ŠTORIJE IZ MALOG MISTA
piše: Jadran Šantić Šangarelo
U jedno naše lipo i šesno dalmatinsko misto, poza prvega rata doseli je jedan učitej da bi radi u misnu skulu. Sa sebon je doveja ženu čer i sina oboje roba 14,15 godin, i uselija se u jedan stan koji je bi napravjen za take situacije.
Stan ni bi derutan jerbo su ga učiteji malo duperali, i to zato jerbo se ni jedan ni zadrža više o jedne školske godine. I tako ti se ti naš „Profešur“ …kako su ga u mistu prozvali …čin je iz vapora na rivu izaša na rivu uselija u lipi dvosobni stan.
Poslin useljenja u prvu nediju ujutro izajde sa cilon famejon u crikvu. Kako je misto bilo jako pobožno a bome se i držalo do školovanega svita našemu profešuru su odma dali mista u prvu klupu u crkvi.
Kako su se u temu našemu malemu mistu mise pivale …bome ti naš profešur je pusti glas da su se svi ošervali i ostali inkantani kako je piva. Poslin mise svi su stali lipo u filu i klanjali se profešuru i njegovoj fameji a njiman ni sve bilo kjaro jerbo su u misto tek 4 dana.
Ma šoma dela šoma ti naš lipi profešur je otprati ženu i dicu do skule i bome se odma vrati do misne betule di su svi več propovidali o njemu kako lipo piva ka slavić. Čin je uliza unutra sve zamuklo a on skine špančeru i lipo zamoli gospodara o betule da svitu da po žmul vina na njegov konat i da svi lipo nazdravu, a bome i tako se najlakše upoznat između sebe.
Misto je lipo primilo našega profu i njegovu fameju tako da in ni falilo ni tičijega mlika, a misna klapa je dobila lipega drugega tenora i prvega baritona u osobi našega profe.
Kako je počela skula dica iz mista su mislila da je isto ka i lani i počeli sa svojim berekinadama …ma naš ti je profa sviman brzo sta u kraj ,i lipo je pozva sve roditeje na sasatanak .
Sastanak je lipo održa u subotu ujutro oko podne jerbo težaci nisu u poju i ribari su se vratili sa mora. Lipo on govori kako i ča triba sa dicon radit doma i kako dica moraju bit čista i uredna, a ča se tiče njegova dila da in on da nauku tote se neče niko mišat i to je njegova zanimacija.
Bome u prvi ponedijak svi su bili drugaćiji, gače u muškića lipo okrpjene sa tašeliman a ženskice sa pletenican i u čistu robu. Gleda naš profa ma u kantunu sidi jedan mali čupave kose pokunjen i sa glavon među rukan i gleda podase.
Dođe on do njega i pita ga an ča je ča si se okjunija, a mali ka iz topa kako neču svi jemadu libre a ja niman pa kako ču ča naućit bez libri? Gleda njega profa i pita a čigov si ti an? Mali se lipo digne i reče…
…ja san od malega Mikule ča ga zovedu Mići onega ribara ča jema tašelani kajić, ma isto je najboji ribar u misto i pape nima pinez za meni kupit libre.
Gleda ga profa i reče mu da mu dojde otac do njega posli skule. Posli skule ode profa doma i poslin obida je lega na sećiju za ubit ok,o kad niko gruva šakon na vrata, skoći se on i otvara kad tamo ti mali Mikula zvani Mići gleda nadase u profu i probrunda …a ća van triba šor učitej?
-Ajde uđite na bićerin bibita i sve ču van reč.
Uđe Mići unitra i jedva se popne na katrigu. Da mu profa bićerin sa nikin likeron ča mu ga žena pariće i oni nazdravu ma Mikuli ni ništa kjaro. Kaže profa njemu…
…mali van je pametan i šesan je malo zaresta ma to ni grij i pegula je ča nima libre za u skulu a nemore se učit bez libri i ja jeman jedan prijedlog za vas. Ja ču vašemu malemu nabavit knjige a vi čete mi misto šoldi koje nimate diko kad ulovite koju boju ribu donit meni pod račun. Jeli van kjaro.?
Gleda Mikula u profu popije bibit i skala se sa katrige i zabrontula:
…znaći da će moj mali znat čitat i pisat a napose računat i neće ić na ribaršćinu ka ja, dobro ma isto čete vi proć lošije od mene jerbo znan ja da su libri skupi ma kako očete …okrene se i ode.
Mali Mikulin je dobi libre a profa je jema svaku šetemanu bar dva puta lipe oborite ribe za obid. Mali Mikulin je završi 4 razreda sa odličnin i onda otiša kod jednega barbe u Split za završit osmoljetku ma mu to ni bilo dosat vengo je protrča kroz gimnaziju i onda je završi učitejsku preperandiju pa se poslin 5 godin mornarice vrati u naše lipo malo misto i odma se iša javit svomen staremu profi.
Doša je do ispri vrat o skule i pokuca na vrata o razreda, kad je čuja naprid uša je i ugleda svoga učiteja koji je ostari i pogrbija se ma još je jema oštro oko i zvonak glas.
Poletili su jedan drugemu u zagrljaj i učitej sav sritan reče:
…e sad mogu lipo u zasluženi penšjun a ti ćeš nastavit di ja stanen jerbo san ja pratija ća je sve sa tebon kako učiš i ča studiraš ma znaš puno me drago bilo kad san čuja da si posta učitej i sve san se nada da ćeš se vratit.
Mikula mali je cili svoj život a i sin mu nosija staremu učiteju ribu iako se on jidija i brontula ma ni moga tu ništa prominit, ali je isto svaku nediju u betuli dok ni umra Mikulu častija sa žmuliman vina.
Kad je Mikula umra njegov sin učitej je isto odija na ribaršćinu i nosija svomen učiteju i njegovoj fameji lipe ribe.
Eto moji štioci dragi taki su van judi u naša lipa i smišna mala mista u Dalmaciju.