ŠTORIJE IZ MALOG MISTA
piše: Jadran Šantić Šangarelo
Jo ća mi se ova zgoda usikla u pamet, ma bija san je zaudobija i sad me je udrila u možjane da je stavin na kartu. Moj Nono je bija jedan jako grintavi stari ribar. Cili život je odija ne more i baca mrižice ma nikada nije uvatija ni jednu ribicu sa nikin drugin artiman. Uvik je govorija niman ja pacence nadivat ješku i čekat ka tustle oče li me privarit špar oli babica oli …nedaj bože koji čućin, i onda posli pustega vrimena doć doma sa po kila ribe. Ajde ti lipo lovit rake govnare nima lipje o mrižic, baciš ka čovik i posli nikog vrimena digneš, je da zaboli škina ma gospe mi …uvati se lipo i zase ma i za druge, a zna bit i za prodat …oli bar za prominit za uje ili vino.
To je bila njegova filozofija, ma isto san mu ja sa mojin farabutiman zapaprija čorbu. Jedan put smo išli bacivat mrižu podan Sustipana …uz sami kraj …jedno 10-15 metri o kraja. Bacili mi mrižu, vezali sinjale i bome partili doma, a kako je bilo lito ja san osta u kraj kupat se sa mojin farabutiman. Mrižu smo kalali u more oko 5 uri popodne i ujutru smo je tribali dignit, ma ja san sa mojima isplanira momen Nonu napravit barufu i malo ga zajebat.
Zna san da Nono svake subote gre u Gage na travaricu i kavu i da neče poć na more izvadit mrižu pri 10 uri. Ja i moja bulumenta smo se iskreli iz kuće oko 5 uri i digli mrižu, pokupili neki 6-7 kili …bome lipe ribe …i mrižu vratili lipo u more …ma smo na svaki 10-tak metri vezali po jedan blok o betona, lipo vezali sinjal ka i on i vratili se u Matejušku dok je on bija u Gage.
Zna san ja da će on još ispri dvora vikat ajde ti nesriknji linčino diži se …jemamo posla, mriža čeka, riba če se usmrdit, ili će je ugori izist (ka da san ja kriv ća je on bunbija bibite u Gage i kasni za izvadit mrižu).
Partili mi do pošte i vadi Nono sinjal sa konopon …ma gospemi ne gre mriža vanka. Asti onega boga ća je sad ,da ni zapela za niki bovan …potiže on, a ja se pravin da i ja potižen ma mriža neće pa neće ni cenat vanka. Pusti Nono prvi sinjal i gremo na zanji pa čemo i tamo provat dizat. Je šipak …i tamo je ista stvar.
Ajme majko propast će mi mriža, ko će dat više taku, take se više ne rade, ajme koja je to dežgracija a koji su to šoldi za kupit novu.
I tako u grinti …vratimo se mi u porat bez mriže i bez ribe. Jut on ka pas ma nikomen ništa ne govori vengo samo sebi u brk ronja. Došli mi doma i on ti je sve to lipo spjega mojoj Noni, a kako san ja njoj reka da ćemo se malo našalat sa Nonon i donija jon ribu za očistit …ona ga lipo tješi …ma ajde dobro …kupit ćeš ti drugu, pa sva nesrića bila u temu i tako daje, kad na vrata bane moj kumpanjo Jure i govori momen nonu…
…ala šjor Marine bili smo sa puškan u more i ubili lipe ribe, sparičali smo muški brudet, a bome smo sad stavili i na gradele, ajte dojdite s nan na obid, jer bi nan bilo drago da vas moremo počastit, a znate oni Pjero Bračanin je doni i lipega crnoga sa otoka i lipega kruva ispo peke.
Gleda moj Nono i bogami digne se i pita -a jema li tega crnoga koliko, jer mi je danas dan o vina?
-Jema, jema šjor Marine …ma biće i priko mire.
Lipo smo blagovali …pala je i pisma, a moj Nono je bi lipi tanki prvi tenor, tako da se i susidi oko dvora Jurinoga oca guštali u vonjima sa gradel i lipoj pismi dalmatinskoj. Poza podne je moj pošprucani Nono uliza u posteju i zarka ka ferata a ja sa mojiman trk u Matejušku po kajić i na poštu vadi mrižu.
Jo judi ča su bili teški oni betonski bloki …ma isto smo i uspili dignit lipo stivat mrižu na provu …pokrit je sa jednin bokunot o tenede …i lipo privezali kaić da Nono ništa ne pozna.
Pridvečer je izaša sest na Matejušku zapalit španjulet i napravit po ure čakule sa svojiman, a mi mulci šakreto za njin. Priča moj Nono kako mu se i ča dogodilo …kad u niku …jedan njegov, Stipan zvani Arkaj …ispali ka iz topa…
…ajde Marine koga ti mantaš kako ti je mriža ostala u more kad ti je eno na provi lipo stivana i pokrivena.
Okrene se moj Nono i izbeći oči, stade se zlamenovat i ne viruje sam sebi ode do kajića i bome mriža na mistu, okrene se i ka da ga je niko iglon uboja u gujicu i zapraši doma. Ja i moji trk za doć prije njega i uspili smo… kad on na vrata, a Nona sidi između nas 6 i mrtva ozbiljna…
…a ća si se vako rano vratija, oli se ća dogodilo?
A on ka morž frkče brkon i pravo name …an to je tvoje dilo jeli muzuviru jedan. Na račun svoga Nona činiš zajebancije, ma dobro a kako si mrižu izvuka?
Mi smo mu u smiju sve lipo spjegali, a None mu je iz maškadura izvadila lipu ribu očišćenu ča smo joj je donili. Puno godišć iza tega su ga zajebavali …jeli Marine jesi ulovi koji blok?
Nije mi zamirija samo se je niko vrime falšo jidija name, ma isto je zna reć …jesan vas zajeba izi san van ribu i popija vino a nisan se mućija vadit mrižu.
I tako je ta štorija došla kraju a ja danas samo mislin oče li mene vako moji unuci Bruno i Roko zajebavat? Nisan siguran, jer ova mlajarija nima više mota o funcutarijan.