ŠTORIJE IZ MALOG MISTA
piše: Jadran Šantić Šangarelo
Znan odma da čedu se oni dežurni i grintavi garzuni upitat ma kakve veze jema mali pas i priče o moru i oko mora. Ma svejedno ja san mora ovu lipu i smišnu priču notat na kartu da je nebi zaudobija.
Dunkve bilo je ovako. U nas u našu državu radidu se popisi judi da bi se znalo očeli nas na izbore izač četri i po miljuna oli pet jerbo je praksa do sada pokazala da nas o normalni dan jema oko četiri i po miljuna a bome kad se gre glasat onda nas jema gospemi i pet miljuni.
I tako jedan dan dođe popisivač ča sve notaje nanike formulare u moga dragega prijateja Mačka.
Ma čuli ste za njega jerbo san o njemu več pisa u mojin štorijama. Kako je ti moj prijatej rođeni zajebant koji po noći dok spi sanja kako če sutra koga zajebat …za ti dan nije se baš spremija, a more bit da nije moga sanjat i oti popisivač ga je malo zateka.
Ma kako moj prijatej Mačak nije čovik o sporega mišljenja odma mu je napamet pala barufa a sve bome vezano za ti ozbiljni posal popisivanja sve žive čeljadi i beštij.
Moran se vratit malo unazad da bi van sve bilo kjaro. Moj prijatej jema zeta lipega, pametnega mladića koji je napola bosanac, a mater i otac mu živedu u Sarajevo.
U međuvremenu se rodija Mačku unuk lipo šesno dite sa velikin vlasiman, a svaka mu dlaka na glavi svoju pulitiku vodi i poslin dva miseca čer i zet odluče otić na viđenje u Sarajevo sa malin Bornon.
Kako u kući jemadu jednega lipega malešnoga a jako pametnega pasića oni bi ga vodili sebon jer okad se mali Borna Mačkov unuk rodija ti pasić se razboli o đeložije.
Dunkve ispalo je da pas ne more u granice bez pašoša ka ni mali unuk Borna pa Mačkov zet i čer uredno učinu pašoše za malega ma bome i za pasa koji je dobi i čip ispo kože tako da ga se uvik more nač.
I da se vratin na temu ti popisivač lipo i šesno pita sve ča je potribno za zabilužit o sviman u kući i deboto kad je tija partit kaže njemu ozbiljne face Mačak …čekaj asti boga …zaboravi san zapisat podatke o momen pasu.
Zableušija se popisivač i ništa mu ni jasno ma koji pas, ma kakvi pas, a Mačak ka iz topa … a bome moj.
Kako se more zabilužit prasce, kokoše, tuk,e koze, ovce, i drugu stoku sitnega zuba …bome triba u ti popisni buletin zabilužit i moga malega pasa. Piši lipo …star je toliko i toliko …jema čip broj taj i taj i lipo mu notaj ime i bezime. Gleda ga čovik u čudu …ma kako mora sve zapisat ča judi očedu raspakira on svoji boršetu o plastike i piše sve o pasu od pasmine do imena. I kad je tribalo sve lipo notat, skoro je afana …kad mu je Mačak reka piši Šorti S…… Čovik gleda i čudi se …znan da pasi jemadu ime …ma bože oprosti nisan zna da jemadu i bezime, ma isto on lipo upiše i tako se završi Mačkova zajebancija. Kad mi je sutra dan ispriča …skoro san se udavi o smija i nismo znali oče li Šrti dobit poziv za glasat, ka i svi oni pusti Ercegovci ča su na izbornin listan, ma oko ne dobije poziv Mačak će se žalit Državnom izbornom povjerenstvu uz naznaku da je to diskriminacija.
Ma ako pas more jemat pašoš, knjižicu za u veterinara …onda jema i sva ostala prava.
E skoro san zaboravi Moj prijatej Mačak je fetivi Dalmatinac rođen za vrime drugega rata pod okupacijon Italije u Milnu na Brač i veliki je zajubjenik u more bivši vaterpolista i da ne dujin ča još …ma ti njegov pas je pravi prašinar, jerbo se boji mora i ne gre u more priko lita, ne bi uša da ga ubiješ, a to moga prijateja Mačka strašno mući, vidit čemo oče li se ovo lito ča promonit.
Živi i veseli bili štioci dragi pozdravja vas vaš morski čovik Šangarelo.