piše: Jadran Šantić Šangarelo
Evo štioci moji lipo sidin uz ponistru gledan vanka deštrigano vrime a prvi maja je jušto danas.
Sićan se ka jučer da se prin nikoga vrimena vrtilo janjce pekle se na tone sardel a bome i oborite ribe da ne govorin o ijadama porcij lipega fažola kuvanoga u brzoparilniku iz vojne kužine, bilo je svega jero ti međunarodni praznik svi su poštivali i to kako.
Oni ča nisu a ti su jemali najviše pinez oni su lipo bumbili za aperitiv vhiskije i konjake mlatilo se po janjetini i oboritoj ribi a oni ča su držali do praznika snašli bi se za janjčića i sardele i tako godinan.
Ovo pramaliće če se pantit po koroni, karanteni i po zajebanciji na internetu a čuja san o jednega bračanina da su se ovce na Brač i Pag udružile i da čedu gospemi jemat feštu zapalimo ražnje.
Jutros mi je jedan prijatej posla poruku iz Sarajeva: – Znaš jarane da je Suljo umro od korone ma isto če obdukcija ustanovit od čega je je živija. I tako stižu poruke pune nostalgije za prošlin vrimeniman. I da se zna nije narodu važno kako se zvala država vengo mu je jako važno kako se u tu državu živilo.
Nacionalisti napadaju iz svi oružja i oruđa a bome i jezikon koji jin je manjkav dok oni drugi raja radnička klasa (sada penšjunati) i inteligencija svi se slažu da se živilo lakše da ne rečen boje. Ovo su zakjučci koje san izveja iz raznih izvora. Evo u nas se sprema opuštanje kajiša za koju bužu pa će oni ča su doma samo žderali lakše disat a mi ostali čemo izgleda moći putovat na more ako ima čovik di. Fala gospi jerbo san u karanteni 45 dan i već san počeja inšempjavat.
Na mobitel mi svako malo dođe pitanje: – A ka češ doli? Jerbo san ja meju prvima odija doli ( na more ) ka lasta a unda svi pomalo zamenon. Ovu godinu je zajebala korona, pa bolesti razne, starost jerbo nemoreš sa 72 godine đipat ka mladić. Samo još koju godinu da mi ovo četvero unučadi podnareste pa unda mogu partit u jednomen smjeru a za tamo ne triba kupit biljete.
Jutros me prijatej Ante šaje avizu: –Di si ajde dolazi, ode su Nešo i Lasić polovili sve lignje i škuše a tebi će ostat sami špari!? Ka da je špar loša riba?
Velika je stvar da su se poljoprivrednici i kumpravende snašli i organizirali prodaju verdure i to jušto na vrata o kuće a ni cine nisu do neba. Fala jin na temu jerbo nismo tribali odit vanka, a moran spomenit i ribare u podanak Velebita koji su frišku ribu nosili u metropolu isto na vrata o kuće. Moran ovi put pofalit moju ženu jerbo svojin kužinavanjen sa puno verdure ni dala da se udebjamo a sve smo jili lipe bokune ni nan falilo ni tičijega mlika.
Eto od turizma nima ništa a oče li čakod i bit vidićemo, svaki belaj nas klepa po glavi. Nikidan san proštija na internet kako su se usaglasili don Plenki i prešidente Milanović kako će u Vukovar bit samo jedna kolona i mislin se judi događaju se čuda ulizlo jin je iz guzice u glavu da više ne smi bit podila.
I tako ja živin u tom uvjerenju kad jutros ka grom iz vedra neba don Plenki dopušta provokaciju “Za dom spremni” a prešidente onako drčan napušta skup da bi ga posli Njonjo i don Plenki izgadili. Pa koja smo mi država koja dopušta da i poslin 75 godin fašizam i ustašija javno prezentiraju svoje ideje i svoje znakovlje i tim svojin maškaravanjan otvoreno pokazuju apetite za doč na vlast. Mislin da ovo ne vodi ničemu dobremu.
Pošto san pješak jerbo mi je potres srušija zid o kuće di živen u Metropoli na auto, od ponediljka dok dobijen auto sa popravka, gren na noge u inšpekciju i da vidin sve če se u Metropoli survalo na zemju.
Kako mi je korona poremetila ličenje nadan se da čedu me zvat i da ću završit sve do prvega lipnja pa unda u blaženstvo nebesko moju Dalmaciju prilipi kraj na baloti zemajskon.
Pretpostavjan da se doli u naše malo misto događalo svašta i kad mi ispripovidaju sve da će bit još štorija.
Budite mi pozdravjeni i živi i veseli bili, pozdravja vas vaš morski čovik Šangarelo.