piše: Jadran Šantić Šangarelo
Judi moji koja se samo čuda i čudnovate zgode moredu čoviku dogodit na more. Eto ja skoro cili život gren na ribe i bilo je bome čudni slučaja ma ova dva ča ču van ispripovidit su za ubit se o muke.Ovo mi se dogodilo ovo lito u osmi misec.
Ka i svako juto dignen se ranije oko 5 uri i najpri u kafić “Karaka” popijen lipu veliku čikaru espreso kafe i unda kuntentan gren u kajić i na lipo naše Jadransko more. Ako nimam ješku (a to je ritko) kupin sardel na mali banak u naše malo misto Gradac koji mi zovemo peškarija u jednega jako finega čovika ma i pravega finega gospodina Ive.
Šjor Ivo tote prodaje ribu za jednega velikega nakupca ribe u Makarsku, a moga prijateja Lukšu koji ribon snadbjeva sva mala mista Makarske rivijere. Ta moja kolotečina se svaki dan ponavja i ja buden na ribarščini sve do 11 uri a diko i duje ako riba radi.
Uvik se vratin doma sa 2 – 4 kila ribe di jema mišance mali mezoarbunića lipi bukav ,špari, oštruja ,arbuna perjaša fratri i oradi. Ma ovo lito je bilo bogato škušan ,lokardan i lampugan koje sam kako bi rekli potamanija.
Zna san u jedanput ulovit po 30 kili di bi bilo od 20 do 30 lipi komadi.Jedno jutro san promini poštu i veza san se za bovu kojon je jedan bosanac sinja brod koji je potopi za turiste ronioce. Tu je malo pliće nego na moju stalnu poštu i jema od 18-22 metra.
Počeja san vadit lipe fratre pa koju oradicu ma uvati san i jednu lipu škrpinicu o dvajest deki i unda eto ti belaja. Lipo san skala na dno udicu sa bokunon lignje patagonike i laška krenu da se samo lovi, a sa drugin štapon san nastavi lovit normalno na po dubine di san tuka bukve.
Kad muku ti ježovu ništo se zakači za oni slobodni štap i potiže . Skočin ja i ajde u borbu. Malo ja potegnen gori na makinjetu malo ono doli potegne mene i savije mi štap ka luk od Robina Huda i tako potegni povuci jedno 15 minuti i unda ka da je za ništo zapelo. Držin ja štap i nako sav uspuvan misli gospe moja i sveti Ante ča je ovo doli i ni na kraj pameti mi ni bilo da izvadin ispo prove špurtel i brankanel a jeman ji.
Špurtel san kupi u Lidla a brankanel mi je napravi od inoksa moj dragi prijatej Jure Politeo. Držin ja tako štap napet kad ono u jedanput jopet stane potizat ma ja gospe mi nedan i nedan i mic po mic lagano natižen krenu i malo po malo san za oko 20 minuti doveja to ča se uvatilo na metar o površine.
Pogledan ja priko bande i jeman ča i vidit a ono ugor skoro 20 centimetri debel i bori se a ja majmun stari umisto da izvadin brankanel tvrdoglavo vučen gori i kad san skoro izvuka beštiju od skoro metar – metar i po, beštija prigrize krenu koja je bila debela 0.45 i lipo se prcne i pobigne u dubinu. Nisan moga doč sebi skoro po ure i zamalo mi je srce puklo a bi san nase jidan ka pas da san moga bi sam sebe izmlati za kaznu.
Ma moran van ispripovidit i ovo da mi je godinu prin na isto misto nika beštija slomila štap i krenu a nisan vidi ča je bilo.Isto mi se dogodilo i ženi kad je bila samenon na ribe i toliko se bila pripala da san mora vozi u kraj i u gostionu “Naše Malo Misto” dat jon popit cukra i vode da dojde seb.
Bidna ni znala ča se dogodilo samo je ponavjala ajme Jado skoro me poteglo u more ma sriča da jon je slomilo samo štap i povridilo ponos i ća triba iz ovega svega naučit?
Odma ujutro kad se dojde u kajić vadu se svi arti i špurtel i brankanel posebno da mi se to ne ponovi .To san lipo radi skoro misec i po pa kako mi je dopizdilo sve svaki dan ponovo slagat ispo prove više nisan tija ništa vadit jerbo mi ni tribalo. A e. Posli misec dan san zaboravija izvadit špurtel i brankanel pa san izgubi škrpinu od deboto 4 kila na isti način ka i onega vražijega ugora.
Moran reč da mi je ribarščinu spasila Lampuga koje san ulovi 174 komada u nadiju dan.Jo judi moji koja je to borba kad se ona zakači leti livo desno po sto kilometri na uru jedva je moreš dovuč do kajića i izvuč vanka ma kad je ubaciš u kajič unda nastane krvoproliče jerbo ju je teško skinit sa udice i jako krvari. Svaki put san zna skalat sve sa neba od jida ča moran oprat kajič pun krvi. Eto judi moji i ribari moji šesni učite na mojin greškama.
Živi i veseli bili pozdravja vas vaš morski čovik Šangarelo.