piše: Štefica Vanjek
Milki je celi dan zvrndal mobitel, a kak nigdar ne zna gde je komaj ga je našla v sobice.
MILKA: A gdo je sat, denes nem niš naredila od tega lajavoga stvora. Halo.
MARTINA: Mama dober ti dan, sretan ti okrugli rojsni dan.
MILKA: Fala ti ma jedina. Mogla si i bez tog okruglog.
MARTINA: I, kak se sat osećaš kad je okrugli?
MILKA: Am zakaj me to pitaš, niš se ni premenilo na bolše, osećam se kak i do sat okrugle, samo z više let.
MARTINA: Ha,ha kaj ti to sat znači, okrugle?
MILKA: Ha kaj znači, znači to da imam okrugle let tere ne znam gdo mi je na pleća del ja se ne osećam tak, okrugle kil, e te osećam, da me nešće skotura z Kloštranskog brega koturala bi se se do Kine i još bi mi sala ostalo za prespati zimu kak medvedu. Gda se stanem v gradu z nekim koga dugo nis videla i spominjam se ž njim te stari švabo kaj ga zoveju Alzhajmer po mozgu mi s kuglicami igra bilijar pa će pogodi v rupu setim se gdo je čovek s kim se spominjam.
MARTINA: Mama ti si ponorela z okruglim.
MILKA: O, baš ti fala, znači da sem do sat bila spometna pa si ti to po meni nasledila.
MARTINA: Čuj mama, furt su ti norije na spometi.
MILKA: Lepa moja ležeše je čez živlenje oditi nasmejan neg hudi. Se brige su tad menše. Morem ti reči da ta okrugla leta imaju i sve prednosti, jenu bolest sigurne lečiju, a to ti je mila moja ta kaj joj veliju OKP.
MARTINA: Tulike boleštin imaš, a kaj ti ova znači?
MILKA: Ha, ha to ti je ona za žene najgorša tera ih celega živlenja žmiče i muči, bormeš i ti si od nje betežna.
MARTINA: Ma naj mi reči, a kaj to znači?
MILKA: To znači dete da sem se zlečila od vlečenja mekle i krpe za prašinu saki dan, malo se delam da ne vidim, malo za zbiljam ne vidim, glaukom je navek opravdanje. Gda vidim prašinu i paučinu te moment mi se baš neda usisavača vleči pak se demencija kak veliju zaboravlanju pobrine da zaboraviš da si videl, i nikom niš. Denes čistim kak mi je mamica znala reči gda sem bila dete, same tam gde ide pop z križecom, pak z ovom denes dečjom spometi tak i delam, i morem ti reči da je to izlečenje božji blagoslov za me betežne kosti.
MARTINA: Aha, baš si spometna, nemaš ti dečju spomet, lukava si kak lesica, generalku ti bum ja delala.
MILKA: A nek gdo, zakaj te imam nek da mi pomoreš. Kaj dojdete denes k nam?
MARTINA: Dojdemo pod večer dok skuvam jesti za zutra.
MILKA: Čuj za nedelu je tatek dal speči odojka pak buju došli prijateli na obed, buš mi pomogla dvoriti.
MARTINA: A kaj pitaš kat znaš da bum, ipak ti imaš okrugli ha, ha.
MILKA: E bormeš da znaš, da bute denes dobili za večeru okrugle.
MARTINA: Kaj morti ćevape, ili pleskavice ha, ha.
MILKA: Kak da nebi, znaš da mi je i penzija okrugla pak nema penez za dva slavla.
MARTINA: Onda kaj je to okrugle, morti same narezane kobase.
MILKA: To su ti kak veliju na televizije kuhari master šefi „okruglice u umaku od rajčice sa svježim mažuranom, prahom kurkume, bosiljkom i origanom, na posteljici od pire krumpira“
MARTINA: Joj mama preveć glediš tega televizora, am su ti to obične ćufte z tenfanim kramperom to bum i doma obedvala. A si morti nekaj slatkoga okrugloga spekla.
MILKA: Ak misliš na tortu to neš jela, znaš da ja imam cukora i nesmem slatko jesti.
MARTINA: To kaj nesmeš ti ne znači da nesmemo i mi.
MILKA: Joj menek, am bi ta torta trebala biti velika kak fergusonov kotač kaj bi stale se te svečice, a gda bi ih vužgali morali bi vatrogasce zvati kaj bi ih pogasili da se hiža ne vužga. A buš ti za nedelu spekla tortu kak si i tateku za okrugli spekla, celi grad zna kak si ti maherica za torte.
MARTINA: Kaj očeš i muzičku želju na radiu.
MILKA: A ne bi bilo zviška, znaš da volim muziku.
MARTINA: E draga moja mama, muziku buš dobila, karta za Gospel v Zagrebu u Lisinskom ti je poklon, a za tortu nis sigurna.
MILKA: Sad mi više torta ni važna, i onak ju ja nesmem jesti, a poklon z koncertom je originalan, bumo uživale skup. Morti poslije koncerta odemo i na nekaj okruglo v Zagrebu.
MARTINA: Bok mama vidimo se podvečer.