DOKLE ĆE OVO TRAJAT

autorica: Jadranka Mardešić Komac

-Barba Ante, kako šte?

-Aaa, dobro, ka ni boje, eee…

-Donila šan van malo naronči, da še malo pokripite.

-Fala in… Mandina dojdi vazmi ovo!… Sidite tot šjora Pave, na katrigu, sa′ će doć Mandina.

-E, moj šjor Ante, a nima van nikoga… a kako to?… Šve še pokvarilo, šve še pogošpodilo i nikor nikoga ne obadaje. A, ni dica, više nisu ka nikad.

-Eee, moj šjor Ante ma puno mi vaš je žaj ča van nikoga nima…

-Ma je, jema ih i uvik je nikor ovod a najskoli nedijon ka′ svi dojdedu iz Splita.

-E, moj šjor Ante, ma nima više ni pinez i šve je poškupilo. Ne moreš više ništa kupit, njanci naronču.

-Ma, šjora Pavice, bi′ će boje, a ča nan više i triba, doli dvi tri mendule i bokun kruva, oštija… Mandina, vamo dojdi, došla je šjora Pavica!

-Je, moj šjor Ante ne čuje vas… ala gren ja tamo!

-Mandina!!! Vamo dojdi i daj šjora Pavici bokun kafe joli koju galetinu! Pojdite u kužinu.

-A je, jemate prav′, vaja mi poć i štojte mi dobro. Vengo, ako van ča triba poša′jte dicu, Pa ću van ja doć da van čagod pomognen, jerbo mi vas je puno žaj. Puno ste dobar čovik. Oštajte mi dobro… Bog van do zdrov′je!

Babina prijate′jica sa Visa gre prama vratiman o′ kamare za poć u kužinu, i kad je došla na prag o kamare, reče babi:

-Aaa, moja Mandina, doklen će ovo trajat?!

Upozorenje čitateljima: radi se o dvjema čakavštinama, Spliskoj i Komiškoj.