ORADICA, BILIZMICA I OBOTNICA

piše: Jadran Šantić Šangarelo
Jo judi moji ća je grubo kad očeš o nečemu pisat ća se dogodilo davno a jema si takvi događaji pun kufer i ajde se ti onda siti i izaberi ća bi bilo najboje.

Evo sidin u moju bolesničku sobu u Krapinske toplice i ka niki blento pensan i pensan o čemu bi napisa barenko malešnu štoriju. Od pusti ozbiljni i neozbiljni baruf za vrime moje dugogodišnje ribarščine moga bi čovik učinit libar a ne samo štorju …ma zaludu možjani blokirani i ne puščaju vanka ni slova a kamoli misal o nečemu ća bi pisa.

Ma jeben ti starost i zaborav zaludu si u guzicu uvati godine i puste zgode i nezgode u životu kad ji se nemoreš sitit. Čini mi se da san upravo dobi iz možjani sinjal da se upalila malešna žarujica i ajmo je iskoristit:

Kako san puno lovi po najlipšoj riki na svitu …Neretvi i po njezinoj delti, a da o čarobnomen ušću i ne govorin uvik se nika dežgracija zna dogodit. Jedan put ti se zamota krena, drugi put ti riba prigrize krenu i ukrede udicu, treći put poklizneš niz bajer u riku i tako u nedogled.

Ma ovo je jedna malešna sličica iz moga ribolova na ušću Neretve. Ritko san odija sam obično bi niko od moji prijateji odija samenon za pravit društvo a i sve je lipje u kompaniji.

Kako je na ušču lipa pržina na dnu i velika pličina tote se u travi koje jema priko načina kote i žive sve vrsti ribe koje jema u našemen lipomen Jadranskomen  moru.

U toj travi žive i mala kozica koja je proglašena za najboju ešku za lovit ribu tako da za otič u ribolov moraš jemat lipi špurtel kajić i šćape za ribolov ma bome i sude u što češ bacivat i držat ulovjenu ribu.

Na tu malešnu kozicu ili kako je doli zovemo KOCKU zna se ulovit lipi arkaji oliti ovčic, oradi razni mir, lubešići a da o glamcima, cipliman, pauciman… i ne govorin.

Jedno jutro moj pokojni prijatej barba Ante Gudelj zvani Žorž i ja partili u ribolov. Lipi litnji dan miran bez vitra tako da smo bome ulovili kozic i za ješku a i za pofrigat na tavu na maslinovo uje i jutu papriku ako se slabo ribe ulovi, tako da sa ušča nikad nisi doša doma bez zlatne rezerve za učinit marendin.

Usidrili mi kajić u pličak i lipo iz kajiča udri po ovčican. Zaletilo nan se i lipi par veliki žuti pauci pa skoro i kilo glamac ma kako je čovik uvik nezadovojan a lipi je dan a jema ješke priko mire ajmo lovit malo i šetajući u more.

Osta je moj Žorž u kajić jer je bi stariji gospodin a ja polako bacivaj na ovčice i polako po dnu po pržini vuci sebi i tako san ulovija pet šest lipi komadi …kad najednon …ka da mi je zapelo.

Kako rika na ušče ujesen i zimu doveze puste grane pa i cila stabla misli san da je zapelo i ja polako namotajen… krenu držeči je napeto pa ču je otkačit kad za gospu  …jeman ča i vidit.

Ja san ulovi a da nisan ni zna jednu oradicu na koju se dok san vuka zeletila bilizmica oko 60 deki i zavukla iza jedne grane a nju je uvatila obotnica koja je bila u busiji ispo te grane i ne pušča .

Kako san uvik jema na nogi nož za podmore, jer san zna i puškarit …izvadin ja nož i gren bome ubit obotnicu iako nisan vidi kolika je.

Bacin ja šćap u more sa zategnuton tunjon i da ču uvatit obotnicu …ma ona u ti momenat pusti crno i omota se sa dva tri kraka oko moje noge. Sriča da je tote kurenat o rike jak pa se brzo rašćaralo …skoro me kolap strefija kad san vidija kolika je obotnica.

Uvatin je za glavu i dva tri puta jon probijen možjane ma gospe mi ne pušča ni mene a ni bilizmu, i jedino ča san moga učinit sa tin mojin oštrin nožen san joj u par potezi okinija glavu i tilo od krakova.

Ubacija san u mrižu oko pasa ti dil hobe i onda san jema operacjun odlipivanja krakov sa noge.

Moran priznat da me je dobro ispekla sa onin svojin botuniman na krakoviman ma isto je to brzo prošlo kad san se vrati u kajić i mome Žoržu kaza ulov.

Njega bidnega skoro kolpalo jerbo je to bi bokun  obotnice. Ajde lipo dižimo sidro pa kraj brane vežimo kajić i ajmo očistit ribu u pličaku i poza tin doma.

Kad smo došli doma isprid moje kuče sididu na štekatu o gostione dežurni zajebanti ma kad san jin kaza ulov svi su blenili koliko je ribe a kolika je obotnica. U moga Žorža u dvoru smo popili lipo po travaricu a ja misli i dvi i ajmo ribu na balancu.

Ulovili smo mišance pet i po kili a u samoj obotnici je bilo 6 kili čistega mesa. Nikad ni pri a ni posli nismo jemali taki ulov.

Eto kako se ona malešna žaruja upalila u možjaniman da san se ovega svega sitija ma bome da moj pokojni Žorž more ovo pročitat brk bi mu se nasmija uz komentar je je lijepi smo riba ulovili.

Eto štioci moji takovi su van ribolovi na ušću Neretve. Svega jema ma i svaki dan jema sve više krivolova i ja neznan kad ta bidna riba uspije narest kad je ka terminatori razbojnici love sa malin migavicaman.

Pomorska policija je nemočna jerbo nima ni judi a ni mali brzi gliseri za lovit ove razbojnike.

Živi i veseli bili pozdravja vas vaš morski čovik Šangarelo.