Ivan Dobra Žirjanin
Kako li je lipo ležat na saližu
i gljedati svoju rasteranu mrižu;
ka’ meštrali litnji vrilo tilo ližu
i ka’ brodi bili na pučini gmižu,
pa ka’, laki, jopet svon portu pristižu
oli ka’ prepele barbete pririžu;
ol’ ka’ jedan drugog lešto ti dostižu
i ka’ činu pinu ča je vitri strižu.
Ka’ furešti niki, ki u goste stižu,
nevišni na stine, zapadu u grižu,
iz koje se, zatin, jedvice pridižu.
A ka’ sin domaći poteže valižu,
isto svi učinu: tri zlake zaližu,
iskrca l’ se vôde ol’ na Malon Ižu.