piše: Jadran Šantić Šangarelo
Judi moji ča je naša Dalmacija lipa i smišna, a najposli interesantna. Pari mi se da osin lipote ništa više ne bi bilo da ni naši judi koji su puni kreanci ka salpa govan ča bi ovod u nas rekli.
Evo poza lipega ma bome i uspješnega lita na vrata nan je ulizla jesen sa neveraman i buraman, a bome se nadan da če bit još trzaji o babjega lita barenko još desetak dan. Zašto ovo govorin?
Zato jerbo bi tija na ribe poč i potrošit zalihe ješke pa ča bude i unda bi se drage voje moga vratit u metropolu. Tija bi s pomjon vižitat sve one barufe ča činidu po našemen lipemu Zagrebu Bandić sa funtanan i oni muzuvir Horvatinčić sa natkrivenin štekatiman koji jema u žepu sve gradske i državne institucije i lagašno dobije sve dozvole. Ma neko je reka da sve te dozvole i befeli moredu bit po zakonu ma po moralu jok.
Ma da ne bi zaudobi moran van spjegat nike važne stvari ča su se događale u naše malo misto. Morate znat da je ovod svetac zaštitnik mista sveti Mijovil i da mu se vlast misna jako utirava i da se deboto sve glavne fešte o lita događaju oko svetega Mijovila.
Jedna fešta koja je uvatila lipi 11 godin je i ribarsko udičarsko natjecanje o ribari od naše male općine. Na temu takmičenju se zna jušto od istoka pa prema zapadu okle dokle se smi lovit. A e, da ni funcuti i muzuviri iz okolni misti možda bi se to i poštivalo ma ovi farabuti neznaju za fer plej jerbo da znadu nebi bezočno možebit privarili suce i osvajali prva mista nikoliko godišč za redon.
Eto judi moji ove godine ni bili ni u pola ribe ka lani ma opet su ove godine dvojica iz Brista došli na alpizavanje sa lubinon kapitalcen da ga se baci na balancu i izmiri mu se piz, i di neče osvojili su sa njin prvo misto.
Ti isti lubin je stavjen na lutriju i nota bene osvojili su ga zamislite oni ča su ga i ulovili pa di je tu pravica, moran reč nima pravde ni boga jerbo da jema kaznija bi ji a ne nagradi. Tija san jin reč da ji dabogda uvati proliv dok ga budu jili ma jopet nisan vengo san to san to samo promisli use.
Kako ne bi salazija sa morski tema moran van ispripovidit i kako je rođak o moje žene zvani Đoko doživi da ga proganjadu duhovi iz pokvarene pente dok je panulava na lignje. Vozi je on svoj kajić blizu kraja i kad se motor malo ugrija počeja je puščat zvukove ka da niko jako puše joli ti dahče. Kako je pa mrak ošerva se rođak o moje žene oko sebe nebi li koga vidija ma e, nigdi nikoda a ono opet ništo puše. Trajalo je to niko vrime i unda mu se motor utrnija svoji skoro milju daje mista i moj ti je Đoko po starinsku ka pravi ribar stavija vesla u škarmice i lipo dovesla u porat.
Nisan sazna jeli on joli niko drugi da dijagnozu da ono puvanje nije ništa drugo vengo para iz sistema hlađenja jerbo mu je zariba impeler i ni bilo cirkulacije mora za hlađenje pente koliko je tribalo i kad bi se stvorija pritisak ono bi ka ferata iz kotla pustilo paru. Tako je moj Đoko razjasnija koji su ga duhovi plašili.
Neplanirano san iša jedrit sa mojin prijatejon Boron o tete Lene, a išli smo sa velikon jedrilicon o prijateja Vedrana Stipića. Puvalo je jugo ma ne jako tako da smo samo klizili po moru, a kako je bilo boti mene je sgunčulalo i skoro san učinija sva tri čina opere Rigoleto ma u zanju san isto uspi izdržat. Kad smo se vračali dali smo Bori da malo zapanula i gospemi uvati je palamidu oko 70 deki koju smo on i ja lipo rasplastili i na gradele sparićali pa poza tin blagovali.
I da ovo ne bi bila zadnja barufa u ovemu javjanju potrudija se Stipe mesar i njegova maška. Sidimo ispri Karake Đoko i ja i pijemo kafu. Kad eto ti Stipe mesara na motoru i side s nama. U jedan momenat se ošerva i drekne Đeki vamo dolazi odma. Gledamo mi kad ono mala maška žute dlake izvukla se ispod jednega starega maška koji je učini sve malešne maške u portu i to bome o svi mašak. Ova Stipina danas ni ništa fasovala ma kako se skita po cilemu našemu malemu mistu ni iskjučeno da če i ona dobit porciju ubrzo. Kad je maška došla Stipi on je uzeja i otvori kufer na motoriću i lipo je stavi unutra.
Maški baš ni bilo drago pa je tila ogranfat Stipu i pobić ma on je bi spretniji i poklopi je kufer pa je poza tin otiša doma sa maškon u kufer. I ka šlag na kraju jedan kulturni događaj jopet na sv. Mijovila, ča je i notan u velike novine. Ovod u naše malo misto naš veliki i poznati Likar prof. dr. Neven Olivari je postavi spomen pločlu u čast engleski soldati iz drugega rata koji su pomogli narod Dalmacije i otoka kad su organizirali zbjeg U El SHatt u Egipat. Poslin protokola se odma bacilo na sedan je 7 pečeni kozlina, zaudarala je mužika iz Makarske i KUD-a iz Slavonskega Broda joli Beličša zaudobija san okle točno, ma sve u svemu je bilo dobro. Moran reč da je novinarka iz Slobodne Dalmacije našla nike zamirke u pravopisu na ploči ma ko to gleda.
Učinila se lipa gesta koja če ostat ka trajni zapis u kamenu o povjesti i to je dobro. Moran notat da je bija je i zamjenik Ingleškoga ambasadora u Zagrebu ka veliki gost u naše malo misto. Triba notat da je prošlo jušto 70 godišč ma isto je bilo živi sudionik tega velikega zbjega, a među njiman i rodica o moje žene koja se tamo i rodila pa nosi ime Sinajka. Eto štioci dragi živi zdravi i veseli bili pozdravja vas vaš morski čovik Šangarelo.