PARTILA JE PRAVDA

O RATNIM HEROJIMA, PRAVDI-NEPRAVDI I POLITIČKOJ MARČAPIJI

piše: Jadran Šantić Šangarelo
Naslov za ovu štoriju bi triba bit jako umno zamišljen i napisan, ma gospemi ja evo želin notat neke od povjesti važne stvari a još nisan odlući kakovi ču naslov ovoj štoriji dat. Dunkve vi koji več duje vrime štijete moje štorije znate bome da su sve bile upakirane u smij i zajebanciju ma ova tega neče jemat. Ja ka niki kroničar ajmo reč volin o svemu dat svoj dil mišljenja pa tako i o ovem, u ča slidi.

Javi san se ka dragovojac u rat 1991. godine a sina san posla vanka iste godine u šesti misec u Njemačku priko Italije da mi ga ne skupe u onu vojsku. Vrati mi se doma na badnji dan da oče u rat. Pokuša san ga odgovorit jer nima vojnega iskustva ma on ni za čut .

Kad ti stari tovar moreš bit dragovoljac mogu i ja …zna se obrecnit name i drži nedaj nakraju je parti u prvu generaciju naše vojske u Pulu. Kad je završija odma je parti u Četvrtu ka dragovojac i prvo krštenje je jema na Kašić i Paljuv. Posta je HRVI i dobi je prekvalifikaciju od MORH-a upisa medicinu Završi študije i onda mi se UBIJA 2001 god. Ja san posta HRVI 1993. i vojska me je demobilizirala krajen 1994. godine.

Ma sve van ovo u kratko moran spjegat da bi moga nastavit štoriju. Puno puti su me pitali za mišljenje o generalu Gotovini jerbo je on bi i moj zapovjednik ka zapovjednik Zbornog područja Split. Uvik san govorija ka i sad …vojnik od glave do pete uvik je poštiva svoju vojsku, pozna međunarodno ratno pravo i njega se drža a sutra bi opet otiša pod njegovin zapovjedništvon u rat ako bi mi zdravje dalo.

Puno se rasprav vodilo o oniman ča su se ogrišili o pravo i pravdu a napose o ljudske živote a da o imovini i ne govorin, dok su Gotovina i Markač tukli bajbokanu radi tuđi grija. Teklo je vrime i kako svi znaju da je pravda spora ali dostižna tako se je naša i jedan pošteni sudac u onemu kurbanjskomen sudu pa je naše generale oslobodi svake krivnje.

Nije tu štorija gotova, zame i za moga sina iako ga nema to je bi dan sriče i zadovoljštine jerbo smo i mi ka borci i invalidi sada čista obraza ma triba odma reč da ne bi zaudobija i zapitat se  ča je sa onin likovima iz polusvita koji su činili zločine jeli nji savjest peče i oče li se sada barenko pripast da ji ruka pravde ne pronađe i osudi?!

E štioci moji siguran san da če neki platit buletu ma da če svi nima šanse. Cili hrvatski narod je pokaza jedinstvo u srići i sritnin suzaman kad je oslobađajuča presuda pročitana i pokaza je koliko je strepija za generale. Napose nikomen sigurno ni bilo pravo da gremo u Europu sa stigmom zločinačke države i da nan generali ni krivi ni dužni trunu u zatvoru. Ta presuda je sviman nama borcima invalidima oprala obraz i dala nan da čista i uzdignuta čela gremu u svitliju budučnost.

I EVO KONAČNO SAN DA NASLOV.Kako volin bit dobro informiran čitan sve novine i skoro me udri afan kad san pročita izjave iz Srbije. Judi moji oni ka da su ovi zadnji 20 godin živili u totalnoj izolaciji i cilo in je vrime niko pra možjane kako se vas celi svet urotija kontra nji a oni su prid bogon i cilin sviton nevini. Nikada nisu napali Hrvatsku nikada nisu njoj ratovali nikada nisu počinili zločine a mi smo se u oslobodilačkomen ratu u kojemu smo branili i obranili svoje napravili egzodus srpskoga življa i etničko čiščenje i to ni manja ni više nego po miljuna svita …malo morgen!

Judi moji ja mislin da je ovo okvir za povjest naučno fantastičnu u kojoj svaki okupator na kraju ispada žrtva. Ma da više ne dujin danas se dogodilo još ništo vrlo važno a to je da se osudilo prvi put lupeščina i ratno profiterstvo koje je bilo umotano u najlipši politički tavajol oliti salvetu koja je bila od svile i kadife ispropletena zlatnin nitiman. Ma ni ta salveta ni bila dosta vengo se krelo leva leva ča bi mi u dalmaciju rekli i to se krelo državu i od naroda činilo sirotinju, a ka kulmin svega prodala se INA zlatna koka naša hrvatska i vazelo proviziju po onu liva ruka desni žep i jebe me sa za državne interese.

Ja san uvati godine ma isto me drago pri duši kad promislin …jo judi partila je pravda u progon zločinac ratni profiteri i svake lupeške bagre, nadajmo se da neče fermat. Eto štioci moji zdravi veseli i zadovojni bili pa se oko sebe ošervajte i uvik tužite lopine.
Pozdravja vas vaš morski čovik Šangarelo.