O ONOMEN IZ NOVIN I MALO SUTRA

ŠTORIJE IZ MALOG MISTA
piše: Jadran Šantić Šangarelo 
Evala štioci moji dragi i da znate da san se vrati poslin lipega vrućega i plodnega lita u niku normalu. Skupi san dosta štorij o zajebanciji u naše malo misto, ma ka revni čitatej Slobodne dalmacije uvik uvatin niku barufu za koju se triba zalipit. Dunkve vako:

Jutros san ka i zanji pedeset godin kupi Slobodnu i polako srka kafu dok san čita razne pulitičke monade i dikoji pametan napis. Tako neletin na našega dičnega Ivicu Ivaniševića koji je je jema korađa lipo šesno i otvoreno napisat jednu štoriju o našemu velikemu bardu o pisane riči napose dalmatinske, Miljenku Smoji znanome ka Šunje oli Stric.

Ja san ga poznava od ditinjstva i drago me ća san bi suvremenik svi njegovi pizdarij a napose lumenski napisani kronik o Dalmaciji i Dalmatinciman, velikin judima ma i fločunima zajebantiman a i furbastin i svin koluriman namazanin funcutiman.

Eto jutros me biulo drago pročitat onu Ivicinu Jučer danas malo sutra, jerbo san doživi u malo besid svu veličinu strica Smoje oliti Šunje iz pera našega čovika.

Ni Ivica ništa oduzeja ma ni nadožunta, jerbo je jako lipo …i ća bi ovi novi rekli …plastično, napravo tekst di se ošerva ma Smoju.

Smoju čovika, pisca, bonkulović,a naratora, kroničara jedne pokrajine, a i šire jerbo je pisa o sviman nama koji smo u ona doba živili na ovin prostoriman kako u Austro-Ugarsku, Jugoslaviju, Hrvatsku i nadasve Dalmaciju, jerbo je Dalmacija uvik bila ispri svoga vrimena i puna svi bilosvitski govan koje je znala na najboji način opisat i prodat narodu ka zajebanciju.

Ne samo da se slažen da je Smoje bi veliki čovika takega se uvik pribija na križ …jerbo ga se ni nikad razumilo, a oni ča krojidu pulitiku uvik su se bojali pametniji o sebe a napose onega ča izajde iz pera napisano.

Dunkve Smoje je za nji bi boljševik, orjunaš, velikosrbin, talijanaš, jugoslavenski integralista, autonomaš, četnik …a neki su ga u svojoj gluposti i bespameču, bezobrazno nazvali i govnu brat.

Oštija o svemen ovemu bi ukratko tribalo ufino reč da svaka Smojina etiketa govori zase a posebito o oniman koju su mu je zalipili, jerbo je Smoje bi jedini koji je jema muda svakemu reč ča misli o njemu i ni ga bilo straj za posljedice.

Eto štioci moji dragi smišni i šesni opet je došlo vrime da Smoje uskrsne. Snimjena je nova serija o Smoji a koliko se sićan svaki put kad je ništo reprizirano a izašlo iz Smojina pera oli iz makinjete u večernjin uraman svaki grad pjaca, kaleta sve bi opustilo …mista bi parila ka avetinjska …jerbo se Smojine batude ne smi propustit i ne samo u Hrvacku vengo i šire.

Ja ka rojeni Splićanin se nadan da će kad se otarasimo raznorazni oni ča im bezime završava na ov,um, ug i tako daje …da ji ne spominjen …doći vrime da Spliton vladaju Splićani koji razumu Split i splisku povist i da će se cili Split i Dalmacija zafalit Smoji na temu ča je učini za nas.

Nadam se da će na red doći i spomenik i da će se o Smoji lipo pripovidat na svin književnin događanjiman, a ča se tiče spomenika voli bi da to bude svršena stvar dok je još teta Lepa živa.

Ma ništo san zaudobi bilo za pofalit da se ne na nivou Dalmacije vengo i cile države ustoliči književna nagrada  „MILJENKO SMOJE – ŠUNJE „koja bi se davala ka plakete oli druge vrsti nagrade za sva uspješna književna dila, kako oni poznati pisac tako i mnogi uspješni anonimusa.

I za kraj da nadožuntan Ivica u foje pripisije tekst o pjesnika Miroslava Antića koji priko dotura Luigija piše Smoji …pa zar triba išta više nadožuntat osin zakjučka da su drugi uvik cjenili Smoju više vengo njegovi domaći.

Eto štioci moji kako san ja bija jako vezan za strica Smoju mora san se ošervat na ovi napis i nadan se da van neče bit mrsko kad ga pročitate.

Pozdravja vas vaš morski čovik Šangarelo.