piše: Đurđa Vukelić Rožić
Gda je vujna Vugerica znala dojti ze Zagreba, naše je kokice još z lese vidla ne v perje oblečene, več v rezance i mlince zamotane. Suvo blato na kokošje nogice joj ni smetalo, to je bilo kak tajni dodatek za juvu. Ni se srdila ak je čučica iskala zlato v gnoju i do boce prepala v gnojničinu za štalom. To se zna dogoditi gda kokoš vleče glistu z kakice naše marve.
Po novomu, znanstveniki veliju da je juhica od friške, domaće čuče kaj jê gliste, prekaple po gnoju, premeče blato po dvorišču i lovi muve i leptireke, pravi domači antibijotik. A to je vujni Vugerici dalo krila.
Te put, čim je došla z vlaka, mam je zula štikle i obula Jožekove galoše i štrikane čarape friško oprane i posušene na banjku. Čekale su ga na klupi na verandi. Bu ga još čula po tom pitanju, a držim, da se v njima osečala kak doma. U to je kokoš imenom Bibica predrčala vuz verandu z glistom v klunu. Bežala je kak strela, a za njom celo jato kokoši i dve race. Da je Jožek bil v blizine i on bi joj štel gablec vkrasti za ribičiju. Glista se sirotica frkala, a kokoš bežala i krakorila čez nos ze zaprtim klunom. Ak bi otprla kluna, bi joj obed pobegel. Gda se zadobave takve finote, kokoši narede veliku galamu, naj celi svet vidi i čuje. To je onda društvena čuček-mreža, slično kak se gospoda slikaju v skupim restoranima I onda to mečeju na društvene mreže.
Tak je bahata kokica odpopevala svoju labudovu popevkicu za vrapce na žlebu i pesa, kak glavnoga suca talent šoua na krovu cuckarne, a kaj je njegva svečana loža. No i prede nek su juvicu javno imenovali domaćim antibijotikom, Vugerica je vsaki put gda je došla, lovila me čučice po dvorišču. Imela je ona svoje ljude na važnim mestima v metropoli, vse je prva znala. Jedino je sirota glana bila.
Da je te put Bibica čkomela i lepo si stiha prezalogajila glisticu, nikom nikaj. Ni se trebala faliti, mogla je scukati glistu, gurnuti klun k nebu i ode oblić v gvatu, pa-pa. Nadala sem se da Vugerica ne bu štela kokoš z jezerom dermatofita na vsa četiri prsta leve i tri prsta desne nogice, lečene v gnojnici. Te dermatofite po domaće zovemo glivice. Ali, ni se pevačici v perju posrečilo. Frčna i tenka vujnica lovila ju je tak dugo dok ju ni vjela, zvlekla joj glistu z kluna i hitila proč, a pevec je dobežal i zazval vse žene i ljubavnice z harema. Onda su one natezale sirotu glisticu.
Vugerica je svezala sirotoj Bibici noge i krila, ze zato pripremlenim žnorami v žepu od svitera i teknula je moju šargopirgastu lepoticu vu svoj rogožar. A ja, da bi reč rekla. V rogožar tak veliki da bi i vujnica nuter stala, oko kokoši je nametala mladoga krumpera kaj ga je na polu sama zvadila. Rekla sem joj da mora z rukom odgrinjati zemlu, z motiku bi posekla korenje na kteromu još krumpereki rasteju. Nofti su joj bili našmirani, a joj to ni smetalo, imela je ona svoj cil. Mahune, vugorke, vse je trgala i rivala v te rogožar oko kričeće kokoši.
Znala sem da me bu Jožek zaradi vujnice spovedal. Po istini, bilo mi ju je žal, bila je babina sestra i ni se snašla gda je ze sela pobegla na asfalt. Te povesni korak joj ni uspel. Od selske frajle do gradske gospe, sirota je bila nigdo i nikaj. V tvornice papera ni zdržala, mam se udala za svojega poslovođu Zagrepčanca, a on je bil školani šnajder. Već su počele tvornice konfekcije delati pak su šnajderaji propadali kak i puno drugih zanatov. Čer Dragica nigda ni delala. I sama je imela čer, a nigdo nigdar ni rekel gde joj je otec. Imela sem čuti da je otišel v Australiju, a pak, ni ljudima vse za veruvati. Ja ju nesem nigda pitala. Na sreću su se dve stareše vuz šnajdera privučile šivati, i pomalo su tu i tam nekaj zaradile. Hofirantov je bilo vse menje, a dovičina penzija mala. „Došla je nova piletina v promet“, tak je pokojna babica, nejna sestra znala reči, a ja onda nis razmela kaj je tu na stvari.
Naša je čer Ljubica bila pri njima na stanu četiri leta za vreme studija. Bome smo se načarili kokic, šunkic, čvarkov, krumpera i jezero dinarov vsaki mesec vu tu Vlašku vulicu. Posle mi je Ljubica rekla da je jedva čekala da diplomira i reši se šnajderic. Ni se smela puno prati, am je voda skupa, a jela je v menzi studentskega centra. Sreča kaj joj je stareši brat, predobri Ivek, daval i svoje iksice, a on se ranil v restoranu gde je vuz studij delal. I pri curi. Čer je diplomirala na vreme, a sinek se je mam posle diplome priženil v dobru familiju i prek tasta dobil posel vu velikoj firmi. Vsako zlo za nekaj dobroga. Tak smo se navčili Vugericu i nejno jato pomagati. A si mislim, če su sirote bedaste, lene i još k tomu fine gradske gospe, treba im pomoči, am smo ista krv po prababi, nemremo je pustiti glane. Nikoga, a kam svoje.
V rogožaru je tetica znala donesti krpice, ostatke kaj su šivale zagrebačkim gospami šose i bluze. Bilo je komadičkov platna, krivo skrojeni kraglini kaj se imalo skriti, stare podstave, otparani kragli ze ženske bluze, odrezani rukavi z muške košule. Od najvekše koristi su bili oni poluokrugli zreski od krojenja ženske bluze, okolo rukavov. To je bilo dragoceno, ni se negda platno i roba kupuvalo ni hitalo kak denes, šivalo se i krpalo, prepravlalo. Ruke su znale puno toga narediti i priskrbeti. Da je mogla, donesla bi više toga, tak se tešim.
Ak se kakva mala krpica ni dala baš nikak skoristiti, zrezala sem ju na žnore i žnjom vezala paradajz, a znala sem odnesti punu vreću susedi Barici kaj mi je na tkalačkomu stanu naredila tepih. Krpicu po krpicu, jednako velike kocke metala sem na vrpu, i šivala fertune. Ti su moji fertuneki bili podstavleni, tak da se ne vidi kak su sastavlani, a gda se zmočiju od kojekakvoga posla, naj bi roba ostala suva. Postali su hit v selu. Ja sem te šircle lepo kombinirala, a na jednobojni žep sem našila inicijale određene babice v selu, i tak sem dobro prešla gda je trebalo nekaj dati za imendan, Božić ili sem se osečala nekaj dužna. Ljude treba kak cvetje v cvetnjaku paziti, nemreš sam.
Ni vujnica zela samo kokoš za juvu, fektala je i škatulu od šlap punu mojih rezancov z ormara, žutih kak i cvet kuvajnice. Pokojna babica je znala reči da je Vugerica lena kak crna zemla, i da se na pokojnu babu Špenglericu hitila. Ni se štela z rezanci mučiti, ni ona, ni one nejne, bi sad rekla kaj. Gda je fektala jajca, Jožek joj je rekel naj ide na štagel i pobere po gnezdima kaj tam je, da bu ziher da su friška. I bome je zišla na seno po lotri kak veverica. Jožek ju je gledel čez oblok z kujne, natočil si gemišta i…
– Ja ne dam da gdo dela bedaka z mene!
– A kaj bi ta stara bedača delala bedaka z tebe?
– Ne same z mene, i z tebe!
– Daj-naj, Jožek…
– Kak ne razmeš, gda ona ne bu mogla iti na vlak i vleči od nas, onda bu išla čer; gda nju pritisne i ne bu mogla hoditi, bu večna studentica fektala i nosila. To su niškoristi babe, nesu tebi do gležnja, moja Ifkica. Tu se niš nemre! Ja ti to ne pripovedam kaj su tvoje, več kaj je to tak. A ti si sirota dobra i očeš celi svet naraniti!
– Sad se bumo i svadili.
– Ove su niš koristi frajle nas plačkale dok je Ljubica bila pri nimi, a dete je tam bilo glano i smrzavalo se v špajzi! Ja to nemrem pozabiti.
Posvadili smo se i navečer se pomirili, kak to već pod tuhicom zna biti. Još dok je vujna birašila po vrtu, Jožek je pospremil kola pod krov, konje je del v štalu, skinul je akumulator z traktora, a z fiče je zvlekel nekakov kabel. Onda se prijel mladoga sira, špeka i više pol velike glavice češnjaka kaj bi našoj finoj gospi vujnici smrdel i ona ga pustila na miru. Onda se zaprl v kupaonu. Bome mu je dala straha.
Gda je vujnica pribrala vse kaj je štela zeti, oprala je ruke na kopanji. Da ju je Jožek videl bi ga čula, to se ne sme, voda mora biti čista za marvu. Zula je Jožekove zmazane galoše i čarape pred vrati hiže. Onak zmučena nekaj je malo pojela, kak ptiček i z menom se pospominala, a onda, gda je bilo vreme za iti, zazvala Jožeka naj ju vozi na stanicu. On je viknul da je v kadi. Znala sem kaj bu, a ni mi se dalo toga teškoga rogožara vleči na stanicu i iti žnjum. Te čas je Jožek viknul da imam odma dojti v kupaonu i leđa mu oprati, nokte porezati, tabane ostrugati, namasirati mu pleča i narediti zlevku z vrhnjem za večeru.
Vidla je gospa vujnica da je vrak šalu zel i da mora sama vse to nositi na vlak. Ni se usudila nagovarati me da ju odvezem, a i bilo bi me sram, ne bi mogla zapaliti ni traktor ni auto. Pak je prešla pešice. Za čas se prevezel nekakov auto po cesti prema vlaku, verujem da ju je sirotu povezel, je to bilo teško za vleči za staru ženu kaj se celo živlenje ni vruča vode napila. Bilo mi je žal me lepe Bibice, se sirota dala v čošek naterati, k tomu još i lačna. Mi se čini da ju vožnja z vlakom ne preveč veselila kak ni poseta metropoli.
Malo smo zišli z toga Vuger-stresa i pozabili kaj se stalo, kad, tak za mesec dana, evo ti nje, pak pod kraj meseca. Penzija ni segla. Žurila se nazaj domom i mam, čim se prezula, vjela je gusku, a gusak se zaletel i onak prignutu grizel ju je za vuvo. Tukel ju je z krilmi dok je zlostavlala njegvu žugicu i štela joj krila svezati. Hitil joj je očale v travu i v tom kaosu si je stala na nje i zdrobila je. Pes je lajal, kokoši su kokodakale, pure brbučkale, cela hajka se naredila te čas. Gusak je obranil gusku i odleteli su skup za šupu. Tam je celo jato imalo konferenciju i proslavu pobede nad Vugericom. Bome smo joj morali dati peneze za očale jer je vujnica kričala da nas bu tužila. Štela je i gusaka, a Jožek, jedva je pustil glas črez smeh: „Same si ga zemi!“ Bedača je bežala za njim oko gnoja, skoro i grezla, a onda, naterana v čošek vuz lesu i plot, razbelena zver v perju se okrenula i počela bežati za gospom, tuči ju z krilmi i gristi po nogam i riti. Vujnica je nekak potrefila otprti lesu na cestu, zišla je z dvorišča van i zaprla vrata, a gusak je bome i plota napadal. Me bilo strah če mu med prlkima vlovi glavu, ne bu dobro prešel. Jožek, da spasi gusaka, brže bole joj je donesel praznu torbu i štikle i hitil prek lese na cestu. „Bar ne bu teško za nositi“, još je viknul za njom. Onak pofurena, hitila mu je galoše vu Vajtovu šikaru, oni kaj su v Nemačkoj, i grdo preklela gusaka, valda.
Tej put smo se rešili vujnice. Bilo me je strah i sram, bu pak došla. Stara Marekovićka se z pesima baš te čas morala špancirati po ceste pri naše hiže. Tak celo selo mam zna kak smo sprašili vujnicu nazaj v Zagreb. Sad Jožek vuz nabrkanoga gusaka vežba i draži pevca i purana. Zgledi da bu i racaka napuntal na vujnicu, samo naj dojde!
foto: Đurđa Vukelić Rožić