tekst i foto: Đurđa Vukelić Rožić
Gospa Marićka se doselila v naše Gornje Moslavačko Selo pred tak šest-sedem let. Kupila je hižu pokojnoga Mateka Rastića. Otkak je vudovica, od jene penzije ni mogla plačati račune za lepi stan v centru Zagreba, a da joj nekaj ostane za flizera, izlete z penzionercima i mesec dana toplic po zime. Prodala je stan, novčeke dala na šparanje, i to v jenu od banki kaj ju je sto posto proverila da ne bu bankroterala, da ne pere peneze od droge, prodaje oružja i ljudi. Banka za pet.
Gda se je v selu lepo smestila, počela je oko hiže saditi kojekakve cvetuče grme ili kak je ona to zvala, egzotično bilje. Moj Jožek joj je preoral i stanjural komadić zemle za vrt, navezel gnoj, a livadu kaj je dobila z hižom nam je dala za kravice naj si kosimo seno i detelicu, kaj ne bu šikara rasla. Za seno sem joj kontu od litre mleka vsaki drugi dan zabadav nosila, i friški sirek z cedilke vsaku sobotu. Gda sem stepala puter, računala sem komadić tak dvajstpet deka i za nju, a i kokicu za juvu, tu i tam. Znala mi je dati pelcere ili sadnice cvetja. Bile smo si dobre, nigdo nikoga ni skoriščaval. A to se retko najde.
Ona je bila med prvima kaj mi je pripovedala da se moram zase starati. Kaj prvo, nesmem po dvorišču hoditi v trenirkami i starim, krpanim sviterima, neg lepo oblečena. Moram obrve prirediti, lepo prepukati, a če je ne redim, mam se vidi da sem zaostala. A bolelo je kaj sam vrag. Špotala me, moram v rukavicami delati na polu i po vrtu, kaj bi mi ruke bile nježne kak ruke jene dame. Vsaku večer moram tabane ribati i nofte brusiti z dijamantnu turpiju. Vsaki mesec iti k doktoru na kontrolu tlaka i cukora v krvi, vsaka tri meseca k zubaru i vsaki tjeden k flizerki. Skinuti i pozabiti na rubec, pofarbati lasi. Pravi pravcati make over, bi rekla moja vnuka Ivana, a znači vrhunska preobrazba. Prava muka, a košta novci i cajti. Ondak, dama mora imeti bar tri torbice, belu, smeđu i crnu. Plavo se ne sme nositi ze smeđim. Na sportsku robu idu niske pete, a pod uske šose i kostime mala, vužeša petica ili štikla. I ko kruna vsemu tomu donesla mi je – tri škrlaka. Jen gda delam po vani na suncu, jen gda idem med ljude, lepi svetli ze svilenim cvetekima i trejti, crni, gda idem na ispračaj na grobje, na sprevod ili na cifrastu večeru, dodelu diplome vnukima i kam več treba. A ja nesem znala kak bi joj rekla da nemam kuražu deti ta čuda na svoju glavu. Da bu to katastrofa.
Jožek je čkomečki grizel vusnice gda je videl da namesto da štalu skidam i svinje ranim, ja svoje nofte glancam, a na ruke mečem finu kremu, kaj bi zgledele kak ženske ruke. Več ni štel da mu režem kruva ili čistim češnjak za gablec posle večere vuz televizor, bi špek i suhi sirek smrdeli po te pomade. Na večer sem štrikala pri televizoru i noge močila, ribala i riflala tabane. Več za dve nedele su bili kak pri novorođenomu detetu, lepi, nežni i rozasti.
Jožek se je duril i čkomel. Moral je od kauča pred televizorom v boravku sam iti po kekse i mleko v kujnu. Čak pet metri za prejti! Za čas, po deščicu i malo špeka i luka. Nekaj slano mu je falelo zbogradi reklame za salame i baš ga je prijela želja za marednom med obrokima, za brunch-gablecom posle večere, nekaj cajtlos fino za pod zub, da se lepše spi. Ja bi ga podvorila, kak i vsa ta leta kaj smo skup, ali noge sem imela v škafu. A to se poštivle. Gda su noge v škafiću, nikaj se ne mora. Žmulil je z vusnicami, oči su mu bile vse vužeše, ali ni se ufal vikati na me. Ja sem otkrila svoju žensku stranu, nežnu i lepu. I tužila bi ga gospi Marićki da me je špotal, a ona bi ga samo pogledela onak poprek spod oka, ruku dela na svoj umetni kuk, i pitala ga: „I onda, kak sad to, dragi gospon Joža?!“ Samo Bog zna kaj si je Jožek mislil. Morti da sem se zaljubila vu kakvoga selskoga fulira!
Došlo je vreme velikoga proščenja v našemu selu. Gospa Marićka je lepo poprosila Jožeka naj bi zapregel konje i odvezel nas pred cirkvu. Gda je štela, bila je slajša od kante meda! A gda ne, onda je zujala i pikala kaj roj stršlenov. Rekla je da bu platila dve kile janjetine i pivu, bumo si seli, malo pojeli i pripovedali ze svojim ljudima. Jožek se je zrihtal, zalejal se z novim after-ševom, ak ga u gužvi na proščenju zgubim, bu ga nos mam našel. Zapregel je kola i onak lepi sedel i čekal nas babe. Ja sem obula sandale z peticom tak dva centimetra, tamno plave, moja čer Ljubica ih je hitila na tavan još prede neg se udala. Zela sem belu tašku i letni, plavo-beli karirani kompletić. Dobila sem ga od vujne Vugerice ze Zagreba gda se zdeblala i ne ga mogla obleči. A se prenaglila. Gda su penzije postale tesne je zmršavela I štela ga je nazaj, al ne Bog dal. Skoro novi. Štela sem da bu gospa Marićka zadovolna ze svojim đakom i preobrazbom, a i deca gda me vidiju na proščenju, da je ne bu matere, selske stare babice sram.
Gospa Marićka me je čekala pred vrati hiže. Ni mi dala ziti z mojega doma bez škrlaka na glavi. Bome je bilo gusto! Jožek je sedel na kolima i pokazival mi da bum vidla svojega če zo tem čudom pokrijem lasi. Marićka je rekla da se z menom više nigda ne bu spominala če pem bez škrlaka kaj mi ga je lepoga i skupoga daruvala. Jožek me je gledel i ponavlal jenu reč bez glasa za Marićkinim plečima, i grozil se z onom velikom, mučeničkom šakom stišnjenom oko bičala znad francuske kape na glave. A če sem dobro prečitala z njegvih vusnic, ta reč je bila: „Kurva!“ Valda je štel reči da bum z škrlakom zgledala kak kakva gospa kurva. A nesem ni znala kak to, ta kurva zaprav zgledi, pak sem se pitala, a kak onda on zna? A ja sem se bojala da bu prigovaral kaj sem k flizerki išla, a pod škrlakom od flizure niš.
Gospa Marićka je štela da denem škrlak na glavu i pokažem da sem dama, a ne selska baba. Makar je to istina. Vredna sem i uredna ženica kaj bi se žnjom falila mamek i babica, da su sirote još žive. Rekla sem joj da mi se selske babe buju smejale, a gospa Marićka me je tešila da je takvo ponašanje na selu dokaz da su oni selaki a ne ja. Još je rekla naj gledim engleske serije o devetnajstom i dvadesetom veku i da bum vidla kak su pri njimi selske babice još onda nosile lepe škrlačeke. To je kultura, žena se onda lepo oseča gda o sebi vodi računa. Onak sigurna vu se, gde god bila, i z kim god se spominala. Tabani, nofti, obrve i škrlak! Taška na levoj ruki, dlan na pupku.To je zakon! Kaj kralica. To leto sem imela lepo belo lice, nos i vrat. Nesem bila zgorena od sunca kak druge sirote žene, a to ni dobro za selo, kvari tradicionalni moral petnajstoga veka.
Gda je Tomek Hrastić vmrl, brat od našega pokojnoga suseda Mateka, njegvi su hižu prodali Marićki, još su se sprovodi pešačili celim putem. Od hiže pokojnoga z onu stranu Save do grobja na naše strane, bilo je daleč za hoditi. Z kolmi smo se odvezli z našega prelepoga Moslavačkoga Sela do skele, pešice ze skelum prek Save raven v Posavinu, a kočijaši su odvezli kola na grobje i tam se kartali v ladu. Da mi moremo othoditi sprevod kak tradicija zapoveda.
Dugačka kolona, ljudi z pet sela, pratili su pokojnoga, išla je cela limena glazba i celim putom tulila, kak da je Tomek Hrastić bil general. A bil je birtaš, imel je čak četiri krčme. Tej se naposlušal jadi i pripovetki za šankom, mudri čovek i pravi selski psiholog, vsakomu pajdaš. Pomagal je savetima kak je najbolše znal. Sunčece je sijalo, ljudi su imeli reš pečeno lice i čelo. To je bila žrtva i poslednji pozdrav svojemu čoveku. A ja sem imela svoj škrlak! Lepo sem hodila v ladu. Babe su me gledele i čkomele, onak skuvane, pod svojimi crnimi rupci. Istina, imela sem i lepezu v taške, ali se nesem ufala žnjum mahati, gdo zna kaj bi mi onak razbelene na suncu naredile.
Gda je celi sprevod z pokojnim prešel z njegvoga doma, na gruntu je ostala vnuka i jena sneja, a došel je i snejin brat. Ne se smelo imanje ostaviti samo, bi domači tati onda došli na svoje. Znali su oterati teleka z štale, pokrasti jajca, pobrati papriku ili paradajz na vrtu, nekaj halata, več kaj im treba. Kumu Dragiću su, gda je bil sprevod njegve babice, vkrali sekiru z panja na dvorišču. Staromu Mihaljeviću su stočili trist litri vina z podruma pod hižu. I to pravoga kaj je imel za se, ne delanca! Zaisput su zeli punu sirnicu sirekov, visela je pri zdencu na dvorišču. Ni bila retkost da je negdo spuzal na tuđi tavan i pobral suvi špek i češnovke. Ili spraznil škrinju. Tak su spunjavali pravilo one poslovice kaj veli da nigdar jedno zlo nejde samo.
Svi smo bili na skeli, čkomeli, gledeli v Savu, ja sem se čudila svoji teni pod tenom škrlaka na vodi. Skelar je prijel kormilo, pomeknuli smo se. Kad tam, po cesti na nasipu beži curička, vnuka od pokojnoga i maše z crnim škrlakom: „Dedek je pozabil škrlak, dedek je pozabil škrlak!“ Došla je do vode i ni se ufala skočiti na skelu, tak, pol metra. Hitila je škrlak na lađu, a veter ga je odnesel. I tak je naša Sava dobila svoj škrlak.
Gospa Marićka je prodala hižu, pak se v selo i našu hižu vrnul mir. A i zaradila je trist posto te nekretnine. Novim susedima z Mustafine Klade, kaj su se tek venčali, nesmo spominjali divje svinje i zrovani Marićkin vrt. Istini za prav, Jožek je potrgal plot i zgazil Marićkinu papriku i šalatu, to sem na svoje oči vidla. Oplel je štrik oko lopatic naše Belke, krmače i pustil ju naj tanca po susedinom vrtu, a prasica je dobro zrovala vrt po mesečini. I uništila prelepe egzotične grme. Da bi reč rekla o veverici kaj je opala v nejni zdenec (bila je plišana, od naše Lorene ze Zagreba, op. Ifkica) ili o kantami kaj su je selski tati pokrali gda je ona špancirala cucka i škrlak po selu. Gda se je odselila, Jožek tem dobrem mladem ljudem ne glumil ni divje svinje, ni tate. Da bu v hiži mir, svoje sem škrlake odnesla na tavan. Sad sem znala, če bi štela i da sem si bila važneša od sela i Jožekovoga mišlenja, mogla sem i kralica ze tim škrlačekima biti, samo je pitanje jel bi mi to sreču doneslo. Dok gledim televiziju ze svoje fotelje, štrikam i mislim si svoje, Jožek dremle na kavuču i stiha cvrči kak cvrček, bome ni on za hititi. Em je zgodneši neg puno teh tam v tom televizoru, kaj delaju bedake ze sebe za peneze. Gda se podbrije, obleče svoje svetečno odelo, zaleje se after-ševom i metne škrlak na glavu, ma, lep je kaj slika!
