O RIBARU SIROMAJU

ŠTORIJE IZ MALOG MISTA
piše: Jadran Šantić Šangarelo
Dunkve vako je bilo i sve je živa istina, je gospe mi i morete mi sve virovat na rić. Ka san bi dite živija san u mali lipi gradić Opuzen, na najlipšoj riki na svitu …Neretvi.

Ni u ona gruba vrimena poslin drugega rata bilo obilance, svit je živi skromno i siromaški …ma gospe mi bilo je i oni koje nevoja sirotinjstva i gladi ni čapala. E a ja ču ovod vaman lipo ispripovidit štoriju o siromajiman, ponosu i poštenju.

U Opuzenu i okolici živilo se o ribarščine, lova i verdure koje u Neretvi nikad ni falilo. U ona betežna vrimena moga si jemat  o spize brudetić o rječne oli morske ribe, o jeguje i žaba, a meso si …ako si moga jemat …jedanput oli dva na misec, oli za vrime kakve fjere.

Tada je bilo vako …skuvala bi se blitva oli raštika i prolila sa brudeton o plotic (to van je jedna jako lipa i ukusna rječna riba).

Moga si male rječne ribe gere, plotice i svitlojke pofrigat pa jopet sa malo zeja oli blitve blagovat. Kad bi se ulovilo u jesen lipe jeguje …dil bi se ostavi u burčiman (a to su van trokutaski kašuni puni rupa o centimetra, u  kojiman se u riki čuvala friška i živa jeguja), a dobar bi se dil posoli i osuši za zimu.

Kad bi počele prilitat Liske, e to je za one fameje lovačke bila velika fjera, jerbo se dil prodava i zaradi koji šolad, a dil bi se izija, najviše lešo sa krupnon soli i suva kapula na četvero.

Jo judi ča je Liska dobra. U zimu se kuvala suva jeguja ispo raštike, a friška se kuvala na brudet oli se pekla na ražanj …e to su bile delicije koje mi i danas zovedu vodu na justa.

I da više ne dujin …doli je prema ušču živija jedan samotnjak siromaj, koji je živija o same ribe i zeleni kad bi mu kokod da.

Nikad nisan vidija sa kakvin je artiman lovija …ma je uvik ulovi zase a dikod bi čako i proda na peškarioju na maloj riki za kruv i španjulete.

Ja san se rano vratija živit u Split i 15 godin nisan dolazi u Opuzen. Kad san se dobro zaposli i uvatija lipu plaču …počeja san svako lito dolazit u Opuzen u staru obiteljsku kuču i ostaja san i do dva i po miseca.

Kako san ja starija i oni stari siromaj je ostari. Jednon san ga trefija na jednemu jendeku di na običnu trstiku i tanki konop od parangala sa ubranin pluton iz rike …jer ga je u Neretvi bilo puno lovi ribu.

Zaustavi san se kraj njega pozdravi …evala Van šjor Mate jemali ribe? Pogleda on priko oka i nako kroz brk …a evo sidin pa ča bude …ma jesi li ti oni mali o pokojne Luce Šantuše?

Ja se zableušija kako me je čovik pozna i ka iz topa … jesan jesan  ma nisan zna da me poznajete!?

-Je je zna san ti pokojnu mater a bome i tebe ma si se bi dosta vrimena izgubi iz Opuzena, di si bija?

-Ja van živen u Split već 15 godin, a sada san počeja opet dolazit jerbo jako volin riku i Opuzen, a ovod najviše volin lovit ribu.

Zapitan oče li ga smetat da seden kraj njega i lovin, a on meni …ajde sidi da vidin ča ti moreš sa ton tankon ščapicon uvatit i kakva ti je to krena jedva se vidi nisan nikad takvu vidija.

Sve mu ja lipo spjegan i da ščap more izvadit ribu o 35 kili, a krena je specijalna i ona more podnit toliko.

Počnen ja vadit peškeje, babuške dikoju ploticu …ma šjor Mate sidi i ne vadi ništa…

Priupitan ja a ča radi, a on meni …vidit češ!

Posli neki po ure grakne on …evo je …a ja gledan ča je …kad on nako star i nemočan potiže prema sebi trstiku i konop, a tamo na kraju jeguja debela ka moja ruka .

-Eto jesi vidi ča radin! …i to pozapodne je izvadi 7 lipi komadi.

Kad san vidija sa čin i kako lovi …skupija ja moj ulov i prin nego san partija u auto i doma govorin ja evo šjor Mate poklanjan van ovi moj ščap i dat ču van još razni udic i200 metrikrene, a bome i desetak umjetni, lipi pluta da van bude lakše lovit.

On zinija moga mu je uletit rebac u justa i ništa mu ni jasno.

-Evo šjor Mate vako se radi sa ovon makinjeton a ščap se more složit pa više nima 4 metra vengo metar i po.

-Nemoj sinko nemoj netriba to meni a biće to i skupo.

-Ajte šjor Mate …nije to ništa sad nisan više siromaj i mogu sebi take zjogatule kupit, a bome mogu ji i poklonit …zato vas molin vazmite i sa srićon van bilo.

-Dobro dite moje dobro bog ti platija …i sve on nikako sumnjivo okriće ščap, gleda ga i smijulji se pa baci pogled zamenon i mane rukon.

Kako se u Opuzen slavi litnji sveti Stipan …dan pri tega lita niko klapa na vrata o kuče i zove. Sađen ja niza skale kad stari šjor Mate ispri kuče i drži jedan starinski ceker u ruku a u njemu ništo pokriveno.

-Ajte šjor Mate dođite gori na rakiju baš me drago da vas vidin! a on …nebi sinko ma evo san ti ništo donija i nadan se da če ti bit drago.

Jedva ga ja nagovorin da dojde na teracu sest i popit bibit …kad tamo u cekeru jedno dva tri kila lipe jeguje. Pitan ja koliko san dužan a on meni …ma ća dužan a oni ščap, krena, udice, pluta… ko če to platit? Nemoj sinko davat bogu i siromaju triske vengo ti sa ženon i dicon lipo učini brudet i ispeci na ražanj pa blagijte i neka van u slast bude.

Meni neugodno i ja navalija …evo jeman  lipega vina …niste nikad tako pil,i pa vas molin vazmite i nazdravite meni i mojiman.

Jedva je on to primija lipo smo se pozdravili i on je parti. Gledan ja a jeguja sva lipo očišćena i stivana… jedan dil za brudet a drugi za ražanj i to lito na svetoga Stipana u mene se ni jilo punjene paprike ka ča je bi starinski običaj vengo delicije o jeguje.

Ista mi se priča dogodila i dogodine samo san ga tu godinu odveja auton doma, jerbo je bi puno ostarija i krola ni moga dobro odit.

Kad san doša do njegove potleušice bez struje vode i konduta muka me uvatila, a posteja stol i katrige …ajme majko …armerun se raspada a pitura o mobilje se nezna koja je.

Tuga me obuzela i kad san se vrati doma bi san jako utučen.

Kako san ja počeja adaptirat kuču, a jema san i dobru mobilju …odnija san sve ča je vridilo i namistija šjor Mati kuču . Kad je vidija ča je sve dobi skoro ga je afanalo. Poza 15 dan san mu iz Splita doni špaker na drva koji me nije ništa zapa jerbo san ga dobi u moju firmu Brodomerku, a donija san mu feral na plin i grijalicu na plin.

Jedva san uteka od šjor Mate i bija san jako zadovoljan ča san moga pomoč sirotinju ka ča san i ja bija.

Ti moj prijatej šjor Mate je živi još par godišč i onda je parti bogu na istinu …ma je do zanjega nosi meni jeguju za svetoga Stipana. Ni mi niko javi da je umra i bilo me žaj ma san mu nosi par godin cviče na grob jerbo ja bidan zasluži.

Eto štioci dragi sve je baš vako bilo.Dovidova i lipo se držite pozdravja vas vaš morski čovik Šangarelo.