piše: Jadran Šantić Šangarelo
Da ne bi ova štorija bila ozbiljna ka prošla triba čakod reč i o smiju i zajebancijan koje su se dogodile u pasanemu periodu.
Čuli ste kroz štorije ime Danilo Radelić ili golemi ili …… nesmin notat ovi zanji nadimak jerbo bi moga najebat a to je naš poznati maslinar i vlasnik poznate ujare u naše malo misto.
I kako se za njega lipidu razne zajebancije a za koje je skoro uvik sam kriv moran van spjegat i najnoviji zajeb koji mu je priušti njegov mali netjak Lovre sin o njegove svastike Magde koja je gospodarica od naše kultne konobe „ NAŠE MALO MISTO „
Kako ti naš junak svako jutro dojde na besplatnu kafu i proštit „SLOBODNU DALMACIJU„ tako je ti dan doša po ko zna koji put i nišo se kroz zajebanciju zamiri svomen malodobnemu netjaku Lovri koji mu ni osta dužan.
Trpi je mali Lovre puno ti zajebi ma ovi put je odlući svoga barbu Danila zajebat tamo di je najtanji a to jue reklama i bome takujin pun šoldi. Poslin Danilove zajebancije Lovre se maka vanka „ NAŠEGA MALEGA MISTA „ i na mobitel o prijateja je nazva barbu Danila.
A razgovor je teka ovako: Alo dobar dan jeli to gosp. Danilo Radelić? Je a kobi drugi bija na ovi telefon a ko je to ? Ovdje je predsjednik udruženja maslinara i uljara Istre i drago nam je da smo vas dobili. Naime radi se o sljedećem, Vas smo izabrali na osnovu dosadašnjih rezultata kao najboljeg uljara i maslinara Dalmacije i uz prvo osvojeno misto osvojili ste i novčanu nagradu od 250000 kuna.
Sav zableušen onin ča je čuja odgovori je da sadupravo jema niku poslovnu večeru i da ji moli da ga nazovedu sutra ujutro pa čedu se onda dogovoriti o pojedinostima. Kad je završi razgovor onako golem raširi se ka paun i odma sa vrata je „Obznani pučanstvu u konobi da je posta dobitnik velike nagrade a bome i 250000 ijad kun koje ga uz osvojeno prvo misto ka maslinara i ujara Dalmacije i pripada.
Posli nikoga vrimena pojavi se mali Lovre i sve je ispripovida očevin prijatejiman u konobi koji su naravski odma tu zajebanciju na Danilov račun plasirali u svekoliku javnost. Bidni Danilo ni moga o sramote doč sbi i samo se pokupi i nesta je doma. Dva dana ga nismoi vidili ma on se je brzo rekupera i nastavija svoj đir prvu mukte jutarnju kavu i „ Slobodnu „ u „NAŠE MALO MISTO„
Judi moji nemorete virovat kako su naši judi u Dalmaciju tvrdi jaki i kako se brzo rekuperaju od svaki zadobiveni rana.
Kako ovo ni bila jedina štorija o zajebi moran van još ispiripovidit i štoriju o izgubjenin parangaliman di smo glavi akteri ja i o moje žene rođak Đorđi zvani Đoko.
Kako je meni lani umra moj kumpanjo za bacivat parangale Milenko zvani Đek, a nju je umra najboji prijatej Vedran Mirko zvani Fifi ostali smo on i ja okrenuti jedan drugemu za bacivanje parangali.
Ja san nabavi priko moga prijateja Mile Kostanića ribara iz Drvenika sardele za ješku ma nisu baš bile najboje kvalitete a Đoko jema spremne parangale ,lipo smo ji nadili ma da ne falijen Đoko ji je nadija sa ješkoni satalno brontula a ja san da benzinu i novi brod pa smo ji lipo partili bacit u po Neretvanskega kanala za ulovit Mole.
Sve smo mi to lipo učinili ma u zanju mi je kad smo kalali parangale u more otkaza GPS jerbo su se potrošile baterije i nisan moza zabilužit kote o sinjali a Đoko nije dobro sinja vizualne kote.
Sutra ujutro partili mi dizat parangale kad ono udrilo more sa botaman od metra i vozi i vozi pjuska te more i tako deboto dvi ure ma sinjali o parangali ni pa ni. Đoko je i inače grinteša i mrgud jut ka paprika a bome ni meni ni svejedno i tako u jidu vratimo se mi u porat bez parangali a bome i bez ribe.
Istu smo đitu radili još tri dana i tek peti ( 5 ) dan smo našli parangale. Bilo je na njiman za živo čudo ništo žive ribe i jedan lipi morski pas od skoro obilatega metr ja mislin da je bi oko 6-7 kili žive vage.
Uvati ga je Đoko za rep i kad ga je ti bacit u brod udri je rukon u arnjeve od tende i ti lipi morski pas koji nan je triba bit nagrada lipo je ispa Đoki iz ruke i vrati se u svoje prirodo stanište.
Ja koji san uvik spreman na zajebanciju san samo komentira da smo mu za marendu dali mola i tako ga najili i lipo vratili di pripada. Ka da smo bili prokleti od boga Posejdona ma za utjehu nan je bilo ča smo poslin pet dan našli parangale a ča je zajebancija u mistu bila puna zloče neču ni govorit.
Živi i veseli bili pozdravja vas vaš morski čovik Šangarelo.