ŠTORIJE IZ MALOG MISTA
piše: Jadran Šantić Šangarelo
Da se nebi krivo svatilo neće ovod bit rić ni o kavoj poštijerskoj kartolini, vengo o jednoj smišnoj dogodovštini koja se zbila u jednemu lipome i smišnome dalmatinskome mistu.
Kako svi znate lito je najluđe vrime o godine kada se spušćaju turisti sa svi stran svita da bi vidili lipote naše Jadranske obale, a napose lipote naši otoka i škoja u kojiman su sakrivene najlipše vale i valice na svitu.
I tako da ne duljin priko načina …u jednome malomen mistu bilo je furešti o svi jezikov na svitu a bome i naši Bosanac koji su u zanje vrime postali najsigurniji turisti na Jadranskome moru.
Lipa vala još bome lipša plaža brčkaju se dičica svi raca i koluri a jedna lipa i smišna curica se vozika na štramcu na puvanje. Ne bi bilo ništa čudno da u nas ne pušu vitri iz svi mogući pravac a koje furešti neznaju i iz svoga neznanja te naše domače vitre ne bendaju dok nije vrag odnija šalu.
E onda sve gre naopako, jerbo vitar ka vitar ne poznaje Bosance, Čeke oliti Švabe …i puše bome uvik po svome guštu, pa ti onda vodi konte di češ na štarmcu svršit. More se dogodit da se lipo vratiš u valu a bome moreš partit i put Italije, ako te je vitar uvati puno vanka vale.
Danima san ja gleda onu lipu malu na štramcu kad bi obija doma sa ribanja i uvik je bila nigdi na granici o vitra i zavitrine, ma taj dan će van oču ispripovidit nisan tu malu vidi na štramcu …ma san sinja puno svita ća maše rukan i gestikulira ništo ća nisan razumi i ja sa kajičon dojden bliže plaži kad tamo prava strka .
Punija je naglo majštral i onu lipu i smišnu malu na štramcu odnija vanka vale i to di kvragu vengo prema otvorenomen moru.
Kad san ja sve svatija okrenen kajić i gren tražit tu lipu i smišnu malu. Vozi san se deboto uru i po ma štramca nima pa nima i ja jidan i štuf a, bome i jut na vitar i furešte okrenen oko jednega škoja i …muku ti ježovu ugledan ja lipo štramac ostavjen na sikan …ma male lipe i smišne Bosanke nima za lik.
Akoštan ja uz kraj bacin sidro sa krme, a sa prove vežen kajić za sike sa drugin konopon i gren tražit. Skaka san ka kozlin sa sike na siku …ma male ni pa ni.
I skoro san obakola cili škojić …kad ujedan put čujen ja niki šušur. Ošervan se livi pa desno …nima nigdi nikoga …ma isto se čuju niki glasovi i to ka da niko stenje jerbo potiže nike konope, oli se sa nikin jača i ja produžin još malo naprid kad ispo mene malešna plaža deboto dva za tri i jeman ja će i vidit.
Doli ona lipa ismišna mala uzjašila jednega našega domaćega muzuvira i bogami lipo po njemu gre naprid nazad i to sve ka u nekome lipemu ritmu. Ni baš pristojno gledat i poslin par minuti moga razmišljanja nakašjen se ja i izvirin ka da nisan ništa vidi, ma bogami oni ne pristaju vengo se još žešče mala navila muko moja da nisu gluvi neznan ča bi ućini pa se vratin malo iza stine i zapivan Lipu Janju na vas glas i gren prema njima.
Čuli su me ma se isto nisu odma počeli obućivat i ja se pojavin vas zabrinut i infetan pa onako po našku:
-E mala mala cilo te misto iska i svi misle da te vitar odni u Italiju …ma vidin bome da si jemala dobrega boga mora koji te tetoši lipo i ća ćemo sad an?
A oni moj muzuvir odma skoći…
…nemojte barba ništa reć ća ste vidili jerbo će je Pape odma potirat u Sarajevo ja ču priplivat do doma a vi recite da ste je našli na štramcu kako je vitar nosi.
Šta ću kad san duševan …ukrcan ja malu i štramac i pravac porat …kad tamo gospemi dočekali su nas ka da smo carska fameja.
Lipo san reka da san je naša na more i svi su bili kuntenti. Ma ta lipa i smišna mala se posli dala u to malo misto i ka znak fale puno puti mi je znala napravit razne pite, a bome kako san ja guloz na slakarije znala je učinit i baklave, tulumbe i urmašice i da san nastavija sve to jist uvatija bi više o kvintala.
Ja san se lipo njoj zafalija i proridija te male fešte a danas ona jema ćetiri sina i čer koja je ka pjunuta mater lipotica …ma malo je smišno čut da se mater zove Fatima a dica Jure, Mate, Ive, Stipan i mala Marijeta.
Eto dragi štioci ovo van je bilo vako ka sveto pismo. Lipo vas pozdravja vaš Morski čovik.