Ajde k vragu korona i ko je izmislija!
piše: Jadran Šantić Šangarelo
Evo judi moji ča nas je snašlo napalo nas je niko sitno da škužate govno koje kosi gore nego u ona vrimena španjolica. Svi su se digli na noge od vlasti do oni koji se nikada nisu oprali a kamoli duperali kakvi sapun joli Plavi radion pa i Nilu. Bilo je u ona stara vrimena i šode kauštike pa znala se roba prat u lušiji od luga iz špakera ma isto je bilo šporkačuni koji nikad nisu bili bolesni.
Moja pokojna nona je uvik ghovorila da čovik u svomen životu mora poist vriću dlak i vriću šporkice a da dica kad su mala moraju jist govno iz nosa jerbo jin ono daje sol koju dičica potrošidu u znoju dok se igraju. I kad vi to sad čujete uvate vas šete kolpi, a zašto? Zato jerbo danas jemamo puste makinjete za prat robu šušit robu prat sude i da daje ne nabrajan. I sad kad vas zatekne nespremna ova pokvarena a nevidjiva beštija ajde se ti bori kontra nje.
Likari i vlast su se udružili pa nan na TV daju upute i savjete tako da bi čovik mora jemat tajnicu da notaje sve ča oni izbale jerbo mi stari judi nemoremo stić zapametit sve. Dobro je ja san ka vojnik discipliniran i osta san dobrovojno u kuću sa ženon koja je na vrime nabavila svu provištu za tri nedije tako da ne moramo vanka jerbo ti virus ti covid 19 vreba iza kantuna starije jude i napadne vas a da niste ništa očutili. Ma da ga barenko vidiš da bi mu po čunki ka i svakemu barabi i bog te veselij a vako te on ukupira svršiš u posteju i kome obojci a komen opanci.
Ma pustimo sad zajebanciju na bandu ovo je vrlo ozbiljno jerbo nas ni u dva rata ni vako kosilo. E, a sad ja bi baci ćakod na gradele a nesmin vanka žena me ne pušča i tu nastupa naš poduzetni čovik triba mu dignit veći spomenik od najvećega Tuđmanova jerbo je to zasluži. Ni bitno kako se zove vengo je bitno da se organizira i dostavja ti na kućni prag sve od verdure priko sve friške ribe do voća i mesa i da ne nabrajan sve od Vegete do kafenoga cukra. I moran reč da ni ni skupo a sve na prag od vrata. Svaka čast judi mali. Vi nesebično pomažete malin judiman a u Tuđmanu smo bili stoka sitnega zuba.
Kako ne kupujen novine jer ne gren vanka čitan sve na internet (muko moja ča san sve mora naučit u 72. godini ) i na internetu puste statistike svi su u okviriman samo ni naš prilipi Split u kojemu opet lopine na crno držidu otvorene kafiće i na taj način doprinose širenju zaraze, a kad jin sutra dojde prijava i rješenje sa globon unda če bit mater kurvu ovemu onemu i tako uvik. Ajde Splićani moji budimo barenko u nečeme osin sporta bila perjanica. Držimo se proceduri pa ča sve prin svršit.
Jo da me barenko primirisat ujutro more samo na minut da bi ne zna ća. Ne mogu stisle me boleštine a ni žena mi ni na cviće pa ćemo (nadan se ) ovu godinu kasnije u dalmatinsku lipotu, barenko dva miseca i nadoknadit gradelanje i ribarščinu.
Kako san ja po godišća doli a po gori ovi grubi potres me skroz uništija, ma ne mene vengo mi auto. Kako živen u strogomen centru u staroj kući od matuni na drugemu podu ti jebeni potres je izbija kantun na šufitu i sav materijal mi je pa na auto, skoro mi je srce puklo kad san vidija ča me snašlo. Evo ja van se oko svega dogovaran sa mojon bojon polovicon i ona je insistirala na kasko osiguranju i to punemu jerbo mi je prin desetak godin krupa uništila lipi auto i ja san bome posluša tako da mi je to ublažilo jade. Ja san dobro i proša a jema judi kojiman se sve sorilo. Metropola je izgledala prva tri dana ka da je ratno stanje i da nas je ničijia luda artiljerija izbombizavala. Corona virus nan zadaje muke ma ja se nadan da ćemo pribrodit sve.
E nisan se dotaka izbori u ADZ. Moran van spjegat da ja koji san na livo okrenut potajno san se nada da če naš Dalmatinac pobjedit one smrknute i ružne face. I je. E mislin da će neki reć ovi je rebambija glasa za live a druka za Plenkovića, jesan i ko mi ča more. Barenko je uljuđen i lipuškast čovik a govori puste jezike pa nimamo ka u Tuđmanovo doba dodatne troškove za privoditeja kojega je oni voda po svitu.
Nije dobro sve ovo skupa ma da mi je nona živa rekla bi sinko Sodoma i Gomora. Ma isto sunce lipo izlazi i zalazi, puno cina je palo pogotovo benzina, arija se očistila i zdravije se diše cili svit je otvorija puste muzine i pomažu onima kojima triba. I naša vlada je obećala pomoć onima koji ne mogu raditi pa da ne propadnu i u ciloj gunguli Slovenci nas jebu na sve strane, ma neće jin ništa poć za rukon platit čedu i oni buletu.
Eno tamo u monte negro su se pokefale dvi crkvene institucije srpska pravoslavna crikva i crnogorska pravoslavna crikva i to opet oko kapitala ovi iz srbije očedu crnogorsko bogatsvo i spremni su ratovat pa di to jema da se bogumilnici karadu kredu vriđaju i ratuju.
Ludo se nadan da će sviman kojiman triba brzo doć iz guzice u glavu i da će postat svjesni koliko je život kratak i jadan i da ga triba potrošit ča boje a ne ga uništit. A da bi opravda (pod)naslov moran van spjegat da san ču beside da su ti corona virus izumislili iz CIA-e, pa poza tin da je to dilo ovi ludi ingleza, pa unda da je sve to zakuvala kina i na kraju da u svemu jemadu prste rusi i ajde ti sad promisli ko je zajeba cili svit a i sebe, sve je to luda kuća.
U svemu ovem, ja san se malo pripa oče li most koji vodi na pelješac bit gotov na vrime. Oče, kinezi piču sve u šesnest nji ne more zaustavit ni karantena jerbo je njiman javilo iz štaba, nema karantene moraju se dokazat ka vridan narod.
Eto za sada štioci dragi do sljedeće štorije pozdravja vas vaš morski čovik Šangarelo.