SAVIST

piše: Nada Magazin
R-31956Eee…

Sanjala san noćas jedan puno lipi i šesni san. Kurjoži šta, a?

Mislite da mi je u san doša koji zgodni tip? Ma ke, e…

Štagod slasne spize? ni to.

Sanjala san pun portafoj pinezi, u mene , e… asti sto, di nas je ova država stivala da pineze još samo u snu vidimo. Daklem, pun portafoj, skoro je puka koliko je pinezi bilo u njemu.

Šta je bilo dalje, a?

Sad se ja mašin za ti portafoj i vadin jednu od 500 kn, 2×200 kn i 1 o’ 100 kn. tu o’ 100 kn je odnija vitar, pa je vična konobarica trkala za njon, vatala je i uvatila.

A ča san to platila 1500 kn (ričima: iljadu i po kuna), a?

Dvi pizze i dva soka u kafić na spli’skoj rivi. onoj istoj rivi na kojoj nikad ništa ne izin a ni ne popijen. I opče mi ni bija problem to platit. U snu, e…

Onda san se probudila. Odma san doživila ne noćnu, vengo jutarnju moru i to na javi.

1500 kn za dvi pizze i dva soka?! judi moji je li to moguće?! I jesan li ja normalna kad san te pineze dala?!

Možda san pod dojmon cifri o kojima čitan u foje – tješin se. U svakon slučaju počela me peč savist. Za nešto šta zapravo nisan ni izila ni popila ni potrošila.

Onda san moju muku ispripovidila materi. Matere zato i služe da ti olakšaju muku.

Ona je narafski odma zacenila od smija i rekla mi:

Sad će ti barba ministar Slavko Linić odma doč to naplatit. Šta ima veze šta si sanjala? I san se triba platit! Porez na san!  …a mene je sve ovo odma narafski sitilo na onu iz filma. Koju, a? U ovoj kasarni nećete ni da pišate, e… 

Poza tega san joj uzvratila:

ma znaš šta, u tom mom snu si baš ti sa menon bila u ti kafić, neka i tebe peče savist, bar malo, e… i očeš podilit trošak, a? Sto euri meni, sto tebi… 😀

Jemamo mi i jedan libar ča se zove sanjarica, a po temu libru je ovako: ako brojiš pineze, ispada da ćeš jemat pinezi. Restauracije pak znače da jemaš rastrošne kumpanje. Kafana bi značila da dangubin, ali nisan sidila u kafani. Na spli’skoj rivi, di inače nikad ne gren, dva soka i dvi pizze, 1500 kn, ne bi da je ta spiza štagod čudotvorno oli kakva likarija i ja blesava koja to plaćan i poslin me ujutro peče savist.

Kakav početak dana. A mislili smo da one ča žive neredno na kraju muči savist, e… je, kako da ne, roge ćaćine, vidi koga je ona došla mučit, đava je pipa, e…

Gren radit. Mižeriju triba zaradit.

0 0 votes
Article Rating

Related Post

Subscribe
Notify of
guest
0 Comments
Inline Feedbacks
View all comments