Štorija iz naše lipe metropole
piše: Jadran Šantić Šangarelo
Evo štioci dragi kako san vas več aviza akošta san u naš lipi Zagreb i misli san jo ala če bit puno dosade pa neču znat o čemu vas avizavat i ča notavat na kartu.
Ma svetega mi Ante Padovanskega u možjane san dobi take udare da san misli kako san upa u epicentar nikega jakega tajfuna oliti koje gore nevere.
Najprin san se u ćudu zlamenova dok bi štija ča sve govoridu naši „odličnici iz pulitike“ koji čedu se borit meju sobon za misto prešidenta ove naše jadne i izmučene zemje.
Pa onda rovovska bitka za i kontra davanja autocesta u koncesjun i pazite jopet novi referendum ka da svi oče do daske iscidit one jadne kune iz proračuna ka da nan ni dosta ti oprosti mi bože jebeni referendumi.
Pa unda puste nevoje i gafovi koje nan vladajući svaki dan serviradu,pa ka grom iz vedra neba gospemi uapsilo i Bandića i da sve ne bude crno ka ča je a ZNA SE da more i crnije bit pobunila se ona moja populacija jadnika branitelja i invalida Domovinskega rata.
Zašto san nota „ jadnika“, zato jerbo su postali ka klimoglavi i slušaju samo one koji priko njiove škine kupe političke bodove i to kod kod one raje koja je sklona sve potizat i natizat desnon rukon. Znan da če jarpa nji udrit drvo i kamen name, ma jebe me se jerbo san doša u situaciju da se nesmin neurozirat vengo moran čuvat živce i zdravje.
Moran priznat da su invalidi u pravu jerbo nan je kurbina vlast i ona i ova do sada ukrela ka za spas države u četiri puta skoro polak mirovine.
Ja prvi a mislin i svi ostali smo rekli ako triba za državu neka ma to „ za državu“ malo morgen to je bilko sa roziman u žepu ča mi u moj lipi Split znamo reč. To je bila marčapija i privara jerbo su sve vlasti do sada kupovale skupe tonobile, uređivale puste urede u najskupji meštri, dilili sebi plače ka Rokefeleri, putovali i litovali di su i koliko tili na trošak države, ranili se u saborskoj menzi ka cari oli kraji a plačali niku mižerju, priaseljavali urede u skupe nebodere i nama bacali prašinu u oči da bai nan pamet zamazali, kako mi pored svoje pameti i zdrava razuma ne vidimo, da je skupje jeftinije. Pa di to jema judi moji, pa zar je to moguče.
Naš dični premijer đipa po svitu i vodi verbalne ratove sa oniman iz apozicjuna ka da su krvni neprijateji i ne vidi ka ča ne vidi ni oni naš najškolovaniji špijun povjesničar iz astranke ZNA SE da svi triibadu stisnit kajiš. Skalat plače i to na malo za zamazat oči vengo obilato pa da se približe raji, prodat sva skupe tonobile i vozit se u Opl Astraman joli u Škodi Oktaviji i tu zaradit puste miljune, a ja bi uveja uredbu da se prodaju svi tonobili osin tri i to oni za prešidenta države, prešidenta sabora i premijera pa dea svi ministri i cila vlast vozidu svoje privatne tonobile ka svaki pošteni čovik jerbo oni jemadu i puno veče plače od normalnega svita.
Šjor Bandića san upozna prin neki 7-8 godin na velesajmu di je bi pozvan meju moje drage Neretvane na brudet o žebi i jeguje. Ni baš name ostavi niki dojam osin jednega, negativnega nikad ne gleda u oči a to je mana. Evo i on je svrši u najpoznatiji otel za posrnule pulitičare koji je u stvari bajbokana zajedno sa svojin jataciman, en ti boga koliko ji jema pari da ni bila jedna obotnica vengo više nji.
I na kraju tija bi se ošervat na HRVI . To su judi koji su u fundamente ove države i državne opstojnosti ugradili i dilove svoga tila i to ne more niko platit ,ma jema i oni koji to ka lisice furbasto koriste.
Jako mi je žaj one gospođe ča je partila bogu na istinu jerbo mislin da ni tribala i da je kojin slučajen bila doma sigurno ne bi tako rano umrla. Njojzi njezinoj žrtvi neka je vječana hvala i slava.
Ma ništo me jako muči pa bi postavi pitanje onemu Josiču i onemu iz specijalne pulicije ča su uvik na prvin crtan demonštracjuni kontra live vlasti, zašto se nisu vako srčano brčili kad je HDZ čini greške u koraciman kontra braniteji koje je izručiva Hagu i invalidi, zašto nisu ni jednemu prvaku stranke ZNA SE zabranjivali ulazak u počasni mimohod u Vukovaru i zar misle da smo mi svi veslo sisali pa nismo vidili iz kojega kantuna vitar puše ča je zagrađiva vlastiman put u kolonu pijeteta.
Moran reč da su organizatori ti marifetluka bili ka specijalci svi bogu fala obučeni u crno i sa voki tokijiman u ruci, jo koja je to organizacija na visini bila i da je Josipovi, Leko i Milanović na čelu kolone tija pristupit u prvu kolonu nabi uspili.
Dajte judi pristanimo više na podile livi i desni joli crni i crveni podilimo se na poštene i lopine pa ove potonje zatvorimo doživotno u prežun a možda i vratimo u državnu kasu koji miljun ča su ukreli i lipo pospremili na razne banke u svitu.
Dosta je da se dicu zadaja mržnjon prema neistomišljeniciman, dosta nan je pusti pulitički skandali i lpovski perfidni afera, dosta nan je kopanja po kontejneriman, dosta nan je jala i sirotinje, dosta nan je da nan mladost jopet biži vanka trbujon za kruvon jerbo sa svin velikin skulan nimadu i nemoredu nač posla.
Dajte judi udrimo šakon o stol i neka svi vladajući prvo sebi smanju plače za barenko 30% i neka ovi ministar Varga ne štedi na našin invalidskin protezaman vengo neka se okrene štednji tamo di može a ne na invalidiman.
Evo ja san pored ostalega posta gluv u ratu i nosin dva aparatića za sluh koji su mi proteze i kad san ji dobi tribali su trajat 5 godin a sada tribadu trajat 7 a baterije koje smo kao dio aparatića dobivali priko socijalnega sada moramo kupovat sami, Pa di to ima.
Moga bi vako do vika notavat svašta ma san se več upotija od jida i snerva i moran reč ajte kvragu svi vi koji se bavite pulitikon i livi i desni i crni i crveni jerbo nima maju vaman poštenega svita, a dok ne postanete pošteni i dok ne počnete mislit o narodu a ne o svomen takujinu ova država če tonit sve više i više i nedaj bože na kraju če potonit.
I još da utvrdin AJTE K VRAGU SVI I VI U VLASTI I VI „ GOSPODO“ U OPOZICJUNU i to za sva vrimena.
Eto štioci moji dragi pozdravja vas vaš grintavi morski čovik Šangarelo.