti Tomiću na njegov uradak o šjor Podrugu.

Šjor Ante Tomić je napisa lipi članak u kojemu je da oservacije o šjor Podrugu a ovi potonji ni mu tija ostat dužan i književno jako je odgovori. Ma isto je učini  jedan gaf a to je u svomen odgovoru opetovano napisa da smo mi u „NEZAVISNOJ DRŽAVI HRVATSKOJ“ koja je ravnopravna članica europske naddržave i tako par puta ponavja kao i „STARI HRVATSKI POZDRAV  ZA DOM SPREMNI“ kojeg on apostrofira i daje podršku sviman koji ga duperaju a zaboravja da je ti pozdrav bi simbol ustaškega pokreta za vrime endehazije. Posprdno je spomenija crveni Smojin Split samo je zaboravija da je on dotepenac u temu Splitu di se je bogami dobro snaša.

Po zakonu ove lipe naše nesmidu se isticati fašistički simboli i sve ono ča veliča fašizam no naš vrli šjor Podrug danas u 21. stolječu još živi kako sam ističe u „ NEZAVISNOJ DRŽAVI HRVATSKOJ“ .

Meni se čini da su mu se možjani poremetili a ako je u pravu ja ne znan u koju državu ja sada živen i oče li šjor Podrug odgovarat za ove izjave.

Ako je Šimunića osudila cila Europa ča je priko mikrofona vika Za dom spremni zar nije i šjor Podrug napravi isti prekršaj ča je ovo sve napisa. Ja mislin da se u svojoj opijenosti da izvriđa Antu Tomića malo zaigra ili on zna ništo ča mi ne znamo pa možda unaprid predviđa nike novine u lipoj našoj.

Evo štioci dragi več san se umori o pulitike i kojekakvi spodoba. Lipo vas pozdravja vaš morski čovik Šangarelo uz žeju da budete sritni zdravi i veseli.

0 0 votes
Article Rating

Related Post

Subscribe
Notify of
guest
0 Comments
Inline Feedbacks
View all comments