Ivan Dobra Žirjanin
Molajte ga neka se odmori,
torna se je iz daleka svita;
nek’ mu budu umiljati dvori,
patija je i zime i lita.
Molajte ga neka se odmori,
neka skine o’ stin teško brime
jer lavur ga do košćin umori
kroz pasano oto pusto vrime.
Molajte ga neka se odmori,
neka gljeda i mater i oca
prije nego valiže otvori
i nego se uhuti karoca.
Molajte ga neka se odmori
prije nego ča pasa kroz selo
da s kin koju starinsku prozbori
i da srce zaigra veselo.
Molajte ga neka se odmori,
tujina ga zamalo pojila,
i učini da skoro izgori,
a kosa mu sva je posidila.
Molajte ga neka se odmori
i neka se pokripi čakora.
Ma, vidite da jedva govori
nakon ča je tûka sva ta mora.
Molajte ga neka se odmori,
pa će poslin svakog počastiti,
ka’ se duša kaj cvit mu otvori,
jerbo se je uspija vratiti.
…
(molajte ga – pustite ga)