piše: Jadran Šantić Šangarelo
Mislija san štioci dragi da ču van se javit nekin novin befelon kad lito parti na doček jeseni jerbo če tada bit manje teplo i lakše če se moč koristit možjane. Ma jopet čovik je ka beštija nikad zadovojan a i nebi tija čakod zaudobit a ne neotat i eto ti pegule. Moran sist za ovu makinjetu i notavat a k oče se svega sitit.
Znan da če niki grintavci odma skočit sa svojin optužbaman jerbo se uvik bojidu oštrega jezika i napast me iz svi kaluni. Ma ja se ne bojin i gren naprid.
Eto u Lipu našu se od moga zadnjega javjanja dogodilo svašta je je bome baš svašta. Ne bi van moga to sve notat po kronologiji ma isto ču se provat ošervat na nike važne stvari ča se tičedu pulitike a bome i svi ostali važni resori. Kako je opće poznato u nas je na vlasti stranka Zna se ma u cilu državu od one naše prešidentice priko premijera i na svin razinan vladaju oni iz stranke Zna se pa i u vatrogasce. Eto da učinimo štart od požari u kojiman se nikako ni znalo ko gasi i ko to gašenje organizira. I dok je oni Sanader koji je kapo u vatrogasce tvrdija da je sve ok skoro je po moga Splita otišlo u lagum a onda je Opara opleja po organizaciji iako je on njiov. Evo i ovo je samo mali spomen o temu kakvo je stanje u lipu našu.
Sve je to snervalo onega našega bivšega generala krstičevića da je našoj šesnoj Kolindici zapriti ostavkon. Ma vlast je slast i ni ga tribalo dugo nagovarat i povuka je ostavku. U nas vridi pravilo da svi koji jemadu naum da postanu doturi i profešuri moredu pripisivat tuđe trude ka oni Barišić joli oni iz policije Vaso kojemu fali dlak na glavi i nikomen ništa, stičedu se diplome, digne se graja u akademskoj zajednici a o kaznan čekaj tovare da na vrbi rodi grožđe. Moran reč i to tvrdo da san se iznenadi kako oni muzuvir o našega premijera zdušno brani te marifetluke i onda kažu da je on najpopularniji pulitičar u državu. Jo judi moji pa kakva smo to država postali?
Bilo bi nepošteno a ne spomenit vanjsko politički uspjeh naše prisidnice koja je uspila čak dat intervju za TV isprid bile kuće jerbo daje ni stigla ali je vrlo kurtoazno izjavila da hrvatska vanjska poolitika utječe na formiranje vanjske pulitike SAD-a. Moran reč da san ja TRUMP bija bi oduševjen kako stason tako i idejama naše prisidnice, jerbo kad je čovik vidi nemore a ne zapitat se kako bidni Jakov izlazi sa njon na kraj. E
sad na veliki portik joli vrata dolazi pulitička trgovina stranke Zna se i to ona u kojoj se moredu samo priprodavat glasovi saborski zastupnikov di na čelu kolone jaši oni Sauha a virno ga prati Pupovac i ostala bulumenta .Kaže stara poslovica da se za take šporkarije nemoredu oprat ni lugon a bome ni vodon, jerbo kad se obraz šporka da prostite govniman onda ona doživotno smrdidu. Kako se ovod radi o fenomenu stranka Zna se juriša naprid i niko i ništa je nemore fermat jerbo oni nečedu nove izbore jer moredu svakoga kupit svin na svitu poznatin sredstviman od šoldi do ucjene.
Moran barenko malo spomenit da je naš vrli premijer za dešpet Rusiman otiša u Ukrajinu i tamo ponudija pomoć ka veliki igrač jerbo oni bez njega na bidu mogli a ča se zato Putinu nakostrešilo i ono malo dlačic na glavi nikomen ništa ma blizu je i zima i ča če bit sa Ruskin plinon vidit ćemo.
Mora bi se taknit i velikega političara iz Pogane vlake Šjor Bandića koji je naući brzopotezno zanat o kupovini glasov pa se odjednon od po njemu deklariranega ljevičara a za jubav i glasove one lipoškaste Brune Esih i onega muzuvira sa govornon manon Hasanbegovića pritvorija u ogorčenega desničara i za dokazat koliko je zadrt desno udrija po drugu Titu i ukreja mu trg u metropoli. Nije bilo važno istaći da je drug Tito bi najpoznatiji političar svoga vrimena, najboji vojskovođa u drugemu svjetskomen ratu koji je pobjedija kako Pavelića tako i Hitlera. Isto tako je vratija Istru i Dalmaciju matici zemji a na sprovodu mu je bilo skoro 130 visoki državnikov i svjetski političari koji se ne bi sramotili da je on bi razbojnik kako tvrdidu mizerije sa desne bande kojiman se šjor Bandić priklonija.
Ne bi tija da me se krivo shvati ma na sprovodu našega vrlega Franje koji je sve ovo danas zakuva bija je jedan jedini državnik šjor Demirel iz Turske. Skoro san zaudobija onega generala Glasnovića koji je ka „ častan časnik „ proda svoj glas Plenkoviću za lipe šolde koji će ka lastavice odlepršat u BiH. Ona “velika stranka” HNS koja ne more prić 2% sama na izborima utirava se sa onin muzuviron Vrdoljakon svugdi i onda judi ne vidu da oni nisu velika stranka vengo veliki mučki a njiova perjanica je puna skandali sa velikin suman od obnove Gunje do obnove njezinega stana di je dužna skoro 700 ijad kun.
Judi moji kad bi ja moga prominit pamet odma bi se uvatija pulitike jerbo je tamo lova. Kakva nijednomen političaru nije važno.
Bilo bi jako nepošteno a ne spomenit gospodu drugove iz SDP-a. Oni su a kako, nerazumin izabrali onega mlađahnega Bernardića za prešidenta no taj ne razumi ništa a posebno borbenost stranke SDP koja je krasila stranku uvik. Prvo je počeja čistit kazneni prostor na svomen terenu i sad more bez ofsajda davat sam sebi i stranki gole kako oče.
Moran notat da me je oni sinjski vlaj Milanović jako sekira ma stranka je boje funkcionirala i mnogi su duboko promišjali ča će reć kontra SDP-a jerbo bi odma dobili po nosu. Sada sa ovin bezličnin i anemičnin Bernardićen dočemo na razinu HNS-a od 2% i tu je tragedija. Triba udrit nogon u guzicu onega bračanina bivšega ministra o policjoti Ranka Ostojića i natirat ga da ovega malega postavi za poštijera a da on sa robustnon ekipon vrati SDP u život, i da uzme vlast u ruke kako u stranki tako i na izboriman.
Drago me ća se ona Kolarićka vratila u krilo stranke a gre mi na živce oni Ostojić Rajko iz Staševice ča jema Napoleonov kompleks jerbo se odma vidi da bi on tija vladat scenon u SDP priko Bernardića.
Bija bi red malo se odalečit od unutarnje politike i pribacit se u Deželu koja nan stalno od prijema u EU do danas bacije klipove pod noge a da ne govorin o bosanciman koji bi tili ka i slovenci lipi bokun našega mora i zamislite Nota Bene kažu da nan nisu dali građevinsku dozvolu za sazidat most.
Pa judi moji di to jema?
Dolazidu nan turisti iz cilega svita i moradu pasat priko Dežele a kurbe slovenci udru na granici torturu i sustavno nan ubijaju sezonu. Mislin da bismo tribali priko nji napravit most ma unda bi nas i oni ka bosanci zajebavali i to jeli dovoljno visok itd.
Na kraju moran notat da je na zanje izbore u naše malo misto odnosno općinu izbore dobija SDP i da jemamo mladega školovanega načelnika općine Matka Burića koji se nemore obranit od kosturi iz armeruni ča ga svaki dan tučedu po glavi di god otvori koja vrata joli koji sakriveni dokumenat.
A u turizmu ništa nova kako se zna Općina Gradac ča oće reć naše malo misto je uvik bi liti pod okupacijon naroda iz BH, Češke, Poljske, Slovačke i onda Nijemci, Francuzi, jako puno Skandinavaca i drugi ma šuganame po plaži uporno naši bosanci ostavjadu ka plačenu rezervaciju. Komunalci ujutro skupjadu ma ko če dobit rat ne zna se.
I eto štioci dragi šaljen van ovu litnju kartulinu pa je sa pomjon proštijte.
Pozdravja vas vaš morski čovik Šangarelo.
Živi i veseli bili!