KAKO MI JE LICA IZILA LIUCA

piše: Jadran Šantić Šangarelo

Evo me dragi štioci javjan van se poza puno vrimena nepisanja pa mi se pari da san se jopet rodija.

Koliko san god ronja na ovu makinjetu joli laptop moran van spjegat da je to jedna puno lipa i zahvalna makinja jerbo na  njoj moreš pisat i brisat koliko te voja. Ne moraš stavjat kartu vengo kad fermaš notavat samo udreš u botum i ona sve zapameti i lipo spremi na svoje misto pa ako ti triba čakod dopunit joli izbrisat moreš i to.

Ma za Gospu skoro san zauidobija ča san mislija notat. Dunkve evo kako je to bilo.

Kako ja, dok san po godišća u naše malo misto gren svaki dan na more lovit ribu lipo san se i ti jedan  dan diga sa terace privižita more, popija dekote skupija iz dubokoga ješku i partija u Karaku na prvu kafu nigdi oko 6 uri.

Lipi dan mirno more ma več  je teplo i ja ti lipo u moj brod pa vanka i odma iz porta molan panulu iza sebe pa udri vrti tamo vamo ma ti dan ka za nevoju na panulu ništa njanci škušej.

I tako dok san panulava oko uru i po odmrzla se ješka i ja se usidrija na svoju staru poštu priko puta otela Labineca. Nataknen prve lipe repe o kozic na udice i kalajen šćapon na dno a to je na neki 35 metri. Počelo se vadit Mezoarbuna, Bukava, par lipi Arbuna i tri četri Orade, ma ništa veliko porcijašice i tako nigdi do 11 uri kad me je već smantala vrućina i dosada a i riba je malo kalala jist.

Kako ja mojoj ženi sa mora uvik donesen lipo očišćenu ribu u čistomen moru tako i ti dan se ja uvatija čistit ribu i na ti san posal izgubija deboto uru i kvarat jerbo je bilo skoro 3 kila ča ja rečen mišanega mesa oću reć razni rib. I došlo je do najtežega dila a to je vadit sidro.

Cili san se zapuva a škina me boli za popizdit ma i to san obavi i mislim se ajde da učinin još barenko dva tri đira uokolo sa panulon pa ča bude. Promini san varalicu i stavija jednu šarovitu sa crvenon glavušon pa sa njon gren isprovat sriću.

Ovi put san tija prominit manovre i malo san pojača gas sve do dvi ijade i po okretaji motora. Zavrti san se dva puta oko Bošca a to je zapadna vala našega malega misti ni da je taklo. Računan još obać glavnu valu isprid mista i dan još bokun gasa. Nisan učinija ni dvista metri kad mi ništo udre i zategene mi krenu u ruci. Smanjin gas do kraja i počnen potizat a pusti san oko sedandeset metri krene pa dok to istegneš triba se oznojit.

Vučen ja nešto borbeno i  kad san to približija brodu udre nešto i skoro mi ukrede krenu od panule iz ruke. Nisan se odma snaša i ta zvir mi je potizala krenu da san mora molat a kako ja uvik kraj vežen za bitvu na krmi  nemoremi riba odnit panulu.

Ugasin motor i gren polako u borbu a ovo čudo na kraju leti livo desno ka pomanitalo, bome nedan se ja i polako potižen, i kad san potega do broda i jedva ubacija u brod skoro me strefila kap. Kad se ova borba završila jema san ča i vidit, prvo ča san ulovija bija je Luc od skoro kilo i po a onda je Luca zagucala Lica od svoji 4-5 kili i ni ga mogla progucat a ni ispjunit i lipo je skončala u momen brodu.

Sad me tokalo i to čistit a zvizdan upeka curi sa mene znoj ka na špinu a mobitel zvoni. Malo otaren ruke sa krpon i vidin zove me žena, di si došli su nan gosti iz Zagreba ajde doma pa usput kupi svinjskega vrata i bržoi za gradele. Dobro govorin ja eto me brzo a ti upali roštilj.

Brzo san očistija ribu i u porat pa kad san armiža brod seja na biciklu i sa kofon na timunu punon ribe doma, a uz put svi gledadu ča ono veliko viri iz kofe. Kako nisan jema vrimena za pofalit se jerbo san žurija doma posli san lipo sve slika i jema san ča za pokazivat. Kad san doša doma manju san ribu sa broda nosija u plastičnu vričicu a Licu san uvatija za rep i na vrata o kuće. Mora san  bome bubat nogon da mi žena otvori.

Kad je otvorila ja jon dan u ruke vreičicu sa ribon a Licu držin iza leđa. Ona odma počela ronjat di je meso zašto san palila roštilj a ja jon lipo na stol na teraci stavin kapitalca uz ošervaciju ma evo ovo ćemo umisto mesa i mislin da je boje i zdravije a ona kad je vidila izbečila oči skoro su jon ispale vanka.

Dabome da su gosti bili kuntenti a i moja žena jerbo ona obožava ribu. Eto u moji 70 godin nikad nisan vako ča doživija. Štioci dragi živi i veseli bili pozdravja vas vaš morski čovik Šangarelo.