BILO BI NAJBOLJE NIŠTA NE ČUT A BOME I NIŠTA NE VIDIT

piše: Jadran Šantić Šangarelo
Sve se ništo sam sa sebon dogovaran o temu pisat joli ne pisat i vrag me tanta pisat a znan da če me to uvalit u govna. Evo otkako san se vratija u metropolu svašta se događalo ma gospe mi jako malo lipega sve niki škandali nike smutnje i privare. Evo da me oni koji su uvik kontra moje riči notane na ovin stranicaman ne bi jopet napali moran iskreno od srca počet sve kritike koje ču ovod istrest.

Evo ka prvo SDP je jema narcisoidnega, arogantnega, bezobraznoga i samoživega prisidnika koji je krola i prominili su ga. Nota bene to je bilo dobro ma oti muzuvir je nastavija svoje barufe još činit i lipo gospemi svaki misec u buštu stavi 16500 kn a kartelu o posla ka saborski zastupnik ni timbra ni jedanput. Neznan dokle će jerbo svaki dan sve više navlači sramote i jala na SDP čiji je član. Moran reć da bi ga ja istira nogon u guzicu iz tega jata jerbo stranka svaki dan zbog njega kupi negativne poene a i ovako slabo stoji sa simpatizeriman. Ako ćemo pravo SDP je nasta na tradiciji borbene radniške partije i triba bi bit barjaktar u državi po poštenju, ispravnomen pulitičkome djelovanju i brižan i osjetjiv na sve nepravde. A e malo morgen.

Birali su novega prešidenta i čini mi se da nisu baš pogodili u metu jerbo ovi mali svaka mu čast jerbo ga ne poznajen ma o njegovoimen radu niman baš veliko i pozitivno mišljenje, više bi reka da niti vonja niti miriše. Jako me je smetalo kad su šalabahteri bili u điru na konvenciji i nije mi drago u kojemu pravcu gre stranka. Evo ka zanji primjer lošega djelovanja je i to ča se niko osin SDP-eova Veloga Jože ( Peđa Grbin ) ni javno ogradija od one Hosovske ploče sa ustaškin pozdravon u Jasenovcu.

Ni dovojno upirat prsto na vlast da ona mora reagirat, SDP je jedini dužan na ovake stvari se prvi očitovat i počet borbu za provođenje Ustava RH. Mislin da bi mu popularnost počela rest da su napali prvi. E tu je oni muzuvir Milanović bija sa mudiman i takve bi stvari ščeto neto u brk kresnija sviman kojiman je to tribalo skresat.

Evo po tomen pitanju i naša vrla prisidnica od prvega dana prisidnikovanja ni jednon svojon besidon ni sebe ogradila od ustaštva i fašizma ma je zato jemala puna justa izrek kontra kako ona to ističe svi totalitarizama.

Naš novi ministar vanjski poslova je na istin valovima od Kolindine mužike i on puno govori ma nije se ni on ogradija od NDH pa ni naš vrli premijer koji je pravi prefrigani mačak koji more puno mlit a ništa o konkrenemu ne reč.

Prin izbori se na vas glas govorilo o smanjenju županij o poštenijen raspdilu sredstava za narod kroz plaće i pensije, ma da ne bi bilo. Sve je to izgledalo ka ča bi moja nona rekla “e sinko sve se to lipo nota na led pa pritaka na sunce i odnija đava sve”. Bilo bi nepošteno ne spomenit MOST i njegove junake o veliki rići i pokvareni dila. Eto pri izbora se narodu prodavala magla oko smanjenja plača za sabornike a i druge uhljebe koji primaju dužnosničke beneficije i kad se ukrcalo u feratu koju vozi vlast sve se zaboravilo.

Jemali su oštre riči kontra nepotizna i marčapije a sada su tili na odgovornu fotelju zasist kuma od vrloga vjernika i krščanina Bođe Petrova. Moran naglasit da je to bija pulitički zadatak za velkega Grmoju ma ni ga položija vengo je na njemu pa ispit ka spletkar jerbo su ga foji razotkrili.

Moran reč da mi je na pamet pala samo jedna stvar koja opravdaje MOST a to je da su kartu na kojoj su notali smjernice promina u RH nigdi izgubili i sad se bez te karte neznaju snač ,a more bit da su sa njon uspirili oganj na kominu di su kuvali neretvanski brudet i lipo blagovali.

Toka me  reč da ja ka stari grinteša nisan zadovojan sa nikin a posebno sa onin muzuviron Dujmovičen na nacionalnoj TV koji mi nedijon uzbuni živce i usere dan . Pa judi moji ča bi reka pokojni Mladen Delić jeli to moguče da jedna državna institucija kalibra nacionalne TV priko svi način i poštenja zaposli onakvega tipa i to u informativni program a plaćaju ga sa računa zabavnoga programa.

Majko mila pa koga on to more zabavit, more ako je jutnja zabava. Prista san štit Slobodnu Dalmaciju zara njega i onakvi ka ča je on a sad ču bome pristat gledat i HTV, nima druge.

I da sve ovod ne bi bilo crno doša nan je u metropolu i did mraz iz laponije je gospe mi pravi pravcati samo triba vidit ča je ostavija na poklon onima na vlasti a ča oniman u opozicjunu.

Počeli su adventski dani i moran reč da san se izblesira kad san vidija pusti svit ča troši šolde na poklone na iće i piće neznan di se ti svit dosad sakriva . Pari mi se da je sada u metropoli duplo više svita samo mi ni kjaro ča če se jist poza nove godine a zima je jako duga ladna i jebena.

Eto štioci moji dragi živi i veseli bili pozdravja vas vaš morski čovik Šangarelo