Dubravka Borić
U mistu je uvik
nikih judi bilo
da je ‘štrumiente svirilo.
Ma, za divertimiente,
ko stvorena,
bila je armonika.
Kad se mih rastiegne
i botuni pritisnedu,
sva zvona u njuon se sjatidu-
-ča nojlišje zvonidu.
Už nju se čula pisma
kad se krstilo, pričiestilo, krizmolo,
na fraje i u šerenode hodilo,
bale činilo, slavilo, ženilo…
Spominjen se jedniega Mateitota.
Otac ga je doma zvo.
Sva vrota od komorih je digo:
Neka se balo!
Botuni su zvonili,
daske škripjale,
lipo se jilo
i vino pilo.
Jo, ko dite,
u Mateitota postole san se zagledola.
„Zoč, postoluon,
uvik mloti obo puod?!“
„Otako, drži…takt!“
Tih ričih oca, uvik san se spominjola,
a stopr hi kapila,
kad se meni armonika, na kredit, kupila.
Nison, baš, ko i uon, zvonila,
ali, š’ njun san se lipo div’rtila:
na surolu vježbola, na pozuornicu hodila,
z braton, do kaštila*, bol učinila…
po san i jo,
ko i Mateito,
takt držala postolima:
obo puod mlotila.
Manje poznate riči:
div(e)rtimienti- zabave
fraja- veselje uz jelo i piće, nešto podalje od naselja
šerenoda- serenada,noćna pjesma djevojci pod prozorom
komora-soba
balat- plesati
postoli- cipele
zoč?- zašto?
zvonit- svirati
stopr- tek
kapit- razumjeti, shvaćati
surol (sulor)- solar, kameni balkon
kaštil*- kula sagrađena u 15. st. u svrhu obrane od Turaka
jo- ja
Puno je lišjo to vašo armonika. Za tu van slku, baš, fola! Taku, na botune, sličnu, sviri je i muoj otac, muoj brat i sestra. (A i u ovuon pismi, Mateito.) Kad san ono mola bila, armoniku oca san u šufitu svu odvidala i rastavila- somo da vidin če to unutra sviri. Eno je i don danas u šufitu, u jednien nailonu, stoji, otako rastavjena. I, uvik mi je žo da san non to učinila, neka na nju nikor više ne bi sviri, jer kad je pogledon, vidin oca, slušon puolku, čujen storu napolitonsku pismu … Čujen kako mi govori:… Read more »