Piše: Jadran Šantić Šangarelo
Ka i svako jutro oko pet uri san sa terace bacija pogled na more za vidit more li se odit na ribe joli ne. Puvalo je i ni bilo vrime za na ribe. Vrati san se u posteju ma ni za dugo i oko sedan san jopet iša vižitat stanje na moru i sa terace ugledan moga prijateja Franu kako sa svojon crnon gajeton na jarbol bardiža iz Brista i uplovljava u naš porat za popit kafu.
Kako je u našemen portu lipo žalo svaki put se Frane sa svojon gajeton mora nasukat jerbo nima nigdi blizu njega kolone za vezat brod. Ja san seja u auto i otiša sa društvon u kojemu je Dr Olivari, Frane, Vedran Stipić, Velo od pokojnega Mačka zet i Ja popit kafu uz normalne zajebancije i tirade razni zajebancij.
Sidimo mi i Vedran kazije kako je bi sinoć na lignje i kako ga je lignja popjuvala crnilon po biloj maji i sa ton je majon iša do Frane koji ga je pita a ča mu je to na maji po prsiman. Kad je čuja o čemu se radi osta je ka inkantan i komentira da kako ga je lignja popjuvala crnilon i zar samo sipe nimadu crnilo i skoro je napa Vedrana da ga zajebaje. Izgleda da Franino neznanje nima granic i da čemo mi još puno puti čut komentare na koje čemo se smijat i Franu zajebavat.
I tako uz smij i zajebanciju Frane se ošerva prema brodu a brod se lipo otisnija od žala i uz pomoč vitra počeja polako bardižavat na dubinu. Kad je Frane to vidija trčeći se zaletija do žala i onako u priši u svon robi je zagazija do vrata da bi uvati brod jerbo se bi pripa da če mu ga vitar odnit na neki tuđi brod i učini ščetu. Kad je vrati brod na žalo lipo mu Vedran govori uvik san ti reka nasukaj se sa večin gason i unda nimaš straja. Asti gospu a di mi je mobitel izneredi se Frane jeli se i on skvasija. Pribire Frane žepe ma mobitel je osta suv na stolu o kafića a ča se tiče šoldi oni su se skvasili ma lako ji je osušit pa nima ščete.
Poza tin je uša u gajetu i nako mokar partija za Brist doma kontra vitra ma isto me malo straj da se ne razboli jerbo ni u cvitu mladost ijema u guzici 70 godin pa ga more i puntura zateč. Vedran i ja smo se vratili u kafić i unda je iskrsla još jedna batuda a na Vedranov konto. Prošlu šetemanu je Vedran odija sa famejon i prijatejima na đitu sa svojin brodon . Kako su planirali bit na more 4-5 dan tribalo je spremit i provištu za koju je bila zadužena Vedranova žena i na kraju je zaudobila stavit kumpire da bi tek na Vedranovo ronjanje stavila par kili u brod. Đita je završila lipo su se vratili doma i gle vraga kumpiri se nisu izili a kad su iskrcavali stvari nigdi ni bilo kumpiri.Vedran se kune da je svaki kantun u brodu vižita i da o kumpiri nima ni traga ni glasa. J
utros kad smo čuli lipo smo Vedranu priporučili da kad je sve vižita i ni naša kumpire neka sada svaki dan dobro njuši kad uliza u brod i kad se kumpiri dobro usmrdu unda če ji lako po smradu nač. I dok smo o temu raspravjali dojde za naš stol Stipe mesar vlaj o Drniša jako simpa čovik ma gospemi na prsiman i drobu jema puste masne mače. I dok je on odgovara na naše zajebancije mi smo utvrdili da kako mu je pečena janjetina draga da je sigurno sika na drobu dok je ija jerbo su mu slabi zubi za drobit koščice, i tako smo i njemu prišili zajeb.
Prin vengo smo se rstavili Vedran i ja smo odlučili napravit jedan librić sa skračenin tekstovima i poklonit ga Frani za učenje onega ča je najvažnija za na more i okolo mora. Eto štioci dragi svašta jema u naše malo misto samo uvik triba stat atento i u fermu za uvatit prave štorije i barufe. Živi i veseli bili pozdravja vas vaš morski čovik Šangarelo.