piše: Đurđa Vukelić-Rožić
Ovo kaj mi se stalo prošli mesec ni za veruvati. Žena sem v zlatnim letam, tak se to po novomu veli, a sem zaprav – babica. Boli, a, kak je, je. Nemrem z te kože van. Korenje sem pustila v svojemu prelepomu Gornjemu Moslavačkomu Selu, točno kak sme negda v spomenarima pisali:
„Od kolevke pa do groba…“
Babičin i dedekov grobek okaplem i sadim cvetje, to bu i moj vekovečni dom. Se kosti naposletku počineju. Dala sem ljudem i svojemu kraju svoje celo živlenje. Kuvam from the scratch, rojeni foodie sem. Moji nuki me teše da je to moja supermoč.
To da su denešnje moje osemdesete lete nove pedesete, ak se mene pita, to ni po istine. Te denešnje po novomu moje pedesete su sad moje osobne dvadesete! Moram oko maloga deteta pak tancati 24 vure na dan. Svevišnji ima posebne račune z demnu i poverenje vu me, baš Mu fala. Z ono sedem svoje dece nis spala celu noć skoro deset let. I sad pak. Nis rodila ni ja, ni moje čeri, ni snehe, a bome ni vnuke, i one već imaju decu v škole. To malo dete je moj Jožek! No, gazda. Muž“ Žnim sem pred oltarom stala. I gda je žmefke, setim se onoga: „V dobru i zlu!“ Bedak stari, išel je z Tomeka Vinkovića skakati na zemlu kaj da je dečec, a negve osemdesete nesu negve pedesete, ni mislit! V draču je čučal kamen, veliki kaj stumbana dvelitrena ranjglica. I kaj, strgal je gazda gnjat, goljenicu, goljenjaču, cevanicu, potkoljenicu i golijen, a kaj je vse jena te ista kost. Tibija. Marekovička ga je čula kak vežba celi repertoar kletvi kaj da štreba lektiru napamet i dobežala je na naše dvorišče. Bila je pod gasom i mam je komentirala: „Kamen si je štel flautu od tvoje tibije narediti, kaj ne Jožek?“ To je valda trebalo biti smešno, alkoholne pare od bedaka narede stand-up komičara, ili kaj? Mene je došlo da ju prevrnem v kopanju punu vode, am su se frule od jelenje noge spelavale. Te flaute stareh Grkov su se zvale aulosi. A bi se maslečna baba v to malo vode mogla vtopiti, kaj sem onda? Morala bi navleči punu kopanju friške vode da ju pijanu zdrži! Jen cirkus na dan dosti.
Bil je to lepi, čisti prelom, rekel je gospon doktor. A napukla je i sestrinska kost imenom fibula. Ja sem bila na dva metra od njega gda se to stalo, am je to zahrskalo i puklo, čulo se kaj pucanj Gričkoga topa, gda ga poslušaš z mosta na Save, a most škriplje gda se preveze kamion, kaj da se drobi. Bi reči most na Save v Zagrebu. Kak to več ide, pol sela je priskočilo v pomoč, negdo se setil hitnu zvati i ve ti ga na, Jožek se zležaval v Draškovićeve vulice sredi metropole. Aperacija i mam je bil glavni v selu. Al bu storije slagal, deset let! A i dober izgovor zlata vredi. Ak mu se štelo metropole, mogel je otiti do nektere zagrebačke fontane, pričekati da mu se želja ostvari gda hiti koji cent nuter i sedeti v kafiću. Ni trebal nogu strgati kaj bi sveta videl.
Krivušićka je nazvala svega bratića kaj dela v gipsaone v te betežnice, a ja sem mam rekla zbogom punomu runjaku mojih prefinih suvih sirekov. Vse za vezu. Jožek se vrnul z prelepim gipsom, skroz do kolena, nesu šparali. Mene je to bilo smešno, kaj da su mu nogu v sir zamotali! I ni misliti stati na tu nogu. Deca ze sela i vnuki su risali srčeca i cveteke po njem. Morala sem kupiti dve kile čokoladnih bombonov za mito, valda kaj zavet da noga dobro zaraste ili da bu zapamčen od budućih generacij. I zubarov.
Za babe kaj sem računala da buju došle na moju novu kuvinju z pultom lukati, pačiti i dodijavati, vuz izgovor da očeju Jožeka obiti, spekla sem apfelstrudel na bečki Vienna način, cukor v prahu nesem šparala, te moja savijača je bila bela kaj da ju je pokril aljaški sneg. Cukraste nevole buju šnjofale cimeta i vaniliju, merile si cukorstaj i pikale se z inzulinom prede neg zagrizeju v moju deliciju. Tak ne požereju mam vse. Za dede sem spekla punu košaricu slanih čvarnjakov z preveč bibera, tak da traju.
Zajutrek se kuval, gda se beba prebudi da mam dobi jesti, prede neg se počne cmizdreč sramotiti. Čim se razdanilo, beš bezvremena i novovremena Ifkica, ona od osemdeset let z onu od pedeset i pod ruku z curičku od dvajst, štalu kidati, napukati kravicam slamnatu postelinu z kupa, nakositi im vrh trakač fine rosne travice, svinjam oprati kotec z šmrkom i naraniti je, živad pustiti, a vse treba frišku vodicu. Podojiti kravice, raznesti konte mleka po selu, odvesti višek mlekeca v laktofriza i trk nazaj, svoje bebe dati jesti i skuvati kavu. Onda, včini baba sireke od čerašnega mleka, operi čupeke i posude od jela i kuvanja. Gda je cvetje z mega cvetnjaka v dve vaze aranžerano, jena na velikom stolu kaj glumi blagovaonu, a druga na coffee tableu dnevnoga boravka, onda je to to.
Ob osme vure je početek prošecije. Plitvičke stezice nad vodu ili Francek Jožekova (Franjo Josip I., Franz Joseph I., Ferenc József I. František Josef I., Franț Iosif I.), špancirsteza Lungo Mare ni niš v usporedbi z promenadum kaj je ova Sisi-Ifkica kralica imela v svoje kralevske hiže zaradi svoje bebe. Da sem naplačivala vulaznice kaj grad Venecija, imela bi v črnomu fondu dosti penez za platiti si kruzera po Česme, od Velikoga Grđevca do Gornjega Levoga Česmanskoga Sela.
Gda je moju bebu došla videti Slava Sprdačova, ja sem dobila mlade! Mam se zavlekla v kuvinju i pustila rit na moj radni stolec pri obluku z pogletom na cestu. Jelo je bilo zgotovleno, trebala sem iti na vrt po šalatu, a nesem se ufala kuvinju ostaviti babe za kontrolu. Morti bi i šaku soli hitila v jelo, ili kak je pokojni Ivek Sprdažok, pokojne susede Šperičke vkral hrgu kuvane govedine z lonca juve. I kaj sem onda, kaj bu beba jela? A Jožek mi se z kavuča podsmehival! Setila sem se da imam flašu filane paprike ze zeljem vu frižideru, bu moralo biti dobro z pečenjem.
Ak je vreme jelu, naš selski bonton nalaže da šalabajzera kaj dojde nepozvan, treba z jelom ponuditi i za stol posesti. Ova gospa ne bu obedvala, več je ona to obavila. Gda je primetila da vusput režem i furim deset glavic kelja za v škrinju, naj bi gredicu na vrtu očistila, posejala šalatu i popikala lučicu kozjaka, mam je zinula:
– Zakaj furiš kelj ze slanu vodu. Moraš nuter deti cukora!
– Zakaj si v noklice za juvu zmešala paštetu, to se mora guščja jetra strugati i z grizom zamestiti v jutro. Mora stati do poldan.
– Zakaj si štrudel zalejala z vrhnem, treba kupiti kremu za kuvanje, kaj na reklame na televizije
Zakaj ovo, zakaj ono, moraš ovak, moraš onak, a mlajša od mene bar trist let. Nema poštuvanja prema starešoj ženi, a onda se setim da su mi osemdesete denešnje pedesete, frčna sem i imam bebu…. Još me bu nevola po šibice poslala. Niš ni kak se čini. Moj visoki tlak me je grejal kaj da je lava z vulkana prefučkala po kuvinje, skuvala me i spekla od tabana do vrha glave. A vele da se tlak ne oseti, vraga oni znaju! Gdo bu onim stradalnikima v Pompejima sad još i tlaka meril?
Gospa je z taške je zvadila darek za Jožeka, lepu, jaku bateriju i poželela mu naj nogica lepo ozdravi. Valda je trebal svetliti strgane kosti naj bi je svetlo je skazuvalo put. Kak bi imače znala zarasti v tunelu od gipsa? Velim ja gazde, ni čudo kaj je sama, gdo bi z tu zločestu babu spal? A moja beba ni pet ni šest: „Tomek Bartolić, Ivek Munjarić, Štef Kontraš, Mirek Klempavec, Dubravko Nosić, Jagica Pokornova, Nada Šlamparova i Pepek Šoštarić.“
Pobegla sem videti kravice, pobrati jajca z gnezda i ravno na vrt. Ni dece vse za veruvati…