PARTILI SU DOBRI JUDI

ŠTORIJE IZ MALOG MISTA
piše: Jadran Šantić Šangarelo
Možda će kokod reć evoga na u rubriku štorije iz malega mista notaje štoriju iz velega mista. Je bogami tako je štioci moji ma da ova štorija ne zavridi da se napiše oli mislite da bi ja gubija moje vrime na pizdarije.

Dunkve nemore čovik sa svin u životu bit zadovojan pa tako i sa samin životon. Cili život živeš radiš i skupjaš ka mrav vridno oko sebe jude poštene vridne pametne i pritvaraš ji u svoje prijateje.

Ma onda ti život počne kvarit gušte i okrene svoju priču …pa ti najpri ukrede najdraže iz fameje… a onda udre smrtna kosa  po prijatejiman i dragin poznaniciman. Eto da ne dujin puno ove šetemane, mi je ti dušmanin, za kojega neznan reč ime i bezime ukreja dva jako interesantna, duhovita i pametna čovika.

Jedan mi je bi dobar poznanik a drugega san zna sa pjace u Split. Ovi prvi je bi najprije košarkaš, pa unda sudac, pa unda novinar o sporta, pa neznan ni ja ča još i sve sa čin se dotaka je oplemenija i u sve je zna ubacit notu humora tako da se je uvik smijalo njemu i njegovin batudama.

Unda se pojavila ta jebena teška bolest i naglo i bezobrazno udunila životnu mu sviću. Nadan se da ste pogodili da se radi o momen dobromen poznaniku Miloradu Bibiću Mosoru.

Ni on zasluži nadimak Mosor bez veze …vengo je bi u svakemu pogledu velik ka ta naša dalmatinska planina .

Jema je uvis priko dva metra a bome i na balancu jema priko sto i dvadest kili. Ma sve to ni tako veliko koliko je bi velik njegov duh …e to je bila planina mogu slobodno reć i veća od Mosora.

I tako dok se on zajebava sa svin i svačin i dilija humor i vedrinu oko sebe ka niku čaroliju …ćapala ga je bolest i partija je bogu na istinu prin vrimena.

Isto se mislin da tu jema nika veza …jerbo se on priselija u boje društvo sa kojin će nas odozgara gleda i smijat nan se kod pokojnega strica Šunje a bome i kod Tolje i Popa .

Jo da mi je barenko po ure vidit koji će to smij i zajebancija bit gori.

More bit da će to i za dragega Boga bit puno, pa je moguće da ji svi vrati, jerbo postoji straj da bi i dragi bog o smija moga puknit ka čvrčak.

Nikidan san na godišnjicu Smojine smrti nota na kartu jednu pismu a poruka je bila kako su se puno nji okupili na mukte manđariju u Duplančića, a samo ji je par pravi bilo u Žrnovicu na grebu kojega su lipo juski očistili i bome friško cviče stavili.

Znan ja da je teta Lepa u svome motu pribotunala sviman ma i ona jema puno godin i neznan oćeli se i poslin nje slavit Smoju.

E došlo je vrime da vas upoznan sa drugin čovikon koji je isto partija bogu na istinu iz velega mista a kojega se svi isto poznavali.

U mladosti u onu državu je bi tapkaroš ča oče reć švercer o kino biljeti. Pa se unda niko vrime priobratija na švercera o rebatinki i igraći karat triestine za briškulu i trešetu jerbo u nas u Dalmaciju se igradu samo te karte.

Unda je dobar dil svoga života kojega je proveja najveć u getu piva u klapi Dioklecijan a jema je lipi glas i bi je puno muzikalan.

E ti moj poznanik sa pjace iz geta i iz dva Bračanina pa sa peristila i ispri  svi Spliski kina je bija naš općepoznati Fažol.

To je ime dobi na ulicu jerbo je uvik govori da šverca kako bi jema za fažol i žmul vina. Eto u istu šetemanu su partila dva interesantana čovika totalno suprotna a u duši  pravi dobri dusi najlipjega velega mista na svitu i okolice, a to je moj rodni grad Split.

E štioci moji …Split je uvik bi rasadnik interesantnega svita i to od veliki učenjaci ka naš dr. Radman, pa dr. Đikić, priko vječnega imena pokojnega Smoje, koji je jema nadimak Šunje,  priko pokojnega Mosora, a da pulitičare i pulitiku ne spominjen …do vrhunski sportaši.

Ma bogami …poduja bi bila lista i redikuli zajebanti.

Sada mogu reć da me je jako drago ča san se rodi u Split, jerbo takega grada nima nigdi na cilu balotu zemajsku. Grada u kojemu od velikega cara Dioklecijana koji je izabra dil Dalmacije za učinit svoju palaču od koje je nasta Split, pa do kraja svita i vika u kojemen se moredu srist u istu ulicu sve životne profesije i sve vrsti judi.

Žaj me jako ča polako parte oni pravi, a ostaju oni koji moj Split nagrđuju i uništavaju njegovu dušu, samo se nadan da će i ova mladost koja stasaje volit Split ka mi stari i činit od njega svitsku metropolu.

Eto štioci dragi nadan se da nećete puno grintat jerbo san ovu štoriju iz velega mista ubaci u štorije iz mali misti.

Živi zdravi i veseli bili …pozdravja vas vaš morski čuvik Šangarelo.