piše: Đurđa Vukelić Rožić
Gda se mi, poznati, domači selaki z našega prelepoga Gornjega Moslavačkoga Sela zestanemo na sajmu ili v marketu, med pervim pitanjima se čuje:
“Kak je doma? Jesu deca dobro, jel imaju posel? Gda se vrneju domom, jel još dugo do penzije? Kak su starci, jesu živi?“
Vnuki, milenijalci i kaj ti ja znam kak se vse ne zoveju vole dojti v našu hižicu. Po zime, stisneju se k pečice na dreva, hrdajuči suvi sirek ze sirnice na banjku. Ja im spečem tenke šnite krumpera na table. Z suhim špekom to je nepozablena marenda-brunch. Niš na svetu tak lepo ne diši, veli nuček Ivek. Deda zna skinuti rink z šparheta i na drotu speči komadičke kožice od suhoga špeka z narezanu češnjovku. Naša vnuka Ema, kaj se v metropole bori za svoje mesto na svetu zna reči:
„Babica, vi neste zavostali, vi ste vintage!“
Zajne vreme nas štentaju kojekakvi, moderni virusi. Po bolšim patekami strplivo čakamo v redu, kaj da se zabadav nudi sveti gral. Same nam fale bubnari z Basela¹ na tem jurišu na zdravle. Ak me nektera pajdašica pita kak sem, i to v pateke, nema se tu kaj puno šlabekovati ni šprehati; kak vidi, tak sudi. Kaj bi joj vraga išla nabrajati svoje dijagnoze! Kakvi ljudi jesu, ona bi mam dokumenterala vekši broj betegi nek je ja trpim.
Gda se putem berzoglasa spominam ze svojom decom rastepenom sekud po svetu, to je puno teh kak vele emocij, jeni drugima napunimo baterije, lehše se ide dale. Naskoro buju svetki, dojdeju domom. Gda imam frišku flizuru, lepo se zrihtam i onda je vse redom zovem prek skajpa. Nesu babice kaj su negda bile!
V kuvinje, dedo i ja imamo babičin vintage kredenc, a je lepi da lepši nemre biti. Puno drevo, ručni, majstorski posel, još gda su ljudeki imeli zlatne ruke i žnima znali sekaj načiniti. Kuvinjske elemente, skoro nove nam je zet dovezel z Nemačke, a su i oni več pomalo vintage. Sejeno, spikaju pet jezikov kak su lepi. Makar živimo v globalnom, belosvetskom selu z mobitelima, televizorima, laptopima, kompjutorima i dronima, ja za obleku ne ostavlam peneze ni ne peglam kartice po Pete Avenije², ili oko Kurfürstendamma i KaDeWea³; ne zgubim se v londonskomu Harodsu⁴, kaj moj Jožek v huste gda išče vrganje. Da ne spominjem Olympiju i Kaufingertor v Münchenu, Dublinski Dundrum Town Centre ili Rhein-Center Köln. Tam moja deca kupuju a gda se zasite novih prnjki, donesu je materi. Onda ja kreiram novu obleku za se, takozvani retro stil.
Gda moj gazda ni domom, ja odem v šoping vu veliku sobu v naše bele hiže. Ak je on doma a imamo tihu mešu ili mrzli rat, kak je to sad več tri dana pri hiže, a detant ni na vidiku, ja šopingeram v miru po tem svem rudniku. Jožek je vintage dedek, a za dvajst let bu borme i antikni. Za tu titulu mora biti prek sto let star. Zato kaj je stareši od me i moj je muž, misli da je predsednik i vrhovni komandant vsemu živučem na našemu gruntu, i v naše lepe bele hiže. A, o tem potlem. Iskreno rečene, lepše zgledi i bolši je šef i gazda nek Trump i Biden skup. A mu ja to neču priznati. Gda o našemu braku študiram, setim se filma “Moje gerčko venčanje”⁵, gda mamica čeri pred venčanje tumači kak je muž glava familije, ali, žena je vrat, i zna se ko je gazda(rica)! Da mi je to imel ko reči pred pedeset let! Nek se dan na dan moram ze starim bosti.
Vu te velike sobe su odrasle naše četiri čeri, a još je jena soba prazna, zaprav skladišče vsega i svačesa kaj se pribralo čez leta. Tam su naša tri sineka spala i pisala zadaču. Al smo bili bogati! Cela kuća je imela krila a ja sem si zaradela četiri doktorata; z multitaskinga, vrtlarenja, vođenja farme, chefovse umetnosti kuvanja, bankarca-šparmajstora i kreatora dizajnerske retro obleke. Dobre šest, skromnost je vrlina, a bi i na veterine položila vrpu ispita od perve. To se zove živlenje i iskustvo. Grunt je cvel, išlo se naprvo! To su bili mučenički, a srečni cajte, puni muvinga. Navek bum Svevišnemu zafalna za negvo poverenje; desetero dece mi je na brigu dal: sedum sem ih rodila, onda Jožek, i negva babica i dedek. Bokčije bez penzije, doranjivali smo je više od trideset let.
Gda otprem svoje vintage, aufštafirung ormare, tu najdem vse kaj mi treba za moj moderni retro stil v oblačenju. Oprave, lače, bluzice, sviteri, taške, sandale i čižmice! Ko zna kuliko pari tenisic sem na štrike povezala po pet-šest pari i obesila na grede na plafonu, vuz stene, kaj češnjak i luk crlenec. A vse još za nositi bar leto dan. Vsaki dan morem obuti drugački par, bar dva meseca. Naj si Krivušićka i Gajgerica pregrizeju jezik od jala! A, neče mi se v babe pehati.
Kak su naše čeri rasle, školale se, išle na posel i udavale se, robu su nosile doma matere, na selo. Gda se moda vrne na staro, dojdeju nejne čeri, čak i moje prevnuke prekapati po tim ormarima. Vintage krpice su inn, vele. Ja, da bi reč rekla, mene je kombinerani vintage i novokomponerani retro stil v oblačenju lepi, moderni i inn otkak sem se rodila. Navek se pri bokčijske hiže šparalo, prepravlalo, krpalo i šivalo, re-dizajneralo, našivavalo, heklalo, štikalo i štrikalo. Vse se moglo skoristiti. Žensku decu smo babica i ja vučile puno tega, kak i mene moji. Nigda se ne zna kakve cajte bu pulitika nanesla. A sad se i strav od promene klime navlekel v kosti bokčije.
Izim kaj ta roba niš ne košta, materijali su prirodni, ne grebeju i pikaju, kaj stara česala. Nesu je negda tkali od mlevenih plastičnih flaš. Nektere traperice su se v šoseke i torbe vrge, a kikle i trudničke oprave su i po dva put predelavane. Pod zadnje su i vu fertune. Komadiči kaj su ostali od krojenja su negda bili spirki za posude prati, a ak bi se dendenes i obojki nosili, još bi krpe v čižmah zdržale jenu zimu.
Ja volim lepe pregače. Ni mi žmefke pred sudoperom stati gda mislim na svoju Ljubicu kak je lepa trudnica bila v te kikle, primera radi. Ja i moja stara Singerica, za čas na vrpu denemo kaj trebam, originalno, kak niko nema. Tu i tam babe v selu okrečeju oči gda me vide v nove kreacije na beciklinu, a pogotovu gda na glavu denem škrlak! Bog i bogme su se Bože Šušekice razbežale očne jabučice od mirakula, gda me je z jobluka sve hiže na ceste znenada opazila. Sad joj jeno oko gledi v Križ a drugo v Novoselec. A si mislim, to je božja kazna. Ili karma. Kaj nu briga za moju modu! Z druge strane, ja ju posvema razmem, nemre si stara štreberica pomoči. Živi vu vintage drevene rame kaj kakva sepia slika, ili kak Marekovička filozofera gda je pod gasom, kaj drevena Marija. Nikak se genuti naprvo i biti svoja. Gajgerica mi soli pamet da je Boža svoja gda ni svoja.
Dosad, kravice nesu prigovarale mojim modnim kolekcijami na štalske piste, a prasica Zumbulka mi je strgnula šircl i v svoju kopajnu ga je skrila, kak joj je lepi bil. Kobila Breza mi je štela novi, retro lajbek vkrasti, zgrabila ga je z onem svojim zubmi i rasparala jen šav, a sem uspela odskočiti i spasiti ga. Pevec Marko svaki put skoči na moje rameno gda me vidi v žutomu sviteru čeri Ankice. Još gda je išla v gimnaziju ga je dobila od vujnice Vugerice. Prelepi i topli, od kozje vune, borme su se sestre svadile ktera je na redu, joj ga Anči ima posuditi gda se išlo v kino ili na zabavu. Čtem na the internetu, mesec je počel hrđaveti. Kak ne bi babica v letam kak sem ja? A onda, tu v ormarima, ze tum dečjom robicom, setim se vsega. Z vrečice zvadim anjpideklin, kušnem ga, v njemu sem svoje bebe dragala.
Moj kompjutor mi je veliki pajdaš. To su mi deca složila od svojih starih strojčekov. Jožek na kavuču svaku večer dudi pred televizorom, a ja imam svoj PC. Tak održavamo primirje v hiže, kaj bi ja vraga išla gledeti dede kak se tučeju ili kojekakve zgubidane kak loptu nateravaju po livade! A, gda me vidi da nekaj Guglam, on poludi:
“Za babu je kuvača, dojača, jograda i vrt, kakvi kompjutor?”
Vintage mudrost, bilo bi bolše da čkomi. Kam bi mi babice došle da sme dede poslušale? Bi celi svet još bil v srednjemu veku!
Gledim, amerikanci su v ščekivanju buđenja dva velika roja cikadi ( Magicicada cassinii) v isto vreme. Jen star sedumnajst a drugi trinajst let. Ti kukci naprave invaziju na Washington DC i okolne deržave, imaju ratno stanje na mesec dana. Črčki ostave podmladek koji se zakopa v tlo, oko dva metra gliboko. Gda dojde vreme, popneju se na svetlo sunčeka, a milijarde nih znaju narediti nevugodnosti amerikancima, kak rečimo, zaštopati eroplanu motor, zajti pod kapu šoferu traktora na farme, zavleči se v rukav bicikliste, zaplesti v dekline lasi. Tiči se polakome i prežeravaju. Potlem se zdeblaju i mora im se davati leke za mršavlenje da ne zgube moč letenja zaradi pretilosti. A gda se črčke cvrli na roštilu, znaju biti neposlušni i koturati se, ritati i bežati proč.
Denes v jutro, gda je Jožek ložil peč, zamotana vu vunenu, vekovečnu Vuteks deku, štela sem se žnim pospominati o našemu živlenju; vintage nameštaju i retro stilu naše obleke i firangi. A me je pogledel z onimi plavimi očmi, da sem mam začkomela. Znam kaj bi bilo: „Su ti pak bedastoče na pameti, Guglekica?“ Sad, zvečera, pita on mene, jel bi mu štela pudinga skuvati, baš se zaželel, onak teploga z ranjgle. A ja, študiram, bi ili ne bi išla pak k šparhetu. Am je pozabil na naš zdeni rat! I sama sem se komaj setila zakaj se durimo več tri dana. Ni v pitanju nafta, ni voda, ni železna ruda, granice, livade, niti kojekakove bedastoče kaj je zoveju ideologije. Zaradi vražjega grava i repe ze svinjskim kožicami i zaradi cušpajs poriluka, a mora se kuvati z belom kobasom. Točno onak kak je pokojna babica kuvala. Retro rana vu vintage kuvinje za skoro antiknoga deda! Am su i šparhetu dojadeli…
————————————
¹Švicarski vojni bubnjari
²New York, smatra se najluksuznija avenija na svijetu
³Berlin
⁴Luksuzna najpoznatija robna kuća u Londonu
⁵ Film “My Big Fat Greek Wedding”, (SAD, 2002.)
Manje poznate riječi:
Vintage – očuvana, originalna i jedinstvena stvar stara oko 20 do 100 godina
Retro – nova stvar inspirirana povijesnim stilom
Zestati se – sasati se
Banjek – uzvišenje oko zidane peći
Pateka – ljekarna
Šlabekovati – brbljati
Šprehati – pričati
Brzoglas – telefon
Obleka – odjeća
Aufštafirung – miraz
Izim – osim
Mirakul – čudo
Kibicirati – gledati sa strane
Šircl, fertun – kecelja, pregača
Gliboko – duboko
Potlem – poslije
Srbeti – svrbjeti
Vteknuti – umetnuti
Komaj – jedva
Duriti se – pokazivati uvrijeđenost, ljutnju
Bela kobasa – Svinjsko debelo crijevo punjeno svinjskim mesom i kukuruznim brašnom ili kašom