piše: Jadran Šantić Šangarelo
Mislija san i vaga ka na balancu triban li se pri seljenja na more upće javjat iz moga kantuna na Britancu joli ne i vrag mi ni da mira mora san sest za ovu makinju i notat ono ča me jako žuja.
Ka prvo moran van spjegat da svaki uboga dan štijen po dva do tri foja i puno puno me snervaju jerbo skoro svi isto pišedu i nemoreš otvorit foje a da prin tega nisi na prvu stranicu bi udren ka šakon u čelo nasloviman koji najavjuju lupeščinu, kriminal kurbanjske pulitičke monade i ajde ti budi smiren i polako štij sve odreda.
Je malo morgen ja to ne mogu jerbo se uzrujan i onda mi žena nosi cukar i vodu da dojden sebi.
Kako san van sigurno bi nota da san ka dite živi niko vrime u Opuzen lipi i šesni mali gradić na ušču Neretve te božanske rike jako me diraju i privučedu befeli u fojiman di se notaje čako o Neretvi i Opuzenu. Jema doli jedan moj prijatej a zove se Jure Stanić koji je gradski vječnik i pravi reakcionar i svako malo me aviza o nikin marčapijan u Opuzenu koje podržava gradska vlast sa gradonačelnikon na čelu. Toliko san od Jure priko Facebooka dobija informacij da bi moga notat samo o temu barenko deset nastavak, ma bilo bi dosadno. Kako ti moj prijatej sve to potkripi nikin svojin aforizmiman ja mu priporučan da izda libar aforizmi posvečenin lupeštinan u dolini Neretve a posebno u Opuzenu.
Štijen tako da gradonačelnik Ivo Mihaljević po nadimku Pičulo kupuje skupi tonobil za se i da prilazi dnevno priko 200 kilometri i da samo ča u njemu ne spava a gorivo naravski gre iz blagajne grada. Isto tako veleuvaženi Andrija Popović velika i bivša mlada uzdanica stranke ZNA SE koje. To je isti oni Andrija Popović koji je parkira anektirani Mercedes na Stradunu i koji je bi ka pobočnik pokojnemu Bobetku pa ga je isti šupera radi marifetluka. Šjor Andrija Popović je proarčija i izmarčapijala sa svojin pajtašiman puste miljune kuna za famoznu veletržnicu di se more doč na ledinu srpon ubrat samo korova za isplest sture za šušit smokve jerbo od te famozne veletržnice nima ništa a gospe mi oni su podilili puste šolde a nezna se baš kome i zašto.
Da se moj pokojni ujac narodni heroj i admiral iz drugega rata digne iz greba i vidi ča su moderni pulitički lupeži učinili od bivše PIK Neretve i kako su je rasprčili meju sobon vrati bi se od muke nazad u greb. Ondašnji Pik Neretva da je kojin slučajen priživija strahote pretvorbe i privatizacije koju je na čelu sa Francekon učinija HDZ moga je ranit veliki dil lipe naše i još bome izvozit puno tega ča je unda proizvodija. Uz Neretvansku dolinu naša Slavonija i Baranja. Hrvatsko zagorje bili bi centri za proizvodnju spize A ZNA SE DA DRŽAVA KOJA JEMA SVOJU SPIZU JE BOGATA I NEMORE PROPAST.
Bija san nikidan u Tursku i judi moji ča sve oni Erdogan čini za turskega seljaka. Daje mu puste poticaje, dovodi vodu sviman na zemju za navodnjavanje, daje puste šolde za kupovinu makinja za obradu zemje uz nikakve kamate i uz otpis velikega dila i čaje najvažnije država garantira otkup svega ča se proizvede. Oni od cile spize pojidu 95% a oni 5 % izvoze vanka. Turizam jin je na vrju svjetske ljestvice i svi oteli radidu cilu godinu a kako, lipo u predsezoni i posezoni država plača za sve turističke djelatnike socijalo i penziono a oteli dajedu minimalac od 250 euri plače i svi zadovojni. Od 80 miljuni Turak sami ji 9 posto ne radi a tamo ko oče radit more.
E da nebi zaudobi i druge intrigantne teme moran se dotaknit našega ministra Freda Matića i bome našega poznatega i priznatega u svitskin razmirima glumca Rade Šerbeđije poznatijega ka Matan.Kako je Fred Matić tija dignit zastor sa grada heroja Vukovara i približit ga svitu uz pomoč Angeline Joli a koju bi triba dovest baš Rade koji je prijatej i Fredu i Angelini i čija bi misija tribala iz svita donit šolde za obnovu i oživjavanje Vukovara odma su se našli dežurni čuvari čistoče rase, nacionalnosti i morala začinjenog čudoređen koji su Freda etiketirali ka neprijateja lipe naše a Radu skoro ka dušmanina, četnika koji je uteka ka kukavica početkon rata i koji je radi kontra Hrvatske.
Jo judi moji ča je ti stožer jak. Ti stožer je ka neprimostiva stina na braniku domovine i samo oni iz stožera su branitelji i pravi čistokrvni Hrvati a svi ostali su samo nike spodobe. Ajme ti ga nama ako nan taki budu krojili sudbinu i budučnost opet čemo se vračati izvorima netrpeljivosti i mržnje koju če posijat između nas.
Ja ka branitej, dragovojac i Hrvatski ratni vojni invalid koji je izgubi starijega sina za slobodu lipe naše san dušon i tilon kontra svi podila na naše i njove i na prave i pravije hrvate. Ovemu narodu triba mira juskega dostojanstva života bez nezaposleni sa lipin plačan i visokin životnin standardon a ne mržnja i osude di se glavni akteri dvi najjače stranke nemoredu čut ni vidit ka da nisu oba na čelu judi, Hrvata koji jemadu samo drugačiji politički i životni svjetonazor. Pa za gospu milu zar sada u miru ne bi tribali svi zdušno radit za dobrobit vlastite države i vlastitega naroda.
Evo prin smo govorili i to argumentirano o lupežima iz HDZ-a a bome ispada da ni oni u SDP nisu imuni na zavlačenje prstiju u državnu blagajnu za samo svoju korist. Za famoznoga Vasu se zna da je pripisa tuđi intelektualni uradak i to je osin foji potvdija i policijski fakultet ma to šjor Karamarku ni dosta za šuperat Vasu iz stranke vengo mu triba na kartu notat sud jer on nikomen ka vrhunski i školovani špijun ne viruje.
SDP čeka da se dokaže krivnja onoj lipuškastoj županici koja je lipon guzicon i vragolastin osmjehon zavrtila pamet velikin muškardiniman iz pulitike i vlasti i onda če ona zažalit ča je ušla u SDP ma niko ne govori da če jon po hitnemu postupku dat šup kartu i zakjučat je u bajbokanu.
Isto tako oni šjor Sabo je zamutija svojin podmičivanje riku Vuku i njega još nisu šuperali iz stranke ma on je sam pet do dvanest da ostavku jerbo je to moralniji čin i ka neče jemat baš veliku maču na pulitičkoj karijeri . Pa di to ima osin u nas ?
Evo jutros štijen uvaženoga bivšega saborskega zastupnika u miro joli u mirovini dotura Slavena Leticu koji se ošerva vrlo mudro na Merzelicu, Sabu i veličanstvenoga Vasu tvrdeći da se njovi griji ne mogu usporediti. Malo san se snerva jerbo znan da se je šjor dotur Letica svin silan angažira na poju pulitike ne bi li uliza u sabor i tamo zaradija lipi penšju a bome to mu je i uspilo, i sad on prodaje moralne kritike svako malo u foje i na TV. Kako poznajen šjo dotura Leticu moran priznat da je jako pametan i elokventan ma isto mi ni kjaro jeli on glumi da se malo izgubi u vrimenu joli je on stvarno izgubjen pa se jadan nezna snač. Ja mislin da bi on moga bit barjaktar svi borac sa prve crte pulitičke bojišnice i to oni koji je priživi sve sile i harbide pa sad lipo uživa plodove svoga truda joli ti saborsku mirovinu.
Kad san se uvati svega moran dotaknit i greške u koraciman kukurikavaca. Štijen nikidan da nima pinez za zapošljavanje mladi školovani kadrov uz 1600 kun plače. I unda ka grom iz vedra neba pojavija se veliki čarobnjak iz prošlosti Merlin koji je svojin čarolijan stvori pineze da bi kukurikavci dva dana poslin izjavili da su našli te Merlinove sakrivene pineze ka da su ji u bičvan sakrivali i zaudobili u koju kočetu su ji sakrili.
Jo judi moji koji je to ludi svit. Kako smo mi postali najglasačkiji narod na sviti a i malo šire evo nan na vrata izbori za EU. Obe velike stranke i ona na vlasti i ona u opoziciju svoje najboje kadrove su kaznili jerbo su pokušali zajedno ništo pametno učinit za svoju državu u Evropskemu parlamentu. Ma ja mislin da oni simpatični momak Picula a i oni Stier moredu zajebat i Milanovića i Karamarka jerbo če narod njiman dat najviše glasov i to iz dva razloga. Prvo jerbo su pametni judi školovani i govoridu strane jezike ka naš i drugo jerbo radidu za narod. Druga je stvar sa njiovin šefiman koji se mrzidu i radidu pizdarije i to od trošenja državni pinez na neproduktivna putovanja do zajebancije o ukidanju crvene zvizde petokrake. Ja pridlažen da jin se zabrani vijađat i da ji se zatvori u jednu komoru dok se ne dogovore i izmiru a da uz to moradu pit biru marke Heineken na kojon je crvena zvizda jerbo Amerikanci neče dat da se sa tikete na boci piva makne zvizda.
Več san pri nikog vrimena spomenija monsinjora Vladu Košića ma moran opet jerbo je u međuvrimenu posta ekspert za oplodnju žen. Iako o temu ne bi triba ništa konkretno znat a najskoli moredu li žene zanit samo normalnin odnoson joli ne naš vrli čudorednik i pastir o formata šjor Košič tvrdi da silovane žene ne moredu zatrudnit. Jeli on to tvrdija i utvrdija i kako neznan ma san o temu štija u foje.
Judi moji ja mislin da svi znamo da bez novinar ne bi bilo ni foji a ni notanoga slova na kartu i da svit ne bi zna ništa ča se dogaja na baloti zemajskoj. Meju tin judima jemamo svega od oni ča se profesionalno bave novinarstvon do oni koji samo stvaraju afere i razne spletke pa o njiman notaju članke.
Evo najnovijega bisera hrvatskega pravosuđa . Osudilo je novinarku istražiteljicu jer je narodu obznanila šakretu marčapiju državni šolad koje je niko dava iz blagajne HZZO-a privatnoj firmi koja je od ti pinez kupovala skupe dijagnostičke makinje ,sa njiman vižitavala jude i jopet to naplačivala od HZZO-a. Sudac kaže da on ne vidi razlog temu istraživanju i iznošenju potkripjeni činjenic tega lopovluka a kako nazna svrhu tega notavanja osuđuje novinarku za uvride i odriza jon je lipu sumu ka kaznu.
Evo ja sa ovega mista tražin da tega suca odvedu na vižitu u poznatega psihijatra dotura Ivana Urlića iz Splita i da on ustanovi da mu se u možjaniman ni čakod pobrkalo, a ako je ča izgleda da je, neka ga se pošaje u niku instituciju na oporavak i to na trošak države. U našemen zakonodavstvu je puno tega nakaradno a ovi članak zakona koji daje sucu za prav da kazni novinara triba hitno izbrisat i kaznit onega ko ga je pridloži.
Tija bi za kraj spomenit još jednu našu povisnu sramotu. Busamo se u prsi sa kulturnin imiđon od stolječa sedmog a jemamo meju sobon hune i avare, osobe bez kulturnog predznaka vandale koji su u prvin danaima stvaranja neovisne lipe naše rušili spomenike leva leva i to iz mržnje i neznanja.
Jedan od takvi spomenikov je oni ča je na na ogromnu sliku iz predvorja zgrade UN-a u Nevijorku a pridstavja narodnega heroja Stjepana Filipovića iz Opuzena. Minali su i sorili spomenik u Gospiću našega globalno poznatega i priznatega naučnika Nikolu Teslu iz Smiljana. Iako narod govori da se zna ko je mina i srušija oba spomenika naša vajna policija do danas nije otkrila i privela pravdi počiniteje krivce.
Pretpostavjan da se nikada neče obnovit spomenik Stjepanu Filipoviću ma obnovjeni spomenik velikomen Tesli skupja prašinu jerbo nima pulitičke voje da ga se vrati na misto di je i bi, jerbo je na temu mistu navodno nika fontana a o drugoj lokaciji ne moredu se dogovorit jerbo velikan HDZ-a bivši propali ministar Milinovič drži sve konce u svoje ruke a kako sa vladajučiman ni u dobre nemore ni bit dogovora oko neke nove i atraktivne lokacije. Iako je veliki Nikola Tesla zaduži cili svit njegovi ličani su ga se odrekli.
Evo štioci dragi nadan se da vas nisan udavi a sljedeču štoriju van šajen sa mora . Zdravi i veseli bili pozdravja vas vaš morski čovik Šangarelo.