piše: Jadran Šantić Šangarelo
Kako san se spremija da zimu učinin u metropolu ove zadnje dane sve ništo mislin da bi mi bilo boje dikod drugo bit lovit ribu i samo čitat sve ove pizdarije koje se događaju u Lipoj Našoj.
Živija san turbulentno ča oče reč sa puno svakakvi da prostite sranja oko mene ma da ču ovako provodit starost nisan misli ni u snu.
Kad san se prijavi ka dragovojac marča miseca 1991 mislija san gren pa ča bude a u duši san zna da čemo pobjedit jerbo je to kroz pismu najboje ispiva naš lipi vlaj Žanko pivajući onu Od stolječa sedmog. Mislija san da če nan u našoj zemji bit sve ka med i mliko jerbo nan triba samo zemju uzdizat i ostavit je dici bogatu izgrađenu kultiviranu bez mržnje i da nan dica nikada više nimadu nikakve dušmane i ratove kontra nji.
Jo štioci moji ča san bi skroz inberlan jerbo mi ništa ni bilo kjaro a nikako mi ni bilo na pameti da čemo svoj narod i vlastitu zemju zajebat upropastit i opjačkat.
Moran najprin krenit u noviju povjest jerbo se moreš prave vode napit samo na izvoru. Izgleda da oni koji su se busali u prsi pa i oni oko nji kad su svi vikali IMAMO HRVATSKU nisu mislili nju podilit cilemu narodu vengo samo kako je reka naš najvažniji šjor dotur na dvista bogati fameji a danas ispada da ostaliman poslin te podile ništa ni ni ostalo.
Svaki dan u foje izajde niki bombastični naslov o nikoj marčapiji joli lupeščini a bože moj uz to gredu i puste laži i privare pa ko to more razumit. Ja se jako teško u svemu temu snalazin i da nebi dikod vanka u gradu upa u kakva verbalna sranja joli nedaj bože kakvu fizičku barufu virujte ne volin puno ni vanka odit.
Neznan odakle bi van počeja nabrajat . Notava san na kartu par puti o našaj najtežoj bolesti a to je mržnja i podila na crvene i crne, i zna san osovat kvargu i jedni i drugi ča se ne ostave onega ča je prošlo i za nevirovat pojavi se ka po pravilu niki duovnik crikve pastir u hrvata i zametne novu smutnju sa starin zasadaman. Za njin odma ka lavina oni koji su optuženi reagiraju a onda se pojave oni, koji, Zna se i još jače potpale onu jarpu koja gori i tako u nedogled. Samo ka vampiri čićaju krv i život iz ovega jadnega gladnega i nezaposlenoga naroda i ove naše prilipe ali izgleda proklete zemje.
Moran reč da san i ja mislija da su lopine samo u stranci Zna se ma je gospu lopina je lopina svugdi a kako izgleda i kod ovi ča jemadu demokratski poklonjenu vlast od naroda jemadu i svoje lopine i to bogami sa priličnin apetitiman. Eto ispričavan se stranki Zna se ča san samo na nji baciva drvje i kamenje kad sad isto tako bacijen i na ove na vlasti ma jopet ne odobravann metode kojiman se služe za rušenje vlasti pa čak kad određene izjave bacije po fojiman i oni šjor diplomant.
Kako ja otvoreno napadan način komunikacije našega premijera jerbo ka da žive na nekomen drugemu planetu moran ga malo i obranit pa ni ni on za sve kriv jerbo jema slabu momčad koja nezna zabit gol opziciji koja stalno bacije upjuvke. Triba naglasit da je kriv ka i Niko Kovač ča je izabra slabu mašu kojon zapovida. Na tapetu su sa čakulama koje su poduprili dokaziman izašli oni ča nima kose Zmajlović, pa oni također bez kose Vrdoljak ,pa oni ča su ga šuperali Linić, pa onda oni ministar o cesta Dončić, pa onda šjora gospoja prva zamjenica premijera koja zna puno govorit sa zadrškaman da izgleda smislenije a ništa ne reče i ne čisti isprid svoji vrat o državnega aparata pa da više ne brojin. Sve su to gnjili kumpiri.
Evo sad najnovije, mislija san da se poslin moga lipega Splita neče više događati narod a e, lipo san se zajeba. U sri metropole u jednu ulicu koja je žila kucavica grada a zove se Savska digli su se šatori. 100% HRVI protestiraju i uz pomoč onega Josića i Klema koji stalno huškaju kontra vlasti i koji su bili glavni zagovornici lani u Vukovaru. Jopet oče da ruše demokratski izabranu vlast ka da su jin judi dali punomoči napismeno za taku rabotu a to bi značilo da više ne tribamo izlazit na izbore jerbo če misto nas svi glasat nji dvojica. Ma da ne bi bilo.
Ža mi je HRVI koje niko stalnio pumpa i koji ionako lošega zdravja patidu ispo šatori samo sriča da još nima leda i zime jerbo bi tek unda najebali. Moran reč da me isto bilo jako krivo ča su pojedinci malega Glavaševića optužili to su insinuacije koji se ne bi ni Gebels sramija. Pa zar su zaboravili da je njegov Pape bi junak i da je mali najeba o rata pa di je tu pamet i ko to takve strašne konstrukcije stvara. Mislin da na to tribaju niki odgovorit. Pa unda udar na bidnega Freda Matića za kojega zajedno sa svojin najbližin kadron traže ostavku. Malo moregen jerbo mislin da su se priračunali očekujući da če se Milanović pripast i udovojit jin samo zato ča to dil branitejske populacije išče.
Judi moji ni dobro i gotovo. Ja smatran da smo mi braniteji oslobodili Lipu Našu i dali je na upravu pulitičarima koji su na kraju ispali svi pokvareni i mučki, a sad bi poučeni na najgori način tribali birat u vlast jude sa imenon i prezimenon a ne stranačke liste i koga izaberemo ako ne vaja triba zakonska klauzula da mu se more dat šup karta i sminit ga.
Teško če se ovo vrzino kolo odmotat a da svi budu zadovojni. Puno se žuči izlilo tamo di ni tribalo i unda ka grom iz vedra neba jopet tamo niki pastir duovnik dovodi ka stado dicu iz skule i to organiziranin autobuson ka za ekskurziju da obađu prosvjednike ka da su oni povjesna joli kulturna baština joli muzej pa to nigdi nima i oni šjor Bozanić muči njanka besidu kritike svomen podčinjenemu ni uputi. Ka da mu je maška pojila jezik a mislin da če i njemu njegovo maslo teško ko moč oprat sa glave i obraza.
Moran ovod spomenit i tri naše heroine šjoru Željku Markić zatim poznatu policajku šjoru Ružu Tomašić i na kraju uglednu činovnicu najjače aparature rata na svitu šjoru Kolidu Grabar Kitarević. Prva je izbila državi a unda i narodu puste miljune kun za referendum. Druga se lipo fudrala u Evropi i onda dala ostavku ka prešidente jedne jake stranke koja je u timu Zna se a treča naša dama je kandidat za prešidenta o države ma je odma na štartu učinila nike greške u koraciman i zabila sebi i stranki Zna se atogolčinu.
I Sada novi momenti. Kako su je iz generalskog zbora odbili i ne žele jon dat podršku čitan da stranka Znase oče priko veze a to je sigurno šjor Dilber doči do časnog generala Ante Gotovine i njega upregnit i izborni žrvanj.
Mislin da su se ovi put priračunali, a ča če na kraju od izbori bit neznan samo u svakomen slučaju ajme nama.
Evo i na kraju ona iz naslova to je ča ja mislin, a možda nisan u pravu, daj bože da bude sve med i mliko.
Do sljedečega javjanja zdravi i veseli bili štioci dragi pozdravja vas vaš morski čovik Šangarelo.